Республикэм и Росреестрэрэ и Роскадастрэрэ зэхащэрэ консультациехэм мэхьанэшхо яI Адыгеим щыпсэухэрэмкIэ, сыда пIомэ чIыгумрэ амыгъэкощырэ мылъкумрэ япхыгъэ Iофыгъохэм ахэр бэрэ яуталIэх. ГущыIэм пае, зэзэгъыныгъэу зэдашIыхэрэмкIэ тхылъхэм ягъэпсын, кадастрэ учетым псэуалъэр хэгъэуцогъэныр, мылъкур иунае зэрэхъугъэр къэзыу­шыхьатырэ фитыныгъэр гъэунэфыгъэныр ыкIи нэмыкIыбэр.

Амыгъэкощырэ мылъкумкIэ упчIэу нахьыбэрэ къатыхэрэм яджэуапхэм ащыщхэм шъуащыдгъэгъозэн.

БэмышIэу сиунэ стыгъэ. МылъкумкIэ хэбзэIахьыр сымытыным пае сыдэущтэу кадастрэ учетым ар хязгъэтхыкIы­жьыщта?

Учетым ар хябгъэтхыкIыжьыным пае пшъэрылъыбэ зэшIозыхырэ Гупчэм иофисхэм ащыщ горэм зыфэбгъазэмэ хъущт. ЛъэIу тхылъэу кадастрэ учетымкIэ птхыгъэм игъусэн фае кадастрэ инженерым къыгъэхьазырыгъэ актыр е хьыкумым ышIыгъэ унашъоу унэр зэрэщымыIэжьым фэгъэхьыгъэу кIуачIэ зиIэ хъугъэр.

Амыгъэкощырэ мылъкумкIэ реестрэм итхэм техническэ хэу­къоныгъэу ахэхъухьагъэр сыдэущтэу бгъэтэрэзыжьын плъэ­кIыщта?

Ащ фэдэ хэукъоныгъэр агъэтэрэзыжьыным пае о пшъхьэкIэ Гупчэу зигугъу къэтшIыгъэм иофисхэм ащыщ горэм лъэIу тхылъыр IэкIэбгъэхьан фае. АщкIэ Росреестрэм исайт е Роскадастрэм илIыкIохэм яIэпыIэгъу къызфэбгъэфедэн плъэкIыщт.

ЛъэIу тхылъыр заIэкIахьэрэм ыуж IофшIэгъу мэфи 3-м къыкIоцI техническэ хэукъоныгъэр агъэтэрэзыжьыщт.

Техническэ хэукъоныгъэр зэрагъэтэ­рэзыгъэм къыхэкIэу мылъкумкIэ фитыныгъэу цIыфым иIэр зэпыугъэ хъумэ е а фитыныгъэр нэмыкI горэм фэгъэзагъэ зыхъукIэ, хьыкумыр къыхэмыхьэу Iофыр тэрэзэу зэшIохыгъэ хъун ылъэ­кIыщтэп.

Гъэтхапэм и 1-м къыщыублагъэу реестрэ зыкIым къыхэтхыкIыгъэхэмкIэ унэр зыщэрэм фэгъэхьыгъэ къэбарыр бгъэунэфын плъэкIыжьыщтэп. Амыгъэкощырэ мылъкур къэпщэфын фаеу зыхъукIэ зыщэрэмрэ фэтэрымрэ афэгъэхьыгъэ къэбарыр сыдэущтэу бгъэунэфын плъэкIыщта?

Гъэтхапэм и 1-м къыщыублагъэу хэбзэгъэуцугъэу щыIэмкIэ зэхъокIыныгъэ горэхэм кIуачIэ яIэ хъугъэ. Унэр зи­унаем фэгъэхьыгъэ къэбарыр реестрэ зыкIым хэушъхьафыкIыгъэу дэтхагъэ зыхъукIэ ары аIэкIагъэхьан залъэкIыщтыр.

Сыд ишIыкIэу амыгъэкощырэ мылъкур зиунаем фэгъэхьыгъэ къэбарыр къызIэкIэбгъэхьащта?

Реестрэ зыкIым дэтым къыхаригъэтхыкIынэу мылъкур зиунаем уелъэIущт. Ар пстэуми анахь екIолIэкIэ къызэрыкIоу щыт. Унэр зиунаем реестрэм къыхаригъэтхыкIыгъэр щэфакIом регъэлъэгъу. Электрон шIыкIэм тетэуи щэфакIом ар IэкIэбгъэхьан плъэкIыщт.

Нотариусыр къызфэбгъэфедэзэ фэтэрым епхыгъэ къэбарыр реестрэм къыхябгъэтхыкIын плъэкIыщтэп. Ащ пае ищыкIагъэх унэм ищэн-щэфынкIэ пэшIорыгъэшъэу зэзэгъыныгъэ зэрэзэдашIыгъэр къэзыушыхьатырэ тхылъыр.

Къэралыгъо кадастрэ уасэм игъэнэфэнкIэ хэта IофшIэнхэр зыгъэцакIэхэрэр?

Адыгэ Республикэм икъэралыгъо бюджет учреждениеу «Къэралыгъо кадастрэ уасэм игъэнэфэнкIэ Адыгэ рес­публикэ гупчэр» ары IофшIэнхэр зыгъэ­цакIэхэрэр. 2022-рэ илъэсым чIыгу Iахьхэм якъэралыгъо кадастрэ уасэ ­игъэнэфэнкIэ республикэм Iо­ф­шIэнхэр щызэшIуахыгъэх, нэ­ужым къэбарэу къаIэкIэхьагъэр къэралыгъо реестрэ зыкIым рагъэхьагъ.

Сыдигъо къыщегъэ­жьагъэу ащ итхагъэхэм кIуачIэ яIэ хъущта?

Адыгэ Республикэм мылъкум епхыгъэ зэфыщытыкIэхэмкIэ и Комитет иуна­шъоу N 323-р зытетэу 2022-рэ илъэсым Iоныгъом и 19-м къыдэкIыгъэмкIэ чIыгу Iахьхэм якадастрэ уасэ игъэнэфэнкIэ Iофэу агъэцэкIагъэм икIэуххэр къэралыгъо реестрэ зыкIым рагъэхьагъэх. 2023-рэ илъэсым щылэ мазэм и 1-м къыщыублагъэу чIыгупкIэм икъидзэнкIэ ащ къыпкъырыкIыхэзэ ашIыщт.

ЧIыгухэм ягъэфедэн епхыгъэ Iоф­тхьабзэхэмкIэ къэралыгъо фондым хэлъ материалхэр сыдэущтэу къызIэкIэбгъэхьанхэ плъэкIыщта?

Къэралыгъо фэIо-фашIэхэмкIэ порталыр ащкIэ къызфэжъугъэфедэн шъулъэ­кIыщт. Ащ нэмыкIэу лъэIу тхылъыр элек­трон почтэмкIэ filial @01.kadastr.ru е мыщ фэдэ чIыпIэм: Адыгэ Респуб­лик, къ. Мыекъуапэ, ур. Краснооктябрьскэр, 44-м жъугъэхьымэ хъущт. Документхэм япхыгъэ нэмыкI къэбар горэ шъуищыкIагъэ хъумэ мы телефонымкIэ шъутеу: 8 (8772) 59-30-46.