Урысые Iофтхьабзэу «ЩыIэныгъэм екIурэ лъэбэкъу минипшI» зыфиIорэм Мыекъуапэ хэлэжьагъ.

Ащ кIэщакIо фэхъугъэх АР-м и Олимпийскэ совет, Мыекъуапэ физическэ культурэмкIэ ыкIи спортымкIэ и Комитет, шIушIэ фондэу «Лъэпкъ псауныгъэм и Лиг» зыфиIорэр.

Iофтхьабзэм цIыфыбэ зэрищэ­лIагъ. Республикэм икъэлэ шъхьа­Iэ игупчэу «Зэкъошныгъэм» дэжь щырагъажьи арт-псэуалъэу «Мы­Iэрыс» зыфиIорэм нэс нэбгырэ 242-рэ кIуагъэ. Мыекъуапэ имызакъоу шъолъырым инэмыкI муниципалитетхэми ахэр къа­рыкIыгъэх. АР-м и Олимпийскэ со­вет къыгъэхьазырыгъэ бгъэхэлъхьэ номерхэр ыкIи быракъ цIыкIухэр нэбгырэ пэпчъ ратыгъэх.

Зипсауныгъэ зыгъэпытэн гу­хэлъ зиIэхэр урамхэу Пионерскэм, Советскэм, Краснооктябрьскэм, Пушкиным ыкIи Гагариным ацIэ зыхьыхэрэм къарыкIуагъэх. Ащ ыуж республикэ стадионэу «Зэкъошныгъэм» къекIолIагъэх ыкIи къэлэ паркым Iофтхьабзэр щызэфашIыжьыгъ. Нэбгырэ пэпчъ километри 7-м щегъэжьагъэу 8-м нэс къыкIугъ, ар лъэбэкъу минипшI мэхъу. КIэухым нэсыгъэхэм зэкIэми дипломхэр афагъэшъошагъэх.

— Мы Iофтхьабзэр ятIонэрэу республикэм икъэлэ шъхьаIэ щызэхэтщагъ. Гуфэбагъэ хэлъэу ащ хэлэжьэрэ цIыфхэм тапэгъо­кIы, арын фае ахэм япчъагъэ зыкIабэр. Мыщ фэдэ зэхахьэ- хэм яшIуагъэкIэ унагъохэр зэ­рэугъоих ыкIи шIуагъэ къытэу яуахътэ агъакIо, ащ дакIоу япсау­ныгъи агъэпытэ, — къыIуагъ Мыекъуа­пэ физическэ культурэмкIэ ыкIи спортымкIэ и Комитет иметодистэу Бзаго Рустам.

Мыекъуапэ икIи, лъэсэу Кощхьаблэ нэсыгъ

Мы Iофтхьабзэм къыдыхэ­лъытагъэу республикэм икъэлэ шъхьаIэ щыпсэурэ Псеун Назир лъэсэу Мые­къуапэ икIи, икъоджэ гупсэу Кощхьаблэ нэсыгъ.

Хъулъфыгъэр чэщым сыхьатыр 2-м игъогу техьагъ, мафэм сы­хьатыр 14.30-м Кощхьаблэ нэ­сыгъ. Зыгъэпсэфыгъо уахътэхэр къыхафэзэ километрэ 55-рэ зэ­рылъ гъогум сыхьат 12-м ехъу тыригъэкIодагъ.

Мыекъуапэ икIынышъ, Кощ­хьа­блэ нэсыным изыфэгъэ­хьазырын хъулъфыгъэм илъэситIукIэ узэ­кIэIэбэжьмэ ри­гъэжьагъ.