НыбжьыкIэ шъхьэкIэфэшI къэрэгъул
Республикэ Iофтхьабзэу «НыбжьыкIэ шъхьэкIэфэшI къэрэгъул. Пост N 1» зыфиIорэм иаужырэ уцугъо тыгъуасэ Мыекъуапэ щызэхащагъ. Хэгъэгу зэошхор къызежьагъэр илъэс 82-рэ зэрэхъугъэм ар рапхыгъ.
[caption id="attachment_134786" align="aligncenter" width="430"] авторым иех.[/caption]
АР-м гъэсэныгъэмрэ шIэныгъэмрэкIэ и Министерствэрэ Мыекъопэ индустриальнэ техникумымрэ Iофтхьабзэм кIэщакIо фэхъугъэх. КъыткIэхъухьэрэ ныбжьыкIэхэм яхэгъэгу шIу алъэгъуныр, тарихъыр дэгъоу ашIэныр, Хэгъэгу зэошхом хэлэжьагъэхэм яшIэжь амыгъэкIодыныр ары зэхэщакIохэм пшъэрылъ шъхьаIэу зыфагъэуцужьыгъэр.
Iофтхьабзэр тIоу гощыгъагъ. Апэрэ уцугъор мэкъуогъум и 1-м къыщегъэжьагъэу и 16-м нэс муниципальнэ образованиехэм ащыкIуагъ. Хэгъэгу зэошхом ыкIи нэмыкI зэо-зэпэуцужьхэм ахэкIодагъэхэм ясаугъэтэу муниципалитетхэм ащагъэуцугъэхэм адэжь зэнэкъокъур щыкIуагъ. Ахэм текIоныгъэр къащыдэзыхыгъэхэр шъолъыр едзыгъом хэлэжьагъэх.
— Мы Iофтхьабзэм мэхьэнэ ин иI, илъэс къэс зэхэтэщэ. Мыгъэ команди 10, республикэм икъалэхэм ыкIи ирайонхэм къарыкIыгъэ кIэлэеджэкIо нэбгырэ 50 ащ хэлажьэ, куп пэпчъ нэбгыри 5 хэхьагъ, ахэр зыгъэхьазырыгъэхэ ОБЖ-мкIэ кIэлэегъаджэхэр ягъусэх, — къыIуагъ Мыекъопэ индустриальнэ техникумым ипащэ игуадзэу Брагъунэ Асе.
Ветеранхэм яобщественнэ организациеу «БОЕВОЕ БРАТСТВО» зыфиIорэм иадыгэ шъолъыр къутамэ хэтэу, лицееу N 19-м ОБЖ-мкIэ икIэлэегъаджэу Тыгъужъ Олег Iофтхьабзэр къызэIуихыгъ. Яхэгъэгу шIу алъэгъоу, лIыхъужъныгъэ зэрахьэзэ псэунхэу ныбжьыкIэхэм къариIуагъ.
[caption id="attachment_134797" align="aligncenter" width="800"]
авторым иех.[/caption]
Пограничнэ къулыкъум иветеранэу Дэхъужь Исмахьилэ джащ фэдэу ныбжьыкIэхэм закъыфигъэзагъ. Мыекъопэ индустриальнэ техникумым щыригъэджэгъэ нэбгыриплIэу хэгъэгур къаухъумэзэ зидунай зыхъожьыгъэхэм ягугъу къышIыгъ. ЩымыIэжьхэм ЛIыхъужъым иорден къафагъэшъошагъ.
Шэуджэн районымкIэ къуаджэу Мамхыгъэ къикIыгъэ Джэнчэтэ Мыхьамэт «НыбжьыкIэ шъхьэкIэфэшI къэрэгъул. Пост N 1» зыфиIорэм хэлэжьэн амал иIэ зэрэхъугъэм осэ ин фешIы. АщкIэ непэрэ шъхьафит щыIакIэр къыдэзыхыгъэ нахьыжъхэм яшIэжь зэригъэлъапIэрэр къегъэлъагъо.
Хэжъ Ислъам Адыгэкъалэ къикIыгъ. Хэгъэгу зэошхом епхыгъэ тарихъ къэбархэр шIогъэшIэгъонэу еджапIэм щызэрегъашIэх, мыщ фэдэ Iофтхьабзэхэм ыгу рихьэу ахэлажьэ. Псэемыблэжьэу пыим пэуцужьыгъэхэм къинэу алъэгъугъэр зэхешIэ, ахэм яшIэжь егъэлъапIэ.
НыбжьыкIэхэм чэзыу-чэзыоу зыкъагъэлъэгъуагъ. КIэухым зэкIэми АР-м гъэсэныгъэмрэ шIэныгъэмрэкIэ и Министерствэ ищытхъу тхылъхэр ыкIи дзэ Iэмэ-псымэхэр зэрагъэгъотынхэ алъэкIынэу сертификатхэр афагъэшъошагъэх. Шъыгъо-шIэжь Мафэм фэгъэхьыгъэу саугъэтым къэгъагъэхэр кIэралъхьагъэх.
ДЕЛЭКЪО Анет.