Сэтэнае идышъэ Iудан
2018-рэ илъэсым мэкъуогъум и 23-м къыщегъэжьагъэу адыгэ бзылъфыгъэм е IэпэIасэу Сэтэнае и Мафэ республикэм щыхагъэунэфыкIы.
[caption id="attachment_134877" align="aligncenter" width="800"] А. Iэшъын.[/caption]
Мы мафэм ехъулIэу АР-м лъэпкъ культурэмкIэ и Гупчэ АР-м культурэмкIэ и Министерствэ иIэпыIэгъоу «Адыгэхэм ядышъэид» зыфиIорэ Iофтхьэбзэ гъэшIэгъоныр зэхащагъ. Бзылъфыгъэ IэпэIасэхэр республикэм и Лъэпкъ музей щызэIукIагъэх.
Адыгэ лъэпкъ культурэм, IэпэIэсэныгъэу лъэпкъым хэлъыгъэхэм, анахьэу дышъэидэным зыкъегъэIэтыжьыгъэныр, ныбжьыкIэу ар зышIогъэшIэгъонхэм япчъагъэ хэгъэхъогъэныр ары пшъэрылъ шъхьаIэу зэхэщакIохэм зыфагъэуцужьырэр.
АР-м культурэмкIэ иминистрэу Аулъэ Юрэ Iофтхьабзэр къызэIуихыгъ. Ащ къызэриIуагъэмкIэ, ныбжьыкIэхэм якультурэ ибаиныгъэ ашIэнымкIэ, ижъырэ шэн-хабзэхэр ащымыгъупшэнхэмкIэ мыщ фэдэ Iофтхьабзэхэм мэхьанэшхо яI. Адыгэ пшъашъэм лъэпкъ шэн-хабзэхэр къызэриухъумэхэрэр, нарт пшъашъэу Сэтэнае ищысэшIухэр щыIэныгъэм зэрэщылъыкIуатэхэрэр мыщ къыдыхэлъытагъэх. МэфэкI мафэмкIэ къэзэрэугъоигъэхэм ар къафэгушIуагъ ыкIи лъэпкъ культурэм епхыгъэ Iофтхьабзэу зэхащэхэрэм ягуапэу зэрэхэлэжьэщтхэр къыIуагъ.
Нэужым Лъэпкъ музеим ипащэу Джыгунэ Фатимэ, проектым икIэщакIохэу Анцокъо Фатимэрэ Гумэ Ларисэрэ гущыIэ аратыгъ.
Iофтхьабзэм къыдыхэлъытагъэу Краснодар краим, Къэрэщэе-Щэрджэсым ыкIи Къэбэртэе-Бэлъкъар Республикэм, Москва ащыщхэу дышъэидэмкIэ IэпэIасэхэр зыхэлэжьэгъэ арт-композициер къызэIуахыгъ.
Мы проектыр зигукъэкIыр бзылъфыгъэ IэпэIасэу, дышъэидэнымкIэ гъэхъагъэхэр зиIэу Гумэ Ларис.
— Адыгеим имызакъоу, гъунэгъу шъолъырхэр къызэрэхэлэжьагъэхэр тигуапэ хъугъэ. Адыгэхэм я Нарт эпос щыцIэрыIо пшъашъэу Сэтэнае исурэт тштагъэ, чIыпIэ зэфэшъхьафхэм ащыщ IэпэIасэхэм хадыкIыгъэ пкъыгъохэмкIэ ар дгъэкIэрэкIагъэ. ЗэкIэмкIи пкъыгъо 50 хэхьагъ. Тхьамафэрэ ар Лъэпкъ музеим чIэтыщт, нэужым АР-м лъэпкъ культурэмкIэ и Гупчэ ащэжьыщт. IэпыIэгъу къытфэхъугъэхэм зэкIэми лъэшэу тафэраз. КъыткIэхъухьэрэ ныбжьыкIэхэм дышъэидэныр зэрашIогъэшIэгъоныр лъэшэу тигуап, — къыIуагъ Ларисэ.
КIэухым проектым ишIын зиIахьышIу хэзылъхьагъэхэм щытхъу тхылъхэр афагъэшъошагъэх. Нэужым дышъэидэнымкIэ мастер- класс къагъэлъэгъуагъ.
ДЕЛЭКЪО Анет.