ЕджэпIэ зекIоным зырагъэушъомбгъу
ЕджапIэхэм ачIэс кIэлэцIыкIухэр зекIоным хэгъэлэжьэгъэнхэм ипрограммэ Адыгеим игъэкIотыгъэу щагъэцакIэ, кIэлэцIыкIу 900-м ехъу Мыекъопэ районым ащ ишIуагъэкIэ щыIагъэх, тикъушъхьэхэм ядэхагъэ зэрагъэлъэгъугъ.
Турбазэу «Горная» зыфиIорэм ихьакIэщ кIэлэеджакIохэр чIагъэсых, щагъашхэх. ФэIо-фашIэхэм ахэхьэх республикэм изекIо чIыпIэхэм экскурсие кIэлэцIыкIухэр ащэнхэр, мастер-классхэр афызэхащэнхэр.
ЫпкIэ зыхэмылъ мыщ фэдэ зекIо дэкIыгъохэу я 5 — 9-рэ классхэм арысхэр къызхагъэлажьэхэрэр Адыгеим 2022-рэ илъэсым къыщегъэжьагъэу щызэхащэ, ар лъэпкъ проектэу «ЗекIоным ыкIи хьакIэ егъэблэгъэным яиндустрие» зыфиIорэм къыдыхэлъытагъэу щыт.
Гъот макIэ зиIэхэм ыкIи сабыибэ зэрыс унагъохэм якIэлэцIыкIу 1316-рэ гъэрекIо мы программэм къыхырагъэубытагъ. Лъэпкъ проектымкIэ мылъкур къатIупщы, ащ дакIоу мысатыушI организациехэу къэралыгъо фэIо-фашIэхэр зыгъэцакIэхэрэм аратырэ социальнэ сертификатхэри Iофым пэIуагъахьэ. Сертификатыр зэратырэм, ащкIэ фэIо-фашIэхэм апкIэ еты. Iофтхьабзэм фэгъэзагъ зекIонымкIэ ыкIи зыгъэпсэфыпIэхэмкIэ Адыгэ Республикэм и Комитет.