Урысыем ошIэ-дэмышIэ IофхэмкIэ и Министерствэ и Гъэ­Iо­рышIапIэу АР-м щыIэм 2023-рэ илъэсым имэзи 6-у пыкIы­гъэм Iоф зэришIагъэр зыщызэфихьысыжьыгъэ пресс-конференцие зэхищагъ.

[caption id="attachment_135160" align="aligncenter" width="800"] А. Лаутеншлегер.[/caption]

Илъэсныкъом ошIэ-дэмышIагъэ зы­хэлъ Iофэу зыхэлэжьагъэхэм, ахэр зэрэ­да­гъэзыжьыгъэ­хэм игъэкIотыгъэу пащэр къатегущы­Iагъ. Ащ къызэриIуагъэмкIэ, мы уахътэм къыриубытэу зэкIэмкIи ошIэ-дэмышIагъэ зыхэлъ хъугъэ-шIэгъи 5-мэ ядэгъэзыжьын хэлэжьагъэх. Блэ­кIыгъэ илъэсым мыщ фэдэ иуахътэ ошIэ-дэмышIагъэ зыхэлъ хъугъэ-шIэгъи 3 щыIагъэу агъэунэфыгъ. С.Илющенкэм ахэм кIэкIэу ягугъу къышIыгъ.

ЖъоныгъуакIэм и 23-м ошъушхоу къехыгъэм къыхэкIэу Мыекъопэ районым ипсэупIи 6-мэ яунашъхьэхэр ыгъэфыкъуа­гъэх, хэтэ 20 фэдизмэ ыкIи мэкъумэщ культурэхэм иягъэ аригъэкIыгъ.

ЖъоныгъуакIэм и 26-м Кощхьэблэ районым ит къуаджэу Фэдз ощхышхоу къыщещхыгъэм къыхэкIэу нэбгырэ мини 2-м ехъу зыщыпсэурэ къуаджэм ичIыгу Iахь 699-мэ псыр акIэхьагъ. Мэкъуогъум и 3-м Кощхьэблэ районым ипсэупIэхэу Майскэм ыкIи Краснэм япсэупIи 7-мэ, чIыгу Iахь 69-мэ псыр акIэхьагъ.

Мэкъуогъум и 26-м Фэдз щыIэгъэ псыкъиуным къыздихьыгъэ гумэкIыгъохэр дагъэзыжьыгъэхэу, шIоир зэкIэ аукъэбзыжьыгъэу мэкъуогъум и 5-м икIэрыкIэу Кощхьэблэ районым ипсэупIэхэу Фэдзрэ Кармолинэ-Гидроицкэмрэ, Мыекъопэ районым ит станицэу Кужорскэм ощхышхо къащещхыгъ. Ащыгъуми чIыгу гектар 913-мэ, псэупIэ 99-мэ псыр акIэхьагъ.

— Инэу тыфэраз АР-м и ЛIышъхьэу КъумпIыл Мурат. Псыкъиуным къызыди­хьыгъэ тхьамыкIагъом лъэшэу ыгъэгумэкIыгъ, Iофхэм язытет зыфэдэм ежь ышъхьэкIэ зыщигъэгъозагъ ыкIи цIыфхэм ягумэкIыгъохэр адигощыгъ. Iофыр зэрэ­лъыкIуатэрэм ежь ышъхьэкIэ ынаIэ те­тыгъ. Оперативнэ штабым пэщэныгъэ дызэрихьэзэ, къулыкъу зэфэшъхьафхэр игъусэхэу тызэрэзекIон фаер къытиIозэ, тшIэрэр къыддишIэзэ, гумэкIыгъом тыпэуцужьыгъ. Министерствэхэр, ведомствэхэр зэкIэ къыхигъэлажьэхи, тищыкIэгъэ техникэр икъоу къытIэкIигъэ­хьагъ, ащ ишIуагъэкIэ щагухэм адэтыгъэ псыр адэтщыгъ, псэу къакIорэм игъом тыпэуцунымкIэ IэпыIэгъушхо къытфэ­хъугъ, — къыIуагъ С. Илющенкэм.

Аужырэу ошIэ-дэмышIагъэ зыхэлъ хъугъэ-шIагъэу агъэунэфыгъэхэр гъогу хъызмэтым фэгъэзэгъэ къулыкъухэм дагъэзыжьыгъэх. ГущыIэм пае, мэкъуогъум и 15-м ощхэу къещхыгъэм ыпкъ къикIэу Гъозэрыплъэ екIурэ автомобиль гъогоу А 153 зыфиIорэм игъогу Iахь зэщыкъуагъэ. Ащ къыхэкIэу машинэхэр рамыгъакIоу гъогур зэфашIи, гъэцэ­кIэжьынхэр рашIылIагъэх.

Джащ фэдэу ГъэIорышIапIэм ипащэ къызэриIуагъэмкIэ, мы илъэсым мэзаем и 21-м нэгъэупIэпIэгъум метрэ 28-рэ илъэшыгъэу жьыбгъэшхоу щыIагъэм муниципальнэ образовании 4-мэ социальнэ мэхьанэ зиIэ псэуалъэу арытхэм яунашъхьэхэр тыритхъыгъэх. Мэзаем и 27-м Тэхъутэмыкъое районым гъэстыныпхъэ шхъуантIэр зэрыт баллоныр къыщыуи, гъунэгъоу щытыгъэ гаражым машIор къыкIэнагъ. Зыпари хэкIодагъэп, ау зы нэбгырэм шъобжхэр тещагъэ хъугъэ. Мэкъуогъум и 4-м Адыгэ респуб­ликэ сымэджэщым неврологиемкIэ иотделение машIор къыкIэнэгъагъ. Мы чIыпIэм мэшIогъэкIосэ къулыкъушIэхэр псынкIэу къэсыгъэх, нэбгырэ 70-рэ фэдиз нэмыкI чIыпIэхэм агъэкощыгъэх ыкIи машIор псынкIэу агъэкIосэжьыгъ.

ГъэIорышIапIэм ипащэ бэ щысэу къы­хьыгъэр. Арэу щытми, ицыхьэ телъэу къыхигъэщыгъэр сыд фэдэрэ къэгъэ­нэжьын Iофтхьабзэ зэрамыхьагъэми, зыпари ахэм ахэкIодагъэп. Ар къулыкъушIэхэм шIукIэ афелъэгъу.

Арэу щытми, аужырэ хъугъэ-шIэгъэ тхьамыкIагъоу мы уахътэм къэгъэнэ­жьакIохэр зыуж итхэм пащэм ыгу хэкIэу игугъу къышIыгъ. Ащ къызэриIуагъэмкIэ, мэкъуогъум и 18-м Краснодар щыщ кIалэм ХъымыщкIэй зыщигъэпсэфызэ псыхъоу Шъхьэгуащэ зыхапкIэм псы орым рихьыжьи, къыхэкIыжьышъугъэп. Мэфэ 14 хъугъэу къэгъэнэжьакIохэр ащ лъэхъух. Мы мафэхэм псыр нахь зэкIэ­кIуагъ, цIыф зэрымыс къэзыбыбыхьэрэ пкъыгъомкIэ чIыпIэхэр къаплъыхьагъэх, лъыхъон Iофтхьабзэхэр лъагъэкIуатэх.

Журналистхэр агъэшIуагъэх

ГъэIорышIапIэм ипащэу Станислав Илющенкэр ошIэ-дэмышIагъэ зыхэлъ IофшIэнэу, пэшIорыгъэшъ Iоф­тхьабзэу зэрахьэхэрэм, цIыфхэм къэбарыр икъоу зэралъагъэIэсырэм алъэныкъокIэ чанэу Iоф къадэзышIэхэрэ журналистхэм ирэзэныгъэ гущыIэхэр апигъо­хыгъэх. Ар къэзыушыхьатырэ щытхъу тхылъхэр аритыжьыгъэх. Ахэм зэу ащыщ «Адыгэ макъэм» иIофышIэу КIарэ Фатимэ.