АР-м и Къэралыгъо Совет — Хасэм я XXV-рэ зэхэсыгъо тыгъуасэ иIагъ.

АР-м и Правительствэ хэтхэр, федеральнэ ыкIи респуб­ликэ къулыкъу зэфэшъхьафхэм, муниципальнэ образованиехэм ялIыкIохэр, нэмыкIхэр ащ хэлэ­жьагъэх. Зэхэсыгъор зэрищагъ республикэ Парламентым и Тхьаматэу Владимир Нарожнэм.

Лъэныкъо зэфэшъхьафхэм афэгъэхьыгъэу Iоф 40-м ехъу повесткэм щыгъэнэфэгъагъ, «Правительственнэ сыхьатыр» ахэм ащыщыгъ. Ветеринари­емкIэ федеральнэ къэралыгъо къэбарлъыгъэIэс системэм иIахьхэм ащыщэу «Хорриот» зыфиIорэр Адыгеим зэрэщагъэ­федэщтым ар фэгъэхьыгъагъ. Ащ къытегущыIагъ АР-м ветеринариемкIэ и ГъэIорышIапIэ ипащэу Къушъхьэ Анзор.

Ащ къызэриIуагъэмкIэ, ветеринариемкIэ федеральнэ къэралыгъо къэбарлъыгъэIэс системэр (ВетИС) псэушъхьэхэм цIыфым зэрар къыфамыхьыным, джащ фэдэу цIыфхэм псэушъхьэхэм яягъэ арамыгъэ­кIыным, тыкъэзыуцухьэрэ дунаир къэбзэным, былымхъуным пылъхэм продукциеу къыдагъэ­кIырэр щынэгъончъэным афэшI агъэпсыгъ, федеральнэ къулыкъухэр, шъолъырхэм яхэбзэ гъэцэкIэкIо органхэр ыкIи гъомылэпхъэшIхэр къыхэлажьэхэзэ Iоф ешIэ. Псэушъхьэхэм ятхын, якъэлъытэн, алъыплъэгъэным афытегъэпсыхьэгъэ компонентхэм ащыщ «Хорриотыр». Учет шIыгъэн фэе псэушъхьэхэм яспискэу УФ-м мэкъу-мэщымкIэ и Министерствэ ыштагъэм ха­хьэхэрэм афэгъэхьыгъэ къэбарым иугъоин ар зыфэгъэ­загъэр.

Джащ фэдэу федеральнэ хэбзэгъэуцугъэхэм адиштэнхэм фэшI республикэ хэбзэгъэуцугъэхэм гъэтэрэзыжьынхэр афа­шIыгъэх. Ащ фэдэу аштагъэхэм ащыщ илъэс 14 — 16 зыныбжь­хэм къэзэрэщэнхэм ифитыныгъэ ятыгъэным фэгъэхьыгъэр. Мы хэбзэгъэуцугъэр ыгъэфедэ шIоигъоу лъэIу тхылъ зытыщтхэр илъэситфым нахь мымакIэу Адыгеим щыпсэугъэнхэ фаеу ащ къыщеIо. ЦIыфыбэ зыхэлэжьэрэ Iоф­тхьабзэхэм язэхэщэн фэгъэ­хьыгъэ хэбзэгъэуцугъэм чIыпIэу зэ­IукIэхэр, зэхахьэхэр, демонстрациехэр, нэмыкIхэр зыщыкIо мыхъущтхэр щыгъэнэфагъэх. Ащ къызэрэщиIорэмкIэ, республикэ мэхьанэ зиIэ автомобиль гъогухэм, муниципальнэ образо­ваниехэр зэзыпхыхэрэм, мэшIоку ыкIи автомобиль вокзалэу Мыекъуапэ дэтхэм ягупчэхэм ащ фэдэ Iофтхьабзэхэр ащызэхэпщэнхэ уфитэп.

Ащ нэмыкIэу 2023-рэ илъэсымкIэ республикэ бюджетыр, шIокI зимыIэ медицинэ страхованиемкIэ АР-м и Фонд ибюджет гъэцэкIагъэ зэрэхъухэрэм, хъарзынэщхэм яIофхэм, къолъхьэ тын-Iыхыным пэшIуекIогъэным, муниципальнэ образованиехэм ядепутатхэм яхэдзынхэм, социальнэ фэIо-фашIэхэм ягъэцэкIэн, чIыпIэ зыгъэIоры­шIэжьыпIэхэм, административнэ хэукъоныгъэхэм, шъон пытэ е наркотик зыгъэфедагъэхэм IэпыIэгъу язытыщт организациехэм ягъэпсын, нэмыкIхэм афэ­гъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм фэгъэхьыгъэ законхэр, за­конопроектхэр апэрэ ыкIи ятIонэрэ еджэгъумкIэ аштагъэх.

Джащ фэдэу Александр Деревянченкэр Джэджэ районым изэгъэшIужь хьыкум участкэу N-у 2-м ихьыкумышIэу гъэнэфэгъэным тегущыIэхи, дырагъэштагъ.