Бэдзэогъур – агурэ гъэмэфэ маз

Уахътэр зэплъэкIыгъо уримыгъафэу мачъэ: мафэхэр, мазэхэр ащ щызэпэчъэ­хэм фэд. Илъэсым ианахь охътэ тхъагъоу, тыгъэр зыщыбэрэчэтэу, чIыгур къэкIырэ лъэпкъ гъомылэ зэфэшъхьаф­хэмкIэ зыщыбаеу, жьыр IэшIоу, псыр фабэу – зэкIэ зэдиштэу зыщызэдэIорышIэрэ пIалъ гъэмафэр.

НэгъэупIэпIэгъоу чъагъэ мэкъуогъур, къытфэкIуагъ бэдзэогъур. ЫцIэм фэдэр ышъхь – ифабэ къежъэжъыкIы, ижьыбгъэ чъэр, иалрэгъу шхъуантIэ зэфэдэкIэ чIыгур зэлъепкIэ. ЕтIани мы мазэр гъэпсэфыгъо охътэ шъыпкъ, ау лэжьэкIошхо мыпшъыжьхэу чIыгум зыIэ хэлъхэмкIэ анахь IофшIэгъу маз. Къыомыгоожьыщтыр угукIэ пшIоигъоу пIэшъхьи­тIукIэ Iофэу пшIэрэр ары. Арыба зыкIаIуагъэр «Iофым цIыфыр еузэнкIы». Iофыр зикIасэм ипсауныгъи Тхьэм къы­фыхегъахъоу аIо. Мы зэкIэми ялъы­тыгъэу къэIогъэн фаер нахь Iушхэм, нахьыжъхэм акIырыплъыхэу кIэлэцIыкIухэри ежьхэм афэлъэкIыщт Iоф цIыкIухэр ашIэхэу, ащ имэхьанэ игъоры­гъоу агурыгъэIуагъэзэ, шIур ахэлъхьэгъэн зэрэфаер ары. «Нэр делэ, Iэр бланэ» еIо гущыIэжъым, ащ къикIырэр Iофым ущыщтэнэу зэрэщымытыр, зэ зебгъа­жьэкIэ, о къызэрэпшIомышIыгъэу, Iэхэм ар псынкIэу зэрашIэрэр ыкIи пшIэгъахэм узэригъэгушIожьырэр ары.

Бэдзэогъур зыгъэпсэфыгъо уахътэу тэлъытэми, ини цIыкIуи сыд фэдэрэ мази, Iофыр ащыгъупшэ зэрэмыхъущтыр, гъэмэфэ мазэхэм IофшIэнхэр тыдэкIи зэрэщыжъотхэр, кIэлэ Iэтахъохэри яIоф Iахь ашIэу зесэхэкIэ зэрэкIэгушIужьыщтхэр ары.

Гъэмафэр цIыфым къыфэупсэрэ уахът, дунаим изытети гур ещэфы, арышъ, мы бэдзэогъу мэфэ кIыхьэхэри, гъушъэхэри, кIэракIэхэри ини цIыкIуи тызэготэу, зэрифэшъуашэм тетэу, шIуагъэ къытфахьэу зэрэдгъэфедэщтхэм тыпылъын фае.