Шъыгъо-шIэжь Мафэм фэгъэхьыгъэу шIэжь чэщэу мэкъуогъум и 21-р и 22-м зыщыхэхьащтым пчыхьэм сыхьатыр 8-м заом хэкIодагъэхэм ясаугъэтэу «ЕгъэшIэрэ машIом» дэжь партиеу «Единэ Россием», «НыбжьыкIэ Гвардием» ыкIи «ТекIоныгъэм иволонтерхэм» ягуфитхэм Хэгъэгу зэошхом иорден итеплъэ къэзыгъэлъэгъорэ шэф остыгъэ 3000 зэхагъэнагъ.

Орденэу щыIэхэм ащыщэу мыр Хэгъэгу зэошхом итамыгъэу щыт, шъошитIу зиIэ ыкIи заом илъэхъан лIыхъужъныгъэ зезыхьагъэхэмрэ зэхэщэн команднэ IофшIэныр шIуагъэ къытэу зыгъэпсы­хэрэмрэ аратыщтыгъ.

Нэмыц техакIохэм тикъэралыгъо лыеу къырахыгъэр, тицIыфхэм япсэемыблэжьыныгъэ, мамыр щыIакIэр къыт­фыдэзыхыгъэхэр зэрэтщымыгъупшэщтхэм, лIэужыбэм зэрядгъэшIэжьыщтым ишыхьатэу мы Iофтхьабзэр илъэс къэс зэхащэ.

Iофтхьабзэхэу «ШIэжьым ишэф остыгъэхэр» ыкIи «Заом имэшIо сурэтхэр» тикъэралыгъо ичIыпIэ 1500-мэ ащыкIуагъэх, ащ нэмыкIэу дунаим икъэралыгъо 50-мэ — Бразилием, Тунис, Ливан, Панамэ, Киргизием, Азербайджан, Узбекистан ыкIи нэмыкIхэми ащызэхащагъэх.

Iофтхьабзэм хэлэжьагъэх ветеранхэр, хэбзэ къулыкъухэм, УIэшыгъэ КIуа­чIэхэм, общественнэ организациехэм ялIыкIохэр, «НыбжьыкIэ Гвардием» хэт­хэр, еджэпIэ зэфэшъхьафхэм ачIэс ныбжьыкIэхэр.

ШIэжьым инэпэеплъ шэф остыгъэхэр къекIолIэгъэ пстэуми аIыгъхэу зы та­къикърэ заом щыфэхыгъэхэм афэ­шъыгъуагъэх, тицIыфхэм лIыгъэу зэра­хьагъэр джыри зэ агу къагъэкIыжьыгъ. Урысые политическэ партиеу «Единэ Россием» хэтэу, «НыбжьыкIэ Гвардием» ипащэу Бэрзэдж Асыет къызэриIуагъэм­кIэ, партием инароднэ программэ лъэныкъо шъхьаIэу къыгъэнафэхэрэм ащыщ тарихъ шIэжьыр къэухъумэгъэныр. Хэгъэгу зэошхом хэкIодагъэхэм яшIэжь агъэлъэпIэныр, зыщыпсэухэрэ чIыпIэм ТекIоныгъэшхом икъыдэхын иIахьэу хилъхьагъэр зэрагъэшIэныр ары пшъэ­рылъ шъхьаIэу зэхэщакIохэм яIэр.

— Мы Iофтхьабзэм мэхьанэшхо хэт­кIи иIэу сэлъытэ, анахьэу ныбжьыкIэ­хэмкIэ. Тятэжъ-тянэжъэу заом хэлэжьагъэхэм, хэкIодагъэхэм къинэу алъэгъугъэм, афызэшIокIыгъэм ифэшъо осэ тэрэз еттыныр зэкIэми типшъэрылъ. КъыткIэхъухьэхэрэм ядгъэшIэн фае Хэгъэгу зэошхом къэралыгъомкIэ мэхьа­нэу иIагъэр. ШIу тызмылъэгъухэрэм, зизэрар тикъэралыгъо къезыгъэкIы зы­шIоигъохэм къырахьакIырэ къэбархэр, тарихъыр ежь зэрэфаеу атхынэу зэ­режьэхэрэм изэрар къакIоу сеплъы. Тэ амалэу тиIэмкIэ мыщ фэдэ Iофтхьа­бзэхэмкIэ, нэмыкI екIолIакIэхэмкIэ ныб­жьыкIэхэр тыухъумэнхэ фае, мы хъу­гъэ-шIагъэм имэхьанэ алъыдгъэIэсын фае, — къыIуагъ «Хэгъэгум иухъума­кIохэр» зыфиIорэ фондым ишъолъыр къутамэ ипащэу ПIатIыкъо Аслъан.