Комплексэу «Лаура» зыфиIорэм щаIыгъ псэушъхьэхэм япчъагъэ охътэ кIэкIым къыкIоцI хэхъуагъ.

ЖъоныгъуакIэм ыкIэ­хэм, мэкъуогъум икъихьэгъухэм адэжь къушъхьэ пчэнищ къэхъугъ, къохьэпIэ кавказ пчэн лъэпкъхэр ары хахъо зыфэхъугъэр.

Джырэ уахътэм пчэн къэхъугъакIэхэр ежь-ежьырэу машхэх, пчэн анэмэ ящэ афекъу. Пчэн анэхэри ялъфыгъэмэ лъэшэу апылъых, афэсакъых. Ахэм уахэхьагъэми, лъфы­гъэмэ уарагъэкIолIэщтэп, зэрэ­яамалэу къаухъумэх, ар дэгъу, ау ащ дакIоу уплъэ­кIунхэр шIыгъуае мэхъух.

Шъыхьэ къолэнмэ яуна­гъуи хахъо иI, тхьамафэкIэ узэкIэIэбэжьмэ, «Бэмби» дунаим къытехъуагъ. Бэп уахътэу тешIагъэр шъыхьэ анэм илъфыгъэ вольер къогъум зыщиIыгъыгъэм, зыщигъэбылъыщтыгъэм, джы шъыхьэ цIыкIум къечъыхьэ, дунаир зэрегъашIэ. ЗекIо къэ­кIуагъэхэми, IофышIэу мыщ Iутхэми ащымыщынэу шъыхьэ цIыкIум псынкIэу шъолъырыр къызэпечъы­хьэ, мапкIэ, мэджэгу.

Енотхэм япчъагъи хэп­шIыкIэу хэхъуагъ, енот анэ­кIитIумэ «сабый» къо­лэни 6 къафэхъугъ.

Вольернэ комплексым щылажьэхэрэр мэгушIох мыщ дэс псэушъхьэхэм япчагъэ зыхахъокIэ. Воль­ерым псэушъхьэхэр щымыгупсэфыщтыгъэхэмэ, ящыкIагъэ Iусыр щамы­гъотыщтыгъэмэ, лIэужым щыкIэхэу къэнэныех. ЗэкIэ агъотышъ ары зыкIалъ­фэхэрэр, зыкIахахъорэр.

Кавказ заповедникым ипресс-къулыкъу