НыбжьыкIэхэр кIэлэцIыкIухэм адеIэщтых
Урысые общественнэ организациеу «Урысыем иныбжьыкIэхэм я Союз» зыфиIорэм и Адыгэ шъолъыр организацие Адыгэ Республикэм ныбжьыкIэ IофхэмкIэ и Комитет игъусэу зэхащэгъэ штабым Геническэ районым ис кIэлэцIыкIухэм шIушIэ IэпыIэгъу ятыгъэнымкIэ пкъыгъо зэфэшъхьафхэм яугъоин Мыекъуапэ щиублагъ.
Организацием къызэритыгъэмкIэ, Урысыем иныбжьыкIэхэм я Союз и Адыгэ шъолъыр организацие иштаб IэпыIэгъур щаугъоищт. ЧIыпIэу зыдэщыIэр: урамэу Карл Маркс ыцIэкIэ щытым тет унэу N 33-р (мэкъуогъум и 24 — 30-м пчэдыжьым сыхьатыр 9-м къыщыублагъэу пчыхьэм 5-м нэс).
Мы Iофтхьабзэм хэлажьэ зышIоигъо пстэуми шIушIэ IэпыIэгъум къыдилъытэрэ мыщ фэдэ пкъыгъохэр къырахьылIэхэмэ хъущт: кIэлэцIыкIу шхынхэр, сабыйхэм ягъэкъэбзэнкIэ пкъыгъохэр, чыхIэн-пIэтехъохэр, къэбзэныгъэмкIэ къашъхьэпэщтхэ, джащ фэдэу кIэлэцIыкIу канцеляр пкъыгъохэр.
Шъугу къэтэгъэкIыжьы: Адыгеим Херсон хэкум и Геническэ район ынаIэ тыригъэтынэу зызкIыфигъэзагъэр а чIыпIэм хэхъоныгъэ егъэшIыгъэнымкIэ ыкIи зыпкъ игъэуцожьыгъэнымкIэ ишIуагъэ ригъэкIыным пай. Адыгеим и ЛIышъхьэу КъумпIыл Мурат пэщэныгъэ дызэрихьэзэ Iофтхьабзэхэр зэшIуахых.