Рассказ цIыкIу

Тхьаумаф. Унагъор гупсэфэу зэхэс. Джэгоу щысыгъэ кIэлэцIыкIур янэ еплъ- еплъи еупчIыгъ: — Мам, узэцIыкIум хэт ухъумэ пшIоигъуагъа? Ныр игуапэу къыIугушIукIыгъ: — Артисткэ сыхъуным сыкIэхъопсыщтыгъ, — ыIуи, зэримыгъажэу, дэнэ шарыфыр къыпхъуати, орэдыр къыхи­дзагъ, ар къызеухым, о къэплъэгъугъэм анахь шIагъоу къэшъокIаеу къэшъуагъ. Шъэожъыери яти (гъэзетыр лIым зэригъэтIылъэкIыгъэу) еплъых яшъыпкъэ тIэкIоу. — Концертыр къэсыухыгъ! – ыIуи, ныр диваным хэтIысхьагъ. — Оры, пап, узэцIыкIум хэт ухъу пшIоигъуагъа? – шъэожъыем джы ятэ зыфигъэзагъ. Яти хъупхъэу къычIэкIыгъ, къежэщтыгъэм фэдэу шъаом джэуапыр къыри­тыгъ: — Циркач сыхъункIэ сшIагъэемэ, зыпэ къэсымыштэн щыIагъэп. – ПчъэIум Iулъ хьэ цIыкIоу Жучкэ къеджи, къымыгъэлъагъа, къымыгъэпкIагъа, «къымыгъэгущыIагъа» — цирк шъыпкъ зыхэтыгъэхэр. Мыщ дэжьым тэтэжъыр къахэхьагъ. Шъэожъыер гушIоу ащ пэгъокIыгъ, жьыкъэщэгъу римыгъафэу еупчIыгъ: — Тэтэжъ, узэцIыкIум хэт ухъунэу уфэягъа? — А сикIал, кIэлэцIыкIугъо сиIагъэп сэ, — къыриIуагъ. КIым-сымыр такъикърэ ыкъудыигъ. — …Гъаблэ, зао, IофшIэн мыухыжь… — хэхьапщыкIыгъ. Итэтэжъ ыгу егъугъэу Шумафэ ипортфель ушъэгъэшхо зэрэщытэу къылъэ­шъуи, тэтэжъ ыкокI къыригъэуцуагъ: — Ма зэкIэ, зигъаI ори кIэлэцIыкIугъо! Ыужырэ мафэм тэтэжъ къом ыкъо портфелыр къыфихьыжьыгъ, чэфэу къыриIуагъ: — ШъошIа, сызэцIыкIум сэ сызкIэ­хъопсэу анахь сызфэягъэр? Тэтэжъ сыхъуныр ары! Ини цIыкIуи IаплIкъорэгъэу тэтэжъым пэгъокIыгъэх. Н. Дзэукъожь.