Мысатыу организациеу «Адыгэ Республикэм ипредпринима­тельствэ IэпыIэгъу езыгъэгъотырэ Гуп­чэр» къадеIэзэ, пащэу КIыкI Артур къыхэлажьэзэ, рес­публикэм икъэралыгъо къулы­къушIэхэр производствэм зэрэщыкIаугъоещт шIыкIэм процессхэм я ФабрикэкIэ зэджагъэхэм иплощадкэ щыфагъасэхэу рагъэ­жьагъ. ФитыныгъэхэмкIэ Федеральнэ гупчэм иэксперт-тренер ары ахэр езыгъаджэхэрэр.

«Наукэм къызэрэдилъытэрэм тетэу Iофхэр зэхащэхэ зыхъукIэ, Iофыгъохэр къыхагъэщынхэ, планированиемкIэ, IофышIэхэм ягъэIорышIэнкIэ, къэкIуапIэхэм ягъэфедэнкIэ Iофэу ашIэрэм шIуагъэу къыкIакIорэм зыкъырагъэIэтын алъэ­кIыщт. Дунаим псынкIэ дэдэу зехъожьы, гъэкIэжьын Iофтхьабзэхэр тыдэкIи щызэрахьэх. Къэралыгъо къулыкъушIэхэр уахътэм дэбэкъошъухэу, псынкIэу унашъохэр аштэу, хэкIыпIэ тэрэзхэр къагъотышъоу щытынхэ фае», — къыIуагъ Адыгэ Республикэм экономикэ хэ­хъоныгъэмрэ сатыумрэкIэ иминистрэу Шэуджэн Заур.

ГъэцэкIэкIо хэбзэ къулыкъухэм яIофы­шIэхэр къэралыгъо гъэIорышIэныр на­хьы­шIу зэрашIыщтым, чIэнагъэхэр къызэрэрагъэIыхыщтым фагъасэх. Нахь шIуагъэ къытэу IофшIэныр зэрэзэхащэщт, проект­хэр тэрэзэу зэрагъэцэкIэщт шIыкIэм мэфи 4 ахэр фырагъэджэщтых, системэу «5С» зыфиIорэмкIэ IофшIэпIэ чIыпIэр зэрэзэха­щэрэмкIэ шIэныгъэхэр арагъэгъотыщтых. Тренингым илъэхъан къэралыгъо къулыкъушIэхэм къэбархэр къызэрау­гъоирэ шапхъэхэр, Iофыгъоу къэуцухэрэр зыпкъ къикIыгъэхэмрэ ахэр зэшIуахын зэралъэкIыщт амалхэмрэ узэралъыхъун фэе шIыкIэр аIэ къырагъэхьащтых.

IофшIэныр шIуагъэ къытэу зэхэзыщэхэрэм яопыт къэралыгъо гъэIорышIэнымкIэ сыд фэдэрэ лъэгапIи щагъэфедэн ямурад.

Къэралыгъо къулыкъушIэхэм пшъэрылъ шъхьаIэу яIэр шIэныгъакIэхэр къы­зэрэз­IэкIагъэхьащтхэм дакIоу нэмыкI лэжьакIо­­хэри IофшIэнымкIэ амалыкIэхэр къы­зыфагъэфедэнхэм кIагъэгушIунхэр ары.

— ХэгъэунэфыкIыгъэн фае 2019-рэ илъэсым, лъэпкъ проектэу «Производительность труда» зыфиIорэр республи- кэм щагъэцакIэу заублэм, IофшIэныр на­хьы­шIоу зэрэзэхащэрэ амал­хэр агъэ­федэхэ зэрэхъугъэр, — къытыгъ ­Адыгэ Республикэм экономикэ хэхъоны­гъэм­рэ сатыумрэкIэ и Минис­терствэ.