Краснодар псыIыгъыпIэ лъэныкъом щызэхащэгъэгъэ зэIукIэм хэлэжьагъэх АР-м иминистрэхэм я Кабинет итхьаматэу КIэрэщэ Анзаур, Пшызэ шъолъыр иапэрэ вице-губернаторэу Игорь Галась, Краснодар имэрэу Евгений Наумовыр, АР-м терроризмэм пэшIуекIогъэнымкIэ иаппарат ипащэу ЛIый Азамат.

[caption id="attachment_135071" align="aligncenter" width="800"] Г. Аносов.[/caption]

Гухэлъ шъхьаIэу яIагъэр Адыгэ Рес­публикэмрэ Краснодар краимрэ, джащ фэдэу федеральнэ структурэхэм ыкIи хъызмэт зэфэшъхьафхэм Краснодар псыIыгъыпIэр щынэгъончъэу щытынымкIэ язэдэлэжьэныгъэ нахьышIоу зэхэщэгъэным фытегъэпсыхьэгъэ унашъохэу аштэгъагъэхэр пхырыщыгъэнхэр ары.

«Мы стратегическэ мэхьанэ зиIэ псэуалъэм шъолъыритIумэ ащыпсэурэ цIыфхэм ящыIэныгъэкIэ мэхьэнэшхо иI. IофшIэн гъэнэфагъэ зэшIотэхы ащ гумэкIыгъо ыпкъ къимыкIыным пае. ЗэкIэми зэдытипшъэрылъыр Краснодар псыIыгъыпIэм иIофшIэн яIоф хэмылъэу хэзылъхьэхэрэм зэрарэу къахьын алъэ­кIыщтым къыкIегъэчыгъэнымкIэ Iоф­тхьабзэу зэшIохыгъэн фаехэм амал зэриIэкIэ нахь шIогъабэ къакIэкIоныр ары», — къы­Iуагъ КIэрэщэ Анзаур.

«Мы лъэхъаным Краснодар псыIыгъы­пIэр щынэгъончъэу щытыным пае Iоф­тхьэбзабэ итхъухьагъ. Арэу щыт нахь мышIэми, джыри Iофтхьэбзэ тедзэхэр ищыкIагъэу зыщыхъухэрэм Iофхэм язытет къыдэлъытагъэу, тызэрэзекIон фаемкIэ зигъо Iофыгъохэр зэшIотхынхэ фае. Анахь мэхьанэ зиIэр Краснодар краимрэ Адыгэ Республикэмрэ яадминистрациехэр зэгъусэхэу а Iофыгъом изэшIохынкIэ псынкIэу зишIуагъэ къэ­кIощт хэкIыпIэхэр къагъотынхэр ары», — къыIуагъ Игорь Галась.

[caption id="attachment_135072" align="aligncenter" width="800"] Г. Аносов.[/caption]

Адыгэ Республикэмрэ Краснодар краимрэ ошIэ-дэмышIагъэ зыхэлъ гумэкIыгъоу къэхъун ылъэкIыщтхэм япхыгъэ системэ гъэнэфагъэу яIэхэм язэдэлэжьэныгъэ нахьышIоу зэхэщэгъэнымкIэ, террористическэ нэшанэ зиIэ гумэкIыгъохэм якIэуххэр дэгъэзыжьыгъэнхэмкIэ яеплъыкIэхэр къызэфаIотагъэх.

Мы Iофтхьабзэм хэлажьэхэрэм анаIэ зытырадзагъэр гумэкIыгъо горэ къэхъу­мэ, техникэу ящыкIэгъэщтыр аIэкIэгъэ­хьэгъэнымкIэ, хъугъэ-шIагъэхэм афэгъэ­хьыгъэ къэбарыр цIыфхэм игъом алъыгъэ­IэсыгъэнымкIэ Iофэу зэшIохыгъэн фаеу хъущтхэр ары. Адыгэ Республикэмрэ Краснодар краимрэ тапэкIи язэдэлэжьэныгъэ гъэлъэшыгъэным фэгъэхьыгъэ унашъо мыщ щаштагъ.

Шъугу къэтэгъэкIыжьы: Краснодар псыIыгъыпIэр Адыгэ Республикэмрэ Краснодар краимрэ ягъунапкъэ дэжь щыI, квадрат километрэ 400 фэдиз еубы­ты. ПсыIыгъыпIэм ипроцент 90-р Ады­геим ичIыгу ит. Гидротехническэ псэуа­лъэм къэухъумэн IофшIэнхэм афэгъэзэгъэ постиплI щыI, Росгвардием иIофышIэхэм чэщи мафи ямыIэу ар къагъэгъунэ. Видеолъыплъэным тегъэпсыхьэгъэ камери 100-м ехъу а чIыпIэм щыI.