Адыгеим и ЛIышъхьэу КъумпIыл Мурат къэ­гъэгъэ блэрхэр Мыекъуапэ и Гупчэ мемориал кIэ­лъырылъхьэгъэнхэм фэгъэхьыгъэ Iофтхьа­бзэм хэлэжьагъ. Ар шъы­гъо-шIэжь Мафэм епхыгъагъ — илъэс 82-кIэ узэкIэIэбэжьмэ, мыщ фэдэ мафэм Хэгъэгу зэошхор къежьэгъагъ.

[caption id="attachment_134795" align="aligncenter" width="800"]  А. Гусев.[/caption]

Хэгъэгу зэошхом щыфэхы­гъэхэм яшIэжь агъэлъэпIагъ АР-м и Къэралыгъо Совет —Хасэм и Тхьаматэу Владимир Нарожнэм, АР-м иминистрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиным, АР-м иминистрэхэм я Кабинет хэтхэм, республикэ парламентым идепутатхэм, хэбзэухъумэкIо къулыкъухэм япащэхэмрэ яIофышIэхэмрэ, дзэкъулыкъушIэхэм, общественнэ IофышIэхэм, ветеран, ныбжьыкIэ патриотическэ организациехэм ялIыкIохэм, къэлэдэсхэм. Митингым хэлэжьа­гъэхэм къэгъэгъэ блэрхэр Гупчэ мемориалым кIэлъыралъхьагъэх; хэ­гъэгум ис пстэуми афэдэу, урысые Iофтхьабзэм къыдыхэлъытагъэу сыхьатыр 12.15-м зы такъикъэ шъы­гъуагъэх.

Дунэе Iофтхьабзэхэу «Заом имэшIо сурэтхэр», «ШIэжьым ишэф остыгъ» зыфиIохэрэм Адыгеир ахэлэжьагъ. Мэкъуогъум и 22-р къызыщихьащт чэщым партиеу «Единэ Россиемрэ» «НыбжьыкIэ Гвардиемрэ» яшъолъыр къутамэ хэтхэм, общест­веннэ IофышIэхэм, къэлэдэсхэм шэф остыгъэхэр Мыекъуапэ и Гупчэ мемориал дэжь щызэ­хагъэнэгъагъэх, Хэгъэгу зэошхом иорден итеплъэ зиIэ сурэт щызэхагъэу­цогъагъ, «1941-рэ илъэсым мэкъуогъум и 22-р. Адыгеим щыгъупшэрэп» зыфиIорэ гущыIэхэр къыщагъэнэфыгъэх. Респуб­ликэм икъэлэ, ирайон пстэуми шIэжь Iофтхьа­бзэхэмрэ митингхэмрэ ащыкIуагъэх.

Шъугу къэтэгъэкIыжьы Хэгъэгу зэошхом илъэхъан Адыгеим щыщ нэбгырэ мин 80 фэдиз фронтым зэрэIухьэгъа­гъэр, нэбгырэ мин 30-м ехъумэ ядэжь къызэрамыгъэзэжьыгъэр. Тирес­публикэ щыщ нэбгырэ 59-мэ Советскэ Союзым и ЛIыхъужъыцIэ, Щытхъум иорден ишъошищ къафагъэшъошагъ.