Адыгеим игурыт еджапIэхэм яапшъэрэ классхэр къэзыухыгъэхэм ушэтынхэр къызэранэ­кIыгъэх, республикэ мэхьанэ зиIэ пчыхьэзэхахьэми хэлэжьагъэх.

[caption id="attachment_134970" align="aligncenter" width="800"] А. Гусев[/caption] Узэрыгушхон ныбжьыкIэх

Непэ Адыгеир зэрыгушхон ныбжьыкIэхэр иIэх. ЗыкI къэралыгъо ушэтыныр балли 100-кIэ зытыгъэхэм ягугъу шъхьафэу къэпшIыныр атефэ.

Географиер, литературэр ыкIи химиер нэбгыри 6-мэ дэгъу дэдэу атыгъ. Адыгэ республикэ гимназиер къэзыухырэ Мэрэтыкъо Данэрэ Мыекъопэ гимназиеу N 5-м щеджэгъэ Алина Дрожжинамрэ химиемкIэ шIэныгъэ куухэр къагъэлъэгъуа­гъэх, балли 100 къахьыгъ. Мыекъопэ районым игъэсэныгъэ гупчэу N 4-р къэзыухырэ Людмила Грибенниковам, Мыекъопэ гурыт еджапIэу N 15-м щеджэгъэ Мэри Парсеговам, Тэхъутэмыкъое районым ит къуаджэу АдыгеякIэм дэт гурыт еджапIэу N 27-р къэзыухырэ Эда Акташ ыкIи Мыекъопэ лицееу N 34-м щеджэгъэ Тыгъужъ Аделинэ литературэмкIэ анахь балл иныр къырахыгъ.

Красногвардейскэ районым ит гимназиеу N 1-р къэзыухырэ Дарья Ермаковам, Кощ­хьэблэ районымкIэ гурыт еджапIэу N 9-м икIэлэеджакIоу Юлия Масел, Мыекъопэ гимназиеу N 22-м щеджэгъэ Самера Оджха урысыбзэмкIэ балли 100 къалэжьыгъ.

Джащ фэдэу Мыекъопэ лицееу N 8-р къэзыухырэ Алена Кононовам профильнэ хьисапыр, Джэджэ районым ит гурыт еджапIэу N 1-м щеджэгъэ Алла Абалонскаям обществознаниер дэгъу дэдэу зэратыгъэр мы мафэхэм къэнэфагъ.

Адыгеим икIэлэеджэкIо 11-мэ балли 100 къахьыгъ. ЗэкIэмкIи республикэм медалистэу иIэр 105-рэ. Ау кIэух зэфэхьысыжьхэр ушэтынхэм ауж къэнэфэщтых.

ТиныбжьыкIэхэр шъхьадж зыфэе апшъэрэ еджапIэм чIэ­хьанхэу, ыпэкIи гъэхъагъэхэр ашIыхэзэ ящыIэныгъэ гъогу рыкIонхэу афэтэIо. АщкIэ рес­публикэм амалышIухэр ареты.

[caption id="attachment_134971" align="aligncenter" width="800"] А. Гусев[/caption]

ЕджапIэр къэзыухыгъэхэм ябал

Адыгеим имуниципальнэ образование пстэуми еджапIэхэр къащызыухыгъэ ныбжьыкIэхэр мэкъуогъум и 24-м Мыекъуапэ къырагъэблэгъагъэх. Республикэ балым нэбгырэ мин 1,6-м ехъу хэлэжьагъ. Дахэу гъэкIэрэкIэгъэ ныбжьыкIэхэр якIэлэегъаджэхэр ягъусэхэу алырэгъу плъыжьым къырыкIуагъэх.

Iофтхьабзэр гъэшIэгъонэу, чэфэу кIуагъэ. ЕджапIэр къэзыухыхэрэм янэ-ятэхэм къагъэ­хьазырыгъэ къэгъэлъэгъоным ыуж ныбжьыкIэхэр вальс къе­шIа­гъэх, нэужым адыгэ ыIи урыс лъэпкъ къашъохэр къашIыгъэх.

Адыгэ Республикэм и ЛIышъхьэу КъумпIыл Мурат ныбжьыкIэхэм закъыфигъэзагъ, еджапIэр къызэраухыгъэм ыкIи ныб­­жьыкIэхэм я Мафэ апае къафэгушIуагъ.

— Республикэ балыр ныбжьыкIэхэм я Мафэ зэрэ­тедгъэ­фагъэр ошIэ-дэмышIэу щытэп. Непэ гурыт еджапIэр къэшъоухы, шъуищыIэныгъэ гъогукIэ щешъогъажьэ. Еджа­пIэм гъогу занкIэм шъутырищагъ, сыд фэдэ лъэныкъокIи гъэхъагъэ­хэр шъу­шIынхэм шъуфигъэсагъ. Апэрэ мафэм къы­щегъэжьагъэу кIэлэ­егъаджэхэр шъуигъусэхэу текIоныгъэхэр зэрэшъушIыщтым шъупы­лъыгъ. Непэ нэбгырэ пэпчъ гъэхъагъэхэр иIэх, зым — еджэнымкIэ, адрэм — сэнаущыгъэу хэлъымкIэ, зэкIэми шъу­хъупхъ, — къыIуагъ АР-м и ЛIышъхьэ.

[caption id="attachment_134972" align="aligncenter" width="800"] А. Гусев[/caption]

Сыд фэдэ гъогу къыхахыгъэ­ми, ны-тыхэм, кIэлэегъаджэхэм къараIогъэ гъэсэпэтхыдэхэр ащымыгъупшэнхэу, пшъэдэкIыжь ахьэу, яунэгъо шэн-хабзэхэр амыукъохэу, лъэпкъыбэ зыщы­псэурэ хэгъэгум итарихъ ыкIи икультурэ шъхьэкIафэ афашIэу псэунхэу АР-м и ЛIышъхьэ ныбжьыкIэхэм къафэлъэIуагъ.

— Непэ Урысыер чIыпIэ къин ит. Мэхьанэшхо зиIэ лъэныкъо­хэмкIэ тызэкъотын фае. Типрезидентэу Владимир Путиным иунашъохэм адед­гъэ­штэн, тидзэ­къулы­къушIэхэм такъотын фае. Джащыгъум сыд фэдэрэ къиныгъуи зэ­пыт­чын тлъэкIыщт, тихэгъэгу джыри нахь лъэш хъущт. Ар зыщы­шъумыгъэгъупш. Лъэгэ­пIэ инхэм шъуанэсынэу, Адыгеим, Урысыем ацIэ дахэкIэ ряжъугъэIонэу шъуфэсэIо. Гъогу мафэ шъутехь, — къыIуагъ КъумпIыл Мурат.

Пчыхьэзэхахьэр концерткIэ лъагъэкIотагъ, артист цIэрыIоу къырагъэблэгъагъэхэм ныбжьыкIэхэр ягъусэхэу орэдхэр къа­Iуагъэх. Шоу-купэу «Шпаргалка», кавер-купэу «Burmister Band», орэдыIохэу Нэфышъ Рустам ыкIи ANDRO къэзэрэугъоигъэ­хэр агъэчэфыгъэх. МэфэкI мэ­шIоустхъукIэ зэхахьэр аухыгъ.

ДЕЛЭКЪО Анет.