Адыгэ Республикэм социальнэ-IофшIэн зэфыщытыкIэхэмкIэ илъэны­къуищ комиссие зэхэсыгъо иIагъ. Ар зэрищагъ АР-м иминистрэхэм я Каби­нет и Тхьаматэу КIэрэщэ Анзаур.

[caption id="attachment_134942" align="aligncenter" width="800"] А. Iэшъын.[/caption]

Пэублэм зэнэкъокъоу «Iоф­шIэныр къэухъумэгъэнымкIэ организацие анахь дэгъу» зыфиIоу 2022-рэ илъэсым зэхащэгъагъэм текIоныгъэр къыщыдэзыхыгъэхэм афэгушIуагъэх ыкIи шIухьафтынхэр аратыжьыгъэх.

Илъэс 20 хъугъэу мы зэнэ­къокъур Адыгеим щызэхащэ. IофшIэныр щынэгъончъэным, IофшIапIэхэм цIыфхэм шъобж ащытещагъэ мыхъуным иамал­хэр IофшIэн языгъэгъотыхэрэр нахьышIоу лъыплъэнхэм ар фы­тегъэпсыхьагъ.

СатыушIыным епхыгъэ организациехэмкIэ апэрэ чIыпIэр къыдэзыхыгъэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтара» зыфиIорэр ары. Ащ игъэ­цэкIэкIо пащэу Сергей Пого­диным шIухьафтынэу сомэ мин 15-рэ дипломрэ фагъэшъо­шагъэх.

ЯтIонэрэ ыкIи ящэнэрэ чIыпIэхэр къырахыгъэх пшъэдэ­кIыжьэу ахьырэмкIэ гъунэпкъэ гъэнэфагъэ зиIэ обществэхэу «Зеленый дом» ыкIи «Питейный дом» зыфиIохэрэм.

Мы сатыу организациехэмкIэ апэрэ чIыпIэр фагъэшъошагъ цIыфхэм ясоциальнэ фэIо-фа­шIэхэр зыгъэцэкIэрэ зэхэубытэгъэ гупчэу Шэуджэн районым щыIэм (пащэр ГутIэ Зар). Джащ фэдэу ащ шIухьафтынэу сомэ мин 15-рэ дипломрэ ратыжьыгъэх.

ЯтIонэрэ чIыпIэр къыхьыгъ цIыфхэм ясоциальнэ фэIо-фа­шIэхэр зыгъэцэкIэрэ зэхэубытэгъэ гупчэу Мыекъопэ районым щыIэм, ящэнэрэ хъугъэ Джэджэ гурыт еджапIэу N 9-р.

[caption id="attachment_134943" align="aligncenter" width="800"] А. Iэшъын.[/caption]

Предпринимательхэм ясообществэ хэушъхьафыкIыгъэ дзэ операцием хэлажьэхэрэм IэпыIэгъу зэрафэхъурэм къытегущыIагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч. Ащ къызэриIуагъэмкIэ, хэушъхьафыкIыгъэ дзэ операциер къызежьагъэм щыублагъэу УФ-м и Президентрэ АР-м и ЛIышъхьэрэ унашъоу ашIыгъэхэм къапкъырыкIыхэзэ операцием хэлажьэхэрэм ыкIи ахэм яунагъохэм IэпыIэгъу афэхъух. ХэушъхьафыкIыгъэ дзэ операцием хэлажьэхэрэм зэтыгъоу сомэ мини 100 зырыз (нэбгырэ 1527-мэ сомэ миллион 152,7-рэ аратыгъ) афатIупщы. УIагъэ зытещагъэхэм зэтыгъоу сомэ мин 500 зырыз, хэкIодагъэхэм яунагъохэм зэтыгъоу сомэ миллион, ахэм ясабыйхэм зэтыгъоу сомэ мин 20 зырыз араты. Ащ нэмыкIэу хэушъхьафыкIыгъэ дзэ операцием хэлажьэхэрэм ыкIи ахэм яунагъохэм ыпкIэ зыхэмылъ юридическэ IэпыIэгъу арагъэгъоты, социальнэ фэIо-фашIэхэр афагъэцакIэх. 2022-рэ илъэсым хэушъхьэфыкIыгъэ дзэ операцием хэлажьэхэрэм IэпыIэгъу афэхъугъэнымкIэ республикэ бюджетым сомэ миллион 281,6-рэ къытIупщыгъ. Муниципальнэ образованиехэм зэкIэми Iоф­шIэкIо купхэр ащызэхащагъэхэу хэушъхьафыкIыгъэ дзэ операцием хэлажьэхэрэм адеIэх ыкIи ахэм яунагъохэм яфэIо-фашIэ­хэр афагъэцакIэх.

— КъыдгурэIо республикэ бюджетым изакъокIэ хэушъхьафыкIыгъэ дзэ операцием хэла­жьэхэрэм алъэныкъокIэ пшъэ­рылъэу къэуцухэрэм язэшIохын къин зэрэхъущтыгъэр. Мыр зы­щырагъэжьэгъэ апэрэ мафэм къыщыублагъэу общественнэ ыкIи волонтер организациехэр, шIушIэ фондхэр IэпыIэгъушхо къытфэхъух. Ахэм IэпыIэгъур къаугъои ыкIи тидзэкIолIхэм афащэ. ШIушIэ IэпыIэгъум хэлажьэхэрэм ыкIи дзэ подразделениехэм шIуагъэ къэзытырэ Iофышхо агъэцакIэ. Граждан обществэм, джащ фэдэу предпринимательхэм сафэраз, — къыIуагъ Мырзэ Джанбэч.

IофшIэн зэфыщытыкIэхэр шапхъэхэм адиштэнхэм ыкIи IофшIэнымкIэ хэбзэгъэуцугъэр республикэм зэрэщагъэцакIэрэм фэгъэхьыгъэу къэгущыIагъ Iоф­шIэнымкIэ ыкIи социальнэ хэ­хъоныгъэмкIэ министрэм иапэрэ гуадзэу Ирина Ширинар. Ащ къызэриIуагъэмкIэ, предприя­тиехэм аIут нэбгырэ 3744-мэ япсауныгъэ зэрар езыхын зы­лъэкIыщт IофшIэн агъэцакIэ. Ахэм компенсациехэр къэралыгъом къареты: ыпкIэ зыхэлъ зыгъэпсэфыгъо мэфэ тедзэхэр къафыхагъахъо, Iоф зэрашIэрэ сыхьат пчъагъэр афагъэкIэкIы, лэжьапкIэр хэгъэхъуагъэу араты. 2022-рэ илъэсым IофшIапIэм щыIэхэу шъобж зытещагъэ хъу­гъэхэм япчъагъэ фэди 1,5-кIэ нахь макIэ хъугъэ. Мы уахътэм къыриубытэу хъугъэ-шIэгъэ 50 агъэунэфыгъ, нэбгыри 3-мэ ядунай ахъожьыгъ, 8-мэ шъобж­хэр атещагъэхэ хъугъэ.

IофшIапIэхэм фыкъоныгъэхэр къащымыгъэхъугъэнхэм, Iоф­шIэнымкIэ хэбзэгъэуцугъэхэр, шапхъэхэр амыукъонхэм афэшI АР-м IофшIэнымкIэ и Къэралыгъо инспекцие иинспекторхэм нэбгырэ 10076-рэ зыщылэжьэрэ организацие 396-рэ ауплъэ­кIугъ, ахэм япроцент 25,2-мэ хэукъо­ныгъэхэр къащыхагъэ­щыгъэх.

Мырзэ Джанбэч къызэрэхигъэщыгъэмкIэ, республикэм IофшIэныр щынэгъончъэу щызэхэщэгъэным ыкIи фыкъоныгъэхэр нахь макIэ шIыгъэнхэм япхыгъэ IофшIэныр щыгъэлъэшыгъэныр Адыгеим и ЛIышъхьэу КъумпIыл Мурат пшъэрылъэу къафигъэуцугъ.

Iофтхьабзэм хэлэжьагъэхэм къызэраIуагъэмкIэ, гумэкIыгъоу къэуцухэрэр икъоу зэшIохыгъэхэ зыхъукIэ, хэбзэIахьэу ыкIи страховой тынэу къаугъоихэрэм ахэхъощт, республикэ бюджетым къихьэрэ ахъщэри нахьыбэщт. Ащ ишIуагъэкIэ экономикэмкIэ ыкIи социальнэ лъэныкъомкIэ пшъэрылъэу щытхэр зэрифэ­шъуашэу зэшIохыгъэхэ хъущт.

КIАРЭ Фатим.