Лъэпкъ проектхэм язэхэщэнкIэ IэпыIэгъух
2022-рэ илъэсым проектэу «Билет в будущее» зыфиIорэр социальнэ проект анахь дэгъухэм ащыщ хъугъэ ыкIи Лъэпкъ шIухьафтынэу «Наш вклад» зыфиIорэр къыфагъэшъошагъ.
Лъэпкъ премиеу «Наш вклад» зыфиIорэм икIэуххэр бэмышIэу къэнэфагъэх. МысатыушI организациеу «Национальные приоритеты» зыфиIорэр ары ащ кIэщакIо фэхъугъэр. Лъэпкъ мурадхэр гъэцэкIэгъэнхэм ыкIи лъэпкъ проектхэр щыIэныгъэм щыпхырыщыгъэнхэм бизнесыр ыкIи мысатыушI организациехэр къыхэзыгъэлэжьэрэ апэрэ шIухьафтынэу ар щыт. Мыщ хэлажьэхэрэм IофшIэпIэ чIыпIакIэхэр къызэIуахых, предприятиехэм IэпыIэгъу афэхъух, экономикэм, шIэныгъэм ыкIи гъэсэныгъэм, псауныгъэр къэухъумэгъэным, культурэм ыкIи спортым хэхъоныгъэхэр ашIынхэм дэлажьэх.
— МысатыушI организациехэм тызэрафэразэр шъхьафэу къыхэзгъэщы сшIоигъу. Волонтер IофшIэнэу агъэцакIэрэм елъытыгъэу культурэм, гъэсэныгъэм, экологием, псауныгъэр къэухъумэгъэным яшIуагъэ арагъэкIы. ЩыIэныгъэм чIыпIэ къин ригъэуцогъэ нахьыжъхэм IэпыIэгъу афэхъух, — къыIуагъ УФ-м и Правительствэ и Тхьаматэ иапэрэ гуадзэу Андрей Белоусовым.
2023-рэ илъэсым кIэлэцIыкIухэр ыкIи ахэм янэ-ятэхэр мы проектым нахьыбэу къыхэгъэлэжьэнхэм пылъыщтых. Проектым иплатформэ кIэлэеджакIохэм апае апэрэ профориентационнэ къалэу «Профиград» зыфиIорэр къыщызэIуахыгъ. ДжырэкIэ нахь ящыкIэгъэ сэнэхьатхэр ныбжьыкIэхэм арагъашIэх. ДжэгукIэ шIыкIэм тетэу тестхэр арагъэшIыхэзэ яшIэныгъэхэм ахагъахъо. Виртуальнэу сэнэхьатым епхыгъэу, гущыIэм пае, инженертехнологэу, дизайнерэу, агрономэу, искусствоведэу, шIэныгъэлэжьэу Iоф ашIэн алъэкIы. Джащ фэдэу ны-тыхэм апае гъэсэныгъэ курсэу «Родители в теме» зыфиIорэр къызэIуахыщт. Ащ ишIуагъэкIэ нахь агъэфедэрэ лъэныкъохэр ны-тыхэм ашIэщтых ыкIи ясабыйхэм ящыIэныгъэ гъогу зэрапхыщт сэнэхьатыр къыхахынымкIэ IэпыIэгъу афэхъущтых.
ДжырэкIэ шъолъыр командэм хэтхэм онлайн-еджапIэм яшIэныгъэхэм щыхагъахъо. 2019-рэ илъэсым къыщегъэжьагъэу «Билет в будущее зыфиIорэр Адыгеим щызэхащэ. Гурыт еджэпIэ 70-рэ фэдиз ащ хэлажьэ, кIэлэегъэджэ-новигатор 80 фэдизмэ кIэлэеджакIохэм Iоф адашIэ, сэнэхьатыр къыхахынымкIэ IэпыIэгъу афэхъух. Непэрэ мафэмкIэ кIэлэеджэкIо 5800-рэ фэдиз егъэджэнхэм ахэлэжьагъэх.