Адыгэ Республикэм икъэралыгъо гъэцэкIэкIо хэбзэ къулыкъухэмрэ ошIэ-дэмышIэ тхьамыкIагъохэм ыкIи радиационнэ авариехэм шъобж ахэзыхыгъэхэм яобщественнэ организациехэмрэ я Межведомственнэ координационнэ совет зичэзыу зэхэсыгъо иIагъ. Ар зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

[caption id="attachment_134858" align="aligncenter" width="800"] АР-м IофшIэнымкIэ ыкIи социальнэ хэхъоныгъэмкIэ и Министерств.[/caption]

Социальнэ ухъумэнымкIэ, финансхэмкIэ, къэбар жъугъэм иамалхэмкIэ министерствэхэм ыкIи къулыкъухэм япащэхэр, радиацием епхыгъэ тхьамыкIагъохэм ядэгъэзыжьын хэлэжьагъэхэу зэрар зэрихыгъэхэм яобщественнэ организациехэм ялIыкIохэр зэхэсыгъом хэлэжьагъэх. Мырзэ Джанбэч ипэублэ псалъэ къы­зэрэщиIуагъэмкIэ, Чернобыль иатом электростанцие къыщыхъугъэ тхьамыкIагъом идэгъэзыжьын хэлэжьагъэхэм яфэIо-фашIэхэр афагъэцэкIэнхэм къэралыгъом зэрэфэлъэкIэу ынаIэ тырегъэты.

— ТхьамыкIагъор къызщыхъугъэ мафэм епхыгъэ шIэжь Iофтхьабзэу республикэм щызэхащагъэхэм, радиацием ­шъобж хэзыхыгъэхэм зэтыгъо ахъщэ тынэу аратыхэрэм, япсауныгъэкIэ ящыкIэгъэ медицинэ уплъэкIунхэр игъом афашIынхэм, нэмыкI Iофыгъоу зыгъэгумэкIыхэрэм татегущыIэнэу тызэрэугъоигъ. Мы тхьамыкIагъом идэгъэзыжьын хэлэжьагъэхэм ягумэкIыгъохэр, яIофыгъохэр къэралыгъо гъэцэкIэкIо къулыкъухэм янэплъэгъу рагъэкIыхэрэп нахь мышIэми, джыри щыкIагъэхэр щыIэх, ахэм непэ тахэплъэщт, — къыIуагъ ащ.

АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр шIэжь мафэм фэгъэхьыгъэ Iофтхьэбзэ зэфэшъхьафэу республикэм щызэхащагъэхэм къатегущыIагъ. Ахэм ащыщых гъэсэныгъэм иучреждениехэм ащыкIогъэ «лIыхъужъныгъэм идесэхэр», класснэ сыхьатхэр, нэмыкIхэри. Хабзэ зэрэхъугъэу, мэлылъфэгъум и 26-м хэбзэ къулыкъухэр ыкIи общественнэ организациехэр зыхэлэжьэгъэхэ цIыф зэхахьэхэр муниципалитетхэм зэкIэми ащыкIуагъэх. Ахэм афэгъэхьыгъэ къэтынхэр ыкIи хэутыгъэхэр республикэм Iоф щызышIэрэ къэбар жъугъэм иамалхэм зэкIэми къа­гъэхьазырыгъэх.

[caption id="attachment_134859" align="aligncenter" width="800"] АР-м IофшIэнымкIэ ыкIи социальнэ хэхъоныгъэмкIэ и Министерств.[/caption]

Радиацием зэрар зэрихыгъэхэм зэтыгъо ахъщэ IэпыIэгъоу аратырэм къытегущыIагъ АР-м IофшIэнымкIэ ыкIи социальнэ хэхъоныгъэмкIэ и Министерствэ иотдел ипащэу Браукъо Валерий. Хабзэ зэрэхъугъэу, а IэпыIэгъур тхьамыкIагъом идэгъэзыжьын хэлэжьагъэхэм, сэкъатныгъэ хэзыхыгъэхэм, зидунай зыхъожьыгъэхэм яшъхьэгъусэхэм, янэ-ятэхэм, ясабыйхэм афатIупщы.

Браукъо Валерий къызэриIуагъэмкIэ, а купым хэхьэрэ нэбгырэ 516-у республикэм щыпсэухэрэм зэтыгъо ахъщэ IэпыIэгъоу мини 2 зырыз аратыгъ. ПстэумкIи ащ сомэ 1038960-рэ пэIуагъэхьагъ. Чернобыль къыщыхъугъэ тхьамыкIагъом идэгъэзыжьын хэлэжьагъэхэм нэмыкI гумэкIыгъоу яIэхэр зэхэсыгъом къыщаIэтыгъэх. Ахэр Iэзэгъу уцхэр къа­зэраратырэ шIыкIэм зэхъокIыныгъэхэр фэшIыгъэнхэр, чернобыльцэхэм къакIэ­хъухьэгъэ кIэлэцIыкIухэм яIэзэгъэныр, нэмыкIхэми афэгъэхьыгъэх.

Iофтхьабзэу агъэнэфагъэхэр зэкIэ гъэцэкIэгъэнхэ зэрэфаер министрэм къыIуагъ, пшъэдэкIыжь зыхьырэ къулыкъухэм ялIыкIохэм анаIэ ащ тыраригъэ­дзагъ.

Зэхэсыгъом икIэухым радиацием хэфагъэхэр социальнэу къэухъумэгъэнхэмкIэ общественнэ IофшIэным чанэу хэлажьэхэрэм Адыгеим къэралыгъо гъэ­псыкIэ иIэ зыхъугъэм ия 100-рэ илъэс фэгъэхьыгъэ нэпэеплъ медалыр афагъэ­шъошагъ. Ахэм ащыщых Шыкъултыр Юрэ, ДышъэкI Хъызыр, Александр Демидовыр, Юрий Малышевыр, нэмыкI­-хэри.

Iэшъынэ Сусан.