Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм язичэзыу купэу нэбгыри 5 хъурэр мэкъуогъум и 21-м гъогу техьагъ. Ахэм ошъогу-десантнэ дзэхэм къулыкъур ащахьыщт.

[caption id="attachment_134732" align="aligncenter" width="800"] Н. Мальцева.[/caption]

МэфэкI шIыкIэм тет Iофтхьабзэу АР-м идзэ комиссариат щыкIуагъэм хэлэжьагъэх цIыф­хэр дзэ къулыкъум дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, Къэралыгъо Советым — Хасэм и Тхьаматэу Владимир Нарожнэр, Мыекъопэ къэлэ администрацием ипащэ игуадзэу, генерал-лейтенантэу Юрий Томчак, патриотическэ ыкIи общественнэ организа­циехэм ялIыкIохэр, дзэ къулыкъум иветеранхэр, ны-тыхэр. В. Лебедевым пэублэ гущыIэу къышIыгъэм къыщыхигъэщыгъ кIэлэ ныбжьыкIэхэу гъогу те­хьэхэрэр щытхъу хэлъэу къулыкъур къахьынышъ, къагъэзэ­жьы­нэу зэращыгугъыхэрэр.

— Мэзэ 12-у шъукъызэрэтыщтыр псынкIэу кIощт. Ошъогу десантнэ дзэхэм къулыкъу ащыхьыгъэным лIыгъэ, пытагъэ ищыкIагъэх. ЛъэгэпIэшIухэм адиштэрэ дзэхэм ащыщ къулыкъур щышъухьынэу шъуинасып къызэрихьыгъэм шъурыгушхонэу щыт. Къэралыгъор къэухъумэгъэныр пшъэрылъ шъхьэ­Iэу шъуиI, ар щытхъу хэлъэу жъугъэцэкIэнышъ, узын­чъэу къэжъугъэзэжьынэу, ошъогу­-десантнэ дзэхэм ядевизэу «Никто кроме нас!» зы­фиIорэр пытагъэ хэлъэу къэ­жъугъэшъыпкъэжьынэу тышъущэгугъы. Гъогу маф, — къы­Iуагъ В. Лебедевым.

Владимир Нарожнэм къы­кIигъэтхъыгъ УIэшыгъэ КIуа­чIэхэм къулыкъур ащыхьыгъэныр, Хэгъэгум ишъхьафитныгъэ къэухъумэгъэныр хъулъфыгъэ, гражданин ыкIи патриот пэпчъ зэрипшъэрылъ шъхьаIэр. Гъогу мыпсынкIэу къакIущтым яшэн-­зекIуакIэхэр нахь зэрипсыхьащтыр, пытагъэ зэрахилъхьащтыр ащ къыхигъэщыгъ. Джащ фэдэу парламентым и Тхьаматэ ны-тыхэм закъыфигъазэзэ, кIэлэ патриотхэр зэрапIугъэхэмкIэ рэзэныгъэ гущыIэхэр апигъо­хыгъ.

— Тикъэралыгъо и УIэшыгъэ КIуачIэхэр сыдигъуи зэрэлъэшхэр къыхэзгъэщымэ сшIоигъу. Джы шъо ащ исатырхэм шъуа­хэуцощт. ПшъэдэкIыжьэу шъу­хьырэр дэгъоу къыжъугурыIон ыкIи щытхъу хэлъэу зэрэжъугъэцэкIэщтым шъупылъын фае. Тятэжъхэм, тидзэкIолIхэу хэу­шъхьафыкIыгъэ дзэ операцием хэлажьэхэрэм лIыхъужъныгъэу, псэемыблэжьныгъэу зэрахьэрэр щысэтехыпIэу шъуиIэнхэу щыт. Шъупсаоу, шъуузынчъэу къэ­жъу­гъэзэжьынышъ, унэгъо да­хэ­хэр зэрэшъушIэщтхэм, Адыге­им ибаиныгъэ зэрэхэжъугъэ­хъощтым сицыхьэ телъ. Адыгэ Республикэм и ЛIышъхьэу Къум­пIыл Мурат, депутатхэм ацIэкIэ сышъуфэлъаIо псауныгъэ пытэ шъуиIэнэу, гъэхъа­гъэхэр шъушIынхэу. Шъуигупсэу Адыге­ир ыкIи шъуиIа­хьылхэр къызэ­рэшъуажэхэрэр зыщышъумы­гъэгъупш!, — къы­Iуагъ Владимир Нарожнэм.

НыбжьыкIэхэм закъыфэзгъэзагъэхэм ащыщ генерал-лейтенантэу Юрий Томчак. Хэгъэгум ыпашъхьэкIэ пшъэдэкIыжьэу ахьырэр агъэцэкIэным игъо къызэрэсыгъэр ащ хигъэунэ­фыкIыгъ, дзэм къулыкъу щып­хьыныр УФ-м игражданин пэпчъ зэрипшъэрылъыр зэхишIыкIын фаеу ащ ылъытагъ. Зэрифэ­шъуашэу Адыгеим ыцIэ агъэ­Iунэу, тыкъамыгъэукIытэжьынэу ар къафэлъэIуагъ. НыбжьыкIэхэр зыдащэщтхэ ошъогу-десантнэ дзэ частым илIыкIоу Константин Романовым къызэриIотагъэмкIэ, къулыкъушIэхэр апэ егъэджэн гупчэу Омскэ дэтым мэзитIо щыIэщтых, нэужым дзэ частьхэм атырагощэщтых. Джащ фэдэу егъэджэн гупчэм тарихъ гъогоу къыкIугъэм ар къытегущыIагъ. Мы уахътэм сэнэхьати 10-м афытегъэпсыхьэгъэ специалистхэр гупчэм къегъэхьазырых.

Ны-тыхэм ацIэкIэ Мария Голышевар къэгущыIагъ. НыбжьыкIэхэм къафаIогъэ гущыIэ фабэхэм ащ адыригъэштагъ, лIыгъэрэ щэIагъэрэ къызхагъэфэнхэу къафэлъэIуагъ.

Нэбгыритфэу гъогу техьагъэхэм ащыщэу Максим Вожжовым псэлъэ кIэкI къышIыгъ. Гъэсэпэтхыдэ гущыIэхэу нахьыжъхэм къараIуагъэхэр къазэрашъхьапэщтхэм ицыхьэ зэрэтелъыр ащ къыхигъэщыгъ. Щытхъу хэлъэу къулыкъур зэрахьыщтымкIэ, къызэращыгугъыхэрэр къызэрагъэшъыпкъэжьыщтымкIэ къэзэрэугъоигъэхэр къыгъэгугъагъэх. Ошъогу-десантнэ дзэхэм къулыкъур ащихьыным сыдигъуи зэрэкIэхъопсыщтыгъэр, ащ зызэрэфигъэхьазырыщтыгъэр хигъэунэфыкIыгъ. ЩыIэныгъэм IофшIэпIэ чIыпIэ дэгъу щыбгъотынымкIэ дзэм къулыкъу щыпхьыным мэхьанэ зэриIэр къыхигъэщыгъ.

Нэужым къэзэрэугъоигъэхэр щагум дэхьагъэх, дзэкIолIэу гъогу техьагъэхэр агъэкIотагъэх.

НыбжьыкIэхэм щытхъу хэлъэу къулыкъур къахьынэу, шIурэ дахэрэкIэ ягупсэхэм къафагъэзэжьынэу афэтэIо.

Iэшъынэ Сусан