Язытыгъэри зыштагъэхэри агъэмысэх
Урысыем ихэгъэгу кIоцI къулыкъу иотделэу Тэхъутэмыкъое районым щыIэм иуполномоченнэ участковэ нэбгырищмэ ыкIи идежурнэ IофышIэ алъэныкъокIэ щынэгъончъэнымкIэ федеральнэ къулыкъум и ГъэIорышIапIэу Адыгеим щыIэм къыгъэхьазырыгъэ материалхэмкIэ Урысыем и Следственнэ комитет АР-мкIэ иследственнэ ГъэIорышIапIэ уголовнэ Iофхэр къызэIуихыгъэх.
Къуалъхьэ аштагъэу ягуцафэхэу полицием икъулыкъушIэхэр аубытыгъэх.
Следствием зэригъэунэфыгъэмкIэ, 2019-рэ илъэсым къыщыублагъэу 2022-рэ илъэсым нэс хьадэм ифэIо-фашIэхэр зыгъэцэкIэрэ организацием Iоф щызышIэрэм зидунай зыхъожьыгъэхэм якъэбар зэрыт тхьапэхэр къызIэкIигъэхьанхэм фэшI полицием иучастковэ нэбгыри 3-мэ ыкIи отделым иоперативнэ дежурнэ ахъщэ къуалъхьэ якартэхэм афыригъэхьагъ.
Джащ фэдэу хьадэм ифэIо-фашIэхэр зыгъэцэкIэрэ организацием иIофышIэ полицием икъулыкъушIэхэм къуалъхьэ зэраритыгъэм къыхэкIэу ащи уголовнэ Iоф къыфызэIуахыгъ. Мы мафэм ехъулIэу следственнэ ыкIи процессуальнэ Iофтхьабзэхэр рагъэкIокIых, уголовнэ Iофым изэхэфын лъагъэкIуатэ.
Урысыем и Следственнэ комитет иследственнэ ГъэIорышIапIэу АР-м щыIэм ипресс-къулыкъу.