Зэзэгъыныгъэ шIыкIэм тетэу къулыкъум кIощт цIыфхэм яугъоин жъугъэу зэрэ Урысыеу щэкIо. Адыгеим а Iофтхьабзэр зэрэщылъы­кIуа­тэрэр республикэм идзэ комиссар шъхьаIэу Александр Авериным «Адыгэ макъэм» къыфиIотагъ.

— Генеральнэ штабым къытфигъэуцугъэ пшъэрылъыр зэрифэшъуашэу тэгъэцакIэ. Ащ къызэрэдыхэлъытагъэмкIэ, мы илъэсым гъэтхапэм и 1-м къыщегъэжьагъэу тыгъэгъазэм и 1-м нэс республикэмкIэ зэзэгъыныгъэ шIыкIэм тетэу къулыкъум дгъэкIон фаер нэбгырэ мин 1,5-м ехъу. Бэдзэогъум и 1-м ехъулIэу типшъэрылъ про­центи 103-м нэсэу дгъэцэкIагъэ, ыпэ тишъыгъэу мэхъу. Сыда пIо­мэ гъэмафэм цIыфхэр нахь къещэлIэгъуе зэрэхъущтыр къы­дэтлъытагъ, — еIо А. Авериным. Дзэ комиссар шъхьаIэм къы­зэрэтфиIотагъэмкIэ, зэзэгъыныгъэкIэ къулыкъум кIощт цIыфхэр жъугъэу зэраугъоищтхэм фэшI дащыщтхэм аныбжь хагъэ­хъуагъ, илъэс 60 — 65-м нэс, япсауны­гъэ изытет, дзэ-учетнэ сэнэхьа­тэу яIэм ялъытыгъэу къы­хахых. АныбжьыкIэ нахьыбэу къекIуа­лIэхэрэр къыхэбгъэщынэу хъу­рэп, ныбжьыкIэхэри, нахь ныбжь зиIэхэри зэзэгъыныгъэм кIатхэх. ГурытымкIэ илъэс 30 — 40 зыныбжьхэр къыхэбгъэщыхэмэ хъущт, дзэ Iофми нахь хэшIыкI фыряIэу, фэхьазырхэу щытых. Нахьыбэу зэзэгъыныгъэкIэ къулыкъум кIощтхэр зыщыкIатхэхэрэм ягугъу къэтшIымэ, къа­лэу Мыекъуапэ апэ ит. Рай­онхэмкIэ къахэщыхэрэр — Мые­къуапэр, Джаджэр, Красногвардейскэр. Дивизионэу «Майкопскэр» Александр Авериным ыпэкIэ дытиIэгъэ зэдэгущыIэгъум къызэрэщытиIуагъэмкIэ, бэдзэогъум и 1-м ехъулIэу «именные подразделения» зыфаIохэрэм а­фэдэ (цIэ гъэнэфагъэ иIэу шъолъыр пэпчъ ащызэхащэ­хэ­рэр) Адыгеим щыгъэпсыгъэн фэягъ. Ащ зэреджагъэхэр «имен­ной реактивный дивизион «Майкопский». — Зэзэгъыныгъэ шIыкIэм тетэу гуфит нэбгыри 120-м ехъу зыхэхьэгъэ ятIонэрэ дивизионыр дгъэпсыгъэ. Мыекъопэ дзэ гарнизоным ичастьхэм ащыщ мыр щыIэщт, мы уахътэм дзэкIолIхэм егъэджэн-ухьазырынхэр акIух. Пстэури щыгъуаз Андырхъое Хъусен ыцIэ зы­хьырэ диви­зионыр илъэсым ехъугъэу хэу­шъхьафыкIыгъэ дзэ операцием зэрэхэлажьэрэр. Ащ хэт дзэ­къулыкъушIэхэм япшъэрылъхэр щытхъу хэлъэу зэрагъэцакIэрэр зыхэхьэхэрэ командованием ипащэхэм къыхагъэщы. Ащ ишы­хьат дзэкIолIхэм ыкIи офицер­хэм ащыщыбэхэм къэралыгъо тын лъапIэхэр къафагъэшъошагъэх, — къыIуагъ Александр Авериным. Адыгеим щагъэпсыгъэ дивизионитIум япшъэрылъхэр зэфэ­дэщтых, зэрэзэтекIыхэрэр — лъэныкъо зэфэшъхьафхэмкIэ къулыкъур ахьыщт. Ахъщэ тынхэр Мыхэр тигъэзет къыхиуты­гъагъ, ау джыри зэ шъугу къэд­гъэкIыжьыных. УФ-м ихэбзэ­гъэ­у­цугъэ тетэу къулыкъур зэри­­хьыщтым апэрэу зэзэгъыны­гъэм кIатхэрэм зэтыгъоу сомэ мин 200 раты. Адыгеим и ЛIышъхьэу КъумпIыл Мурат иунашъокIэ ахъщэ тедзэ зэтыгъоу сомэ мини 150-рэ ащ фытырагъахъо. Мы шъолъыр ахъщэ тыныр сомэ мин 200-м нагъэсыгъ, охътэ благъэм ащ фэгъэхьыгъэ хэбзэ­гъэуцугъэр къыдэкIыщт. Егъэ­джэн гупчэхэм, полигонхэм ухьа­зырыныгъэ щакIуфэ яоклад сомэ мин 40 — 60 фэдиз. Зэзэгъыныгъэм кIэтхэгъэ къулыкъушIэр хэушъхьафыкIыгъэ дзэ операцием щыIэ зыхъукIэ мазэ къэс сомэ мини 195-м къыщегъэжьагъэу къыраты, званиеу иIэм елъытыгъэу ащ къыхэхъо. Джащ фэдэу зэпэуцужьхэм, чIыпIэ плъырхэм аIутхэм, пыим итехникэ зэхэзыкъутэхэрэм на­хьыбэ афыхагъахъо. ХэушъхьафыкIыгъэ дзэ операцием хэла­жьэхэрэм ыкIи ахэм яунагъо­хэм социальнэ фэгъэкIотэныгъэхэр афагъэнэфагъэх. Зэзэгъыныгъэм зэрэкIатхэ­хэрэ пIалъэр зэфэшъхьаф. Къэбарыр зэрыжъугъотэщтыр Дзэ къулыкъум зэзэгъыны­гъэкIэ хахьэ зышIоигъохэм дзэ комиссариатым лъэIу тхылъ Iэ­кIагъэхьан фае. ЧIыпIэу зыщыпсэухэрэм елъытыгъэу зэпхыгъэхэм зыфагъэзэшъущт. МыекъуапэкIэ къэбарыр мыщ фэдэ чIыпIэм щагъотыщт: ур. Комсомольскэр, 217-рэ, телефоныр: 8(8772) 52-11-27. Джащ фэдэу шIоигъоныгъэ зиIэхэр «линие плъырым» иномерэу 117-м теошъущтых ыкIи сайтэу «службапоконтракту.рф» зыфиIорэм ихьашъущтых. ЗэзэгъыныгъэкIэ къулыкъум фэгъэхьыгъэ игъэкIотыгъэ къэбарыр телеграм-каналэу «Адыгея — служу Родине» зыфиIорэми ит. Гъэтхэ дзэ дэщыгъор Зэрэхабзэу, мэлылъфэгъум и 1-м къыщегъэжьагъэу бэдзэ­огъум и 15-м нэс гъэтхэ дзэ дэщыгъор Урысыем щэкIо. Адыгеим ар щызэшIохыгъэ зэрэхъурэр Александр Авериным къытфиIотагъ. — ХэушъхьафыкIыгъэ дзэ операциер зэрэкIорэм емылъы­тыгъэу, аныбжькIэ къызытефэрэ къулыкъушIэхэм ядзэ дэщыгъо сыд фэдэрэ лъэныкъокIи зэхъо­кIыныгъэ фашIыгъэп, коронавирусым епхыгъэ гъунапкъэхэр зэрагъэмэкIагъэхэм нэмыкIэу. Къулыкъум къызэрэтыщтхэр зы илъэс, хэушъхьафыкIыгъэ дзэ операциер зыщыкIорэм ныбжьыкIэхэр ащэщтхэп. Гъэтхэ дзэ дэщыгъор зэпыугъо имыIэу макIо, пшъэрылъэу нэбгырэ 500-м ехъурэр идгъэкъугъ, — хигъэунэфыкIыгъ республикэм идзэ комиссар шъхьаIэм. Iэшъынэ Сусан