Пцэжъыяшэхэм язэнэкъокъу
Адыгэ Республикэм икъэзэкъ ныбжьыкIэмэ пцэжъые ешэнымкIэ зэнэкъокъу апэрэу зэхащагъ. Ащ хэлажьэхэрэм пцэкъэнтф къызэрыкIохэр аIыгъыгъэх.
Дзэ-патриотическэ клубэу «Застава» зыфиIорэм хэтхэр осэшIхэм ахагъэхьагъэх. Ахэм япэщагъ Мыекъопэ къэзэкъ отделым иатаманэу Александр Даниловыр.
Пчэдыжьыпэм пцэжъые цIыкIухэр, хьэлабгъохэр, тхыкъэцхэр ары пцэкъэнтфым къыпыхьэщтыгъэхэр, карпхэри къахафэщтыгъэх. Тхыкъэцхэр тхьацур ары къызаощтыгъэхэр, карпыр хьамлыум къекIущтыгъ. Къаубытырэ пцэжъыехэм граммишъэм къыщегъэжьагъэу зы килограммым ехъу къащэчыщтыгъ. Анахь пцэжъые инэу зы килограммрэ грамм 200-рэ къэзыщэчырэр къэзыубытыгъэр Камилла Даниловар ары, ащ а 1-рэ чIыпIэр ыхьыгъ.
Михаил Пылевыр чемпион хъугъэ, ащ нахь пцэжъыябэ къыубытыгъ.
Шеф-пщэрыхьакIо анахь дэгъукIэ алъытагъэхэр, ахэр ары пцэжъыемэ ахэшIыкIыгъэ шхыныгъохэр къэзыгъэхьазырыгъэхэр, Максим Кубиковымрэ Валерия Гущинамрэ, «шеф-мангал» зыфиIорэ цIэр къыфагъэшъошагъ Анатолий Пеховкиным, ащ машIор ыгъэкIосагъэп.
ТекIоныгъэ къыдэзыхыгъэхэм шIухьафтынхэр атаманым афишIыгъэх. АнахьыкIэ дэдэу зэнэкъокъум хэлэжьагъэхэм хэушъхьафыкIыгъэ шIухьафтынхэр Александр Даниловым аритыгъэх.
Адыгеим икъэзэкъ ныбжьыкIэхэм я Союз ары зэнэкъокъум кIэщакIо фэхъугъэр, ащ къэзэкъ организациехэр IэпыIэгъу къыфэхъугъэх.
Екатерина Загорулько.