Красногвардейскэ районым ит къуаджэу Хьатикъуае екIолIэрэ автомобиль гъогоу километри 2,84-рэ хъу­рэр «Щынэгъончъэ ыкIи шэпхъэшIухэм адиштэрэ гъо­гу­хэр» зыфиIорэ лъэпкъ проектым къыдыхэлъытагъэу агъэцэкIэжьыгъ.

БлэкIыгъэ жъоныгъокIэ мазэм IофшIэнхэр щау­хыгъэх. Мыщ къуаджэм иурам шъхьаIэу Мирэр зэпечы, арышъ, социальнэ мэхьанэ ин зиIэхэм ащыщ мэхъу.

Красногвардейскэ районым игъогушI хъызмэтшIапIэу псэуалъэр зыгъэцэкIэжьыгъэм лъэпкъ про­ектым къыдыхэлъытагъэу ыпэкIи макIэп Iоф зыдишIагъэр, зэкIэри шапхъэхэм адиштэу ыгъэ­кIэжьыгъ. Ежь хъызмэтшIапIэм иунэе лабораторие иIэу ащ къызэригъэ­нафэрэм тетэу асфальтыр зэхалъхьэ ыкIи тыралъхьэ.

Ащ пае къэмынэу Iоф­шIэнхэр зэрагъэцэкIагъэ­хэр нэужым «Адыгеяавтодорым» иэкспертхэм ауплъэкIужьыгъ. ГъэIорышIапIэм илабораторие иIофышIэу Джэнчэтэ Бэл­лэ къызэриIуагъэмкIэ, гъо­гур зэщизмэ, зыщищыкIагъэм егъэзыхыгъэмэ, асфальтэу телъыр шап­хъэхэм адиштэу зэхэлъхьагъэмэ, нэмыкI шапхъэу проектым къыдыхэлъы­та­гъэ­хэр гъэцэкIагъэхэмэ зэ­рагъашIэ.

— ПэшIорыгъэшъэу къы­зэрэнэфагъэмкIэ, асфальтым иIужъуагъэ шапхъэхэм адештэ, — къы­Iуагъ экспертым.

Мыщ фэдэ уплъэкIунхэм IофшIэнхэр шапхъэхэм зэрадиштэрэр къагъэлъагъо, заказхэр зытырэми, ар зыгъэцакIэрэми шIыкIакIэу лъэхъаным къыздихьыхэрэр нахьыбэу гъо­гушIыным щагъэфе­дэнхэм фэIорышIэх.