Адыгеим икъэзэкъ ныбжьыкIэхэм я Союз иправление итхьаматэу Дмитрий Сурановым ыныбжь илъэс 35-м зэрэнэсыгъэм фэшI а IэнатIэр ыгъэцэкIэнэу Мыекъопэ къэзэкъ отделым иатаман игуадзэу, вахмистрэу Александр Роговыр хадзыгъ.

Адыгеим икъэзэкъ ныбжьыкIэхэм я Союз икъутамэхэу муниципалитетмэ ащыIэхэм япащэхэр зэкIэ Роговым ихэ­дзын фэгъэхьыгъэ Iофтхьабзэм хэлэжьагъэх.

Александр Роговыр къэзы­гъэлъэгъуагъэр атаманэу Александр Даниловыр ары. Ащ къы­зэриIуагъэмкIэ, кандидатыр ныбжьыкIэми, ащ IофшIэгъабэ иI, Шам щыкIогъэ заоми хэлэжьагъ, пшъэрылъэу зыфагъа­зэрэр зэкIэ щытхъу хэлъэу егъэцакIэ, къэзэкъхэмкIэ щысэтехыпIэу щыт.

— Адыгеим икъэзэкъ ныбжьыкIэхэм якомандэ сыхэхьанэу сыхьазыр. Ащ зэрэхэзгъэхъощтым, амалэу сиIэмкIэ сишIуагъэ къызэрэзгъэкIощтым сыпылъыщт, —къыIуагъ Александр Роговым.

ЫпэкIэ а IэнатIэм Iутыгъэ Дмитрий Сурановыр къэзэкъ-кIэ­лэпIоу Адыгеим икъэзэкъ ныбжьыкIэхэм я Союз джы иIэщт, ишIэныгъэхэмкIэ адэгощэщт, IэпыIэгъу афэхъущт. Къэзэкъхэр гъэсэгъэнхэм, ахэр патриотическэу пIугъэнхэм фэгъэхьыгъэ Iофхэр лъигъэкIотэщтых.

Шъугу къэдгъэкIыжьын, Адыгеим икъэзэкъ ныбжьыкIэхэм я Союз зызэхащагъэр 2022-рэ илъэсым ижъоныгъокIэ мазэ и 14-р ары.