Урысыбзэмрэ хьисапымрэкIэ шIокI зимыIэ ушэтынхэм язэфэхьысыжьхэр мы мафэхэм къэнэфагъэх.

[caption id="attachment_134728" align="aligncenter" width="607"] Ю. Масел ихъарзынэщ.[/caption]

НэбгыриплIымэ балли 100 къахьыгъ. Нэбгырищыр урысыбзэмкIэ, зы нэбгырэм профильнэ хьисапымкIэ.

УрысыбзэмкIэ Красногвардейскэ районым ит гимназиеу N 1-р къэзыухырэ Дарья Ермаковам, Кощхьэблэ районымкIэ гурыт еджапIэу N 9-м икIэлэеджакIоу Юлия Масел, Мыекъопэ гимназиеу N 22-м щеджэгъэ Самера Оджха, профильнэ хьисапымкIэ Мыекъопэ лицееу N 8-р къэзыухырэ Алена Кононовам анахь балл иныр къалэжьыгъ.

— ШIэныгъэм иушэтыпIэ анахь лъаг ар, кIэлэеджакIохэр зэрегугъухэрэр, дэгъоу зэреджэхэрэр ыкIи кIэлэегъаджэхэм яIофшIэн зэрифэшъуашэу зэрагъэцакIэрэр ащ къегъэлъагъо. Шъхьадж зыфэе апшъэрэ еджапIэм чIэхьанхэу, ыпэкIи гъэхъагъэхэр ашIыхэзэ ящыIэныгъэ гъогу рыкIонхэу афэсэIо, — къыIуагъ АР-м и ЛIышъхьэу КъумпIыл Мурат.

Кощхьэблэ районым ит селоу Вольнэм дэт гурыт еджапIэр къэзыухырэ Юлия Масел икласс пащэу Мамыжъ Гощнурэ гущыIэгъу тыфэхъугъ. Ащ къызэрэтиIуагъэмкIэ, пшъэшъэжъыер ицIыкIугъом къыщегъэжьагъэу иакъылкIи, игъэпсыкIэкIи илэгъухэм къахэщыщтыгъ. Предмет зэфэшъхьафхэмкIэ олимпиадэхэм ахэлэжьагъ ыкIи гъэхъэгъэшIухэр иIэхэу гурыт еджапIэр къеухы. УрысыбзэмкIэ балли 100 къызэрэрихыгъэм имызакъоу, литературэмкIэ балл 91-рэ, базовэ хьисапым хэтыгъэ упчIэ 21-р зэкIэ къышIыгъ ыкIи «тфы» къыхьыгъ. КъэIогъэн фае, пшъэшъэжъыем гурыт еджапIэм щызэригъэгъотыгъэ шIэныгъэхэр ары ыгъэфедэжьыгъэхэр, репетиторхэм адэжь кIуагъэп.