Лэгъо-Накъэ екIурэ гъогур агъэцэкIэжьы
ЗыгъэпсэфыпIэу «Лэгъо-Накъэ» изэтегъэпсыхьан Адыгеим щылъагъэкIуатэ.
Лъэпкъ проектэу «ЗекIоным ыкIи хьакIэ егъэблэгъэным яиндустрие» зыфиIорэм хэхьэрэ федеральнэ проектэу «ЗекIоным иинфраструктурэ хэхъоныгъэхэр егъэшIыгъэнхэр» зыцIэм къыдыхэлъытагъэу автомобиль гъогоу «Дахъо — къушъхьэтхэу Лэгъо-Накъэ» игъэцэкIэжьын фежьагъэх. ЗэкIэмкIи агъэцэкIэжьыщтыр метрэ 965-рэ. 2023-рэ илъэсым ыкIэ нэс IофшIэнхэр аухынхэу агъэнафэ.
«Мыщ фэдэ проектышхом игъэцэкIэн ишIуагъэкIэ республикэм зекIоным джыри нахь зыщиушъомбгъущт, зэрэхэгъэгоу зекIохэр къарыкIыщтых. Инфраструктурэу мы чIыпIэм ищыкIагъэр зэкIэ тIупщыгъэн фае, гъогухэм язакъоп, электричествэри, гъэстыныпхъэ шхъуантIэри, псырыкIуапIэхэри къещэлIэгъэщтых. Мыгъэ гъогум игъэцэкIэжьын тыухыщт. Ащ зы- гъэпсэфыпIэм цIыфхэр рищэлIэщтых», — къыIуагъ УФ-м псэупIэ-коммунальнэ хъызмэтымкIэ ыкIи псэолъэшIынымкIэ иминистрэ игуадзэу Юрий Гордеевым.
Проектым къызэрэдилъытэрэмкIэ, автомобиль гъогоу агъэцэкIэжьырэм бгъуитIу зекIуакIэ иIэщт, машинэ уцупIэхэри къыщыдэлъытэгъэщтых.
«Федеральнэ бюджет учреждениеу «РосСтройКонтроль» зыфиIорэм иинспекторхэр ары гъогум игъэцэкIэжьын зэрэкIорэм лъыплъэхэрэр. Джырэ уахътэм гъогужъым изэхэхыжьын, чIышъхьашъоу гъогур зэрыкIощтым изэгъэзэфэн дэлажьэх. Джырэблагъэ псырычъапIэхэм язэблэщын, гъогу Iупэхэм ягъэпытэн епхыгъэ IофшIэнхэм афежьэщтых», — къыIотагъ Федераль- нэ бюджет учреждениеу «РосСтройКонтроль» зыфиIорэм игенеральнэ пащэу Владимир Щербининым.
Правительствэм иунашъокIэ 2021-рэ илъэсым ибэдзэогъу мазэ къыщегъэжьагъэу УФ-м псэупIэ-коммунальнэ хъызмэтымкIэ ыкIи псэолъэшIынымкIэ и Министерствэ федеральнэ проектэу «ЗекIоным иинфраструктурэ хэхъо-ныгъэхэр егъэшIыгъэнхэр» зыфиIорэм пэщэныгъэ дызэрехьэ, ар лъэпкъ проектэу «ЗекIоным ыкIи хьакIэ егъэблэгъэным яиндустрие» зыфиIорэм къыдыхэлъытагъэу щыт.