Неущрэ мафэр зыIэ илъхэу, республикэм, къэралыгъом, дунаим хэхъоныгъэхэр ашIынымкIэ зыщыгугъыхэрэ ныбжьыкIэхэм я Мафэ шэмбэтым хагъэунэфыкIы.

[caption id="attachment_134873" align="aligncenter" width="800"] Мыгу Бислъан ихъарзынэщ.[/caption]

ТиреспубликэкIэ ныбжьыкIэ чанэу, яшIэныгъэхэмкIи, ягъэ­псыкIэкIи, язекIокIэ-шIыкIэхэм-кIи къахэщэу макIэп тиIэр. Ахэм ащыщыбэ ныбжьыкIэхэм я Урысые Союз и Адыгэ шъо-­ лъыр организацие хэтых. Ащ ипащэу Мыгу Бислъан мы ма­фэхэм гущыIэгъу тыфэхъугъ, Iофтхьабзэу зэхащэхэрэм тащигъэгъозагъ.

— Илъэси 7 хъугъэ тиорганизацие зызэхащагъэр. Лъэ­ныкъо зэфэшъхьафхэмкIэ рес­публикэм ис ныбжьыкIэхэм зыкъагъэлъэгъон, щыIэныгъэм чанэу хэлэжьэнхэ, Iофтхьэбзэ зэфэшъхьафхэм ахэтынхэ, цIыф­хэм яшIуагъэ арагъэкIын амал яI. Непэрэ мафэм нэбгырэ 1400-рэ ащ хэт, янахьыбэр студентых, джащ фэдэу муниципальнэ образовании 8-мэ ар ащызэхэтщагъ. Къэралыгъо ушэтынхэм тиныбжьыкIэхэр об­щественнэ лъыплъакIохэу ахэтыгъэх, ахэм шапхъэу щыIэхэр ашIэхэу, рагъэджагъэхэу щытыгъэх, япшъэрылъхэр дэгъоу агъэцэкIагъэх. Ащ нэмыкIэу шIушIэ Iофтхьабзэхэм ренэу тахэлажьэ. Анахь тызэрыгу­шхорэр «Адыгеим иныбжьыкIэхэр» зыфиIорэ форумыр гъатхэм зэрэзэхэтщагъэр ары. АР-м и Къэралыгъо Совет — Хасэм, АР-м IофшIэнымрэ социальнэ хэхъоныгъэмрэкIэ и Министерствэ, АР-м гъэсэныгъэмрэ шIэныгъэмрэкIэ и Министерствэ, апшъэрэ еджапIэхэр IэпыIэгъу къытфэхъугъэх. Республикэм игурыт еджапIэхэм якIэлэеджэкIо, техникум­хэм, колледжхэм, университетхэм ястудент 500-м ехъу, Iоф зышIэрэ ныбжьыкIэхэр, ныбжьыкIэ объединениехэмрэ общественнэ организациехэмрэ форумым хэлэжьагъэх, — еIо Мыгу Бислъан.

Мы мафэм ныбжьыкIэхэм лъэныкъо 12-мкIэ яшIэныгъэхэм ахагъэхъон амал яIагъ. ГущыIэм пае, «политик ныбжьыкI» зыфиIорэр анахь ашIогъэшIэгъоныгъ. Щысэ зытепхын плъэкIыщт хэбзэ къулыкъушIэхэр, депутатхэр Iофтхьабзэм къы­рагъэблэгъагъэх, зэдэгущыIэгъу гъэшIэгъонхэр афызэха­щагъэх, зыгъэгумэкIырэ упчIэ­хэм яджэуапхэр аратыжьыгъэх. Джащ фэдэу «предприниматель ныбжьыкI», «студенческэ самоуправлениер» ыкIи нэмыкI лъэ­ныкъохэм афэгъэхьыгъэу Iоф ашIагъ.

НыбжьыкIэхэм я Союз ишъо­лъыр къутамэ хэтхэм дунэе хъытыур чанэу къызфагъэфедэ. Iофтхьабзэу зэхащэхэрэр ащ къырагъахьэх. ШIоигъоныгъэ зиIэхэм онлайн шIыкIэм тетэу анкетэр агъэхьазыры, зыпхырыкIыхэкIэ, макъэ арагъэIу ыкIи мэфэкI шIыкIэм тетэу организацием хагъахьэх. Хабзэу яIэм тетэу, зыфэдэ къэмыхъугъэ коктейлэу зэхашIыхьэрэм ра­гъа­шъо ыкIи ныбжьыкIэхэм я Урысые Союз ибгъэхалъхьэ раты.

Федеральнэ программэхэмрэ республикэм и Правительствэ къаритырэ IэпыIэгъумрэ яшIуагъэкIэ Адыгеим иныбжьыкIэхэм социальнэ мэхьанэ зиIэ Iофтхьабзэхэм ягъэцэкIэнкIэ амалэу яIэр илъэс къэс нахьыбэ мэхъу.

БэмышIэу студенческэ активэу «Фыщт» зыфиIорэм иурысые еджапIэ зэхэщэгъэнымкIэ грант къахьыгъ. Урысыем ичIыпIэ зэфэшъхьафхэм къарыкIыщт ныбжьыкIэхэм зе­кIон афызэхащэщт. Джащ фэдэу Адыгэ Республикэм и ЛIышъхьэу КъумпIыл Мурат игукъэкIыкIэ илъэс къэс зэхащэрэ ныбжьыкIэ сэнаущхэм язэхахьэу «Фыщт» чанэу хэлэжьэщтых.

НыбжьыкIэхэм яорганизацие хэтхэр зэнэкъокъухэзэ, анахь дэгъоу зыкъагъэлъэгъоным пы­лъых, нэбгырэ пэпчъ проектхэм япащэ хъунхэу фаех. Пшъэ­дэкIыжь яIэу Iофтхьабзэхэм яшъыпкъэу ахэлажьэх, цIыфхэм Iоф адашIэныр, коллективхэм дэгъоу ахэзэгъэнхэр апэрэ мафэм къыщегъэжьагъэу ахалъхьэ. Зы унагъом фэдэу зэдеIэжьых.

— Зыпари егъэзыгъэкIэ тиорганизацие хэдгъахьэрэп, ежьхэр фаехэу, ашIогъэшIэгъо­нэу къытфэкIох ыкIи сыд фэдэ Iофыгъо зэхэтэщэми, чанэу къыткъоуцох. КъэIогъэн фае IофшIэпIэ чIыпIэ языгъэгъоты­хэрэр бэрэ къызэрэтэуалIэ­хэрэр. Непэрэ мафэр пштэмэ ти Союз хэтыгъэ нэбгырэ пчъа­гъэмэ республикэм имызакъоу, къэлэшхохэми щытху хэлъэу Iоф ащашIэ, ащ тегъэгушхо, — еIо тигущыIэгъу.

[caption id="attachment_134874" align="aligncenter" width="800"] Мыгу Бислъан ихъарзынэщ.[/caption]

НыбжьыкIэхэм я Урысые Союз и Адыгэ шъолъыр организацие нэбгыри 7 апэрэ ма­фэм къыщегъэжьагъэу хэтхэу, нахьыкIэхэр япхыгъэхэу агъа­сэх. Ежь Бислъан мыщ зэри­пащэм имызакъоу, АР-м гъэ­сэныгъэмрэ шIэныгъэмрэкIэ и Министерствэ епхыгъэ ресурс ныбжьыкIэ Гупчэми ипащ. Илъэ­ситIу хъугъэу экстремизмэм, терроризмэм къыткIэхъухьэрэ ныбжьыкIэхэр ащыухъумэгъэнхэм фэгъэхьыгъэ Iофтхьабзэхэм язэхэщэнкIэ пшъэ­рылъ гъэнэфагъэхэр иIэх.

Республикэм хэхъоныгъэ ышIынымкIэ ныбжьыкIэ дви­жением мэхьанэшхо иI.

Пандемием илъэхъан гуфакIохэм яшъып­къэу Iоф ашIагъ. Адыгеим иныбжьыкIэхэр чанэу волонтер Iофтхьабзэхэм ахэ­лэжьагъэх, шъо­лъыр «плъыжь­хэм» ащыIэ врач­хэм IэпыIэгъу афэхъугъэх, кол-гупчэхэм яшъыпкъэу Iоф ащашIагъ, ащ нэмыкIэу, мэзи­тIум ехъурэ пчэдыжьым жьэу рагъажьэзэ чэщым сыхьатыр 12-м нэс гъомылэпхъэ Iалъмэкъ­хэр агъэхьазырыгъагъэх. Ащ дэжьым Iахь мин 72-рэ ашIыгъагъ.

— Къыхэзгъэщымэ сшIоигъу АР-м и ЛIышъхьэу КъумпIыл Мурат тиорганизацие уасэ къы­фишIэу, сыд фэдэ Iофыгъо едгъэжьагъэми, IэпыIэгъу тигъэгъотэу зэрэщытыр, ащкIэ лъэшэу тыфэраз. ТиIофшIэн ыпэкIэ лъыдгъэкIотэнымкIэ кIуачIэ къытхелъхьэ, — еIо Бислъан.

НыбжьыкIэ организацием къыхахьэхэрэм япчъагъэ илъэс къэс хэхъо. НэмыкI шъолъырхэм къарыкIыгъэу республикэм щыпсэурэ ныбжьыкIэхэр щы­Iэныгъэм хэгъозэнхэмкIэ ащ ишIуагъэ къэкIо. Зы унагъом фэдэу зэхэтых. Ялэгъухэм ящы­сэтехыпIэх, дахэкIэ къахэщых. Адыгеим хэхъоныгъэ ышIыным яшъыпкъэу ахэр дэлажьэх.

НыбжьыкIэхэм я Урысые Союз и Адыгэ шъолъыр организацие мэфэкIым чанэу пэ­гъокIы. АР-м спортымкIэ и Комитет игъусэу бэмышIэу къы­зэIуахыгъэ скейт паркым зэнэкъокъу гъэшIэгъон щызэхащэщт. Анахь къахэщырэ ныбжьыкIэхэр Пушкиным и Унэ щагъэшIощтых.

КъыткIэхъухьэрэ ныбжьыкIэ­хэм дунэееплъыкIэ тэрэз яIэнымкIэ, шэн дэйхэр къахэмы­фэнхэмкIэ, бзэджашIэхэм ахэмыхьанхэмкIэ мыщ фэдэ орга­низациехэм яIофшIэн мэхьанэшхо иI. ЫпэкIи яIофшIэн лъагъэ­кIотэнэу, ныбжьыкIэ ча­нэу ти­Iэхэм ахэхъонэу тэгугъэ.

ДЕЛЭКЪО Анет.