КIалэхэу ыкIи пшъашъэхэу лъытэныгъэ зыфэтшIыхэрэр!
НыбжьыкIэхэм я Мафэ фэшI тышъуфэгушIо!
НыбжьыкIэгъур — цIыфым теубытагъэ зыхэлъ гухэлъхэр зыщишIыхэрэ, гъэхъэгъакIэхэм къафэкIоным ыуж зыщихьэрэ, щыIэныгъэм гъогоу щыхищыщтым зыщылъыхъурэ лъэхъанэу щыт. А уахътэр ары шIэныгъэхэр къызызIэкIигъахьэрэр, обществэм изы Iахьэу зэрэщытыр къыгурыIонэу зыригъажьэрэр, гушъхьэлэжь ыкIи цIыфыгъэ шапхъэхэр нахь пкъырыхьэхэу зиублэрэр. Адыгэ Республикэм ыкIуачIи изытети бэкIэ ялъытыгъ ныбжьыкIэхэм экономикэмкIэ, политикэмкIэ, социальнэ ыкIи нэмыкI лъэныкъохэмкIэ чаныгъэу къызхагъафэрэм. Арышъ, лIэужхэм язэпхыныгъэ гъэпытэгъэным, ныбжьыкIэхэр акIуачIэ нахь щыгугъыжьынхэм, гъэсэныгъэ дэгъу зэрагъэгъотыным, ясэнаущыгъэ зыкъызэIуихыным тынаIэ нахь атедгъэтын фае. Непэ Адыгэ Республикэм ныбжьыкIэхэм яхэхъоныгъэкIэ, яшIэныгъэ джыри нахь зиушъоумбгъунымкIэ амалыбэ иI: Адыгеим имыкIхэу ахэм сэнэхьат зэрагъэгъотын, обществэм федэ къыфахьын, социальнэ къулайныгъэхэр агъэпытэн, волонтер движением хэлэжьэн, япсауныгъэ агъэпытэн, джырэ лъэхъаным диштэрэ спорт псэуалъэхэр къызфагъэфедэхэзэ спортымкIэ гъэхъагъэхэр ашIын, предпринимательст- вэм ылъэныкъокIэ ямурадхэр пхыращынхэ алъэкIыщт. ТапэкIи ныбжьыкIэхэм ящыIэныгъэ илъэныкъо зэфэшъхьафхэр къызэдыхиубытэхэу ягухэлъхэр къадэхъунхэмкIэ, щыIэныгъэм яфэшъошэ чIыпIэ щаубытынымкIэ тфэлъэкIыщтыр зэкIэ тшIэщт. Адыгеим зэкIэ икIалэхэми ипшъашъэхэми тафэлъаIо псауныгъэ пытэ яIэнэу, дунаир мамырэу, шIум щымыкIэхэу, ямурад дахэхэр къадэхъухэу псэунхэу!
Адыгэ Республикэм и ЛIышъхьэу, Урысые политическэ партиеу “Единэ Россием” и Адыгэ шъолъыр къутамэ и Секретарэу КъумпIыл Мурат Адыгэ Республикэм и Къэралыгъо Совет — Хасэм и Тхьаматэу Владимир Нарожнэр