Непэ врачэу Адыгэ Республикэм иIэзапIэмэ ащылажьэрэр нэбгырэ 1545-рэ. Ау илъэс планыр игъэкъугъэным фэшI врачмэ япчъагъэ нэбгырэ 1972-м нэгъэсыгъэн фае. ЗэрэхъурэмкIэ, 2023-рэ илъэсым врач 427-мэ республикэр ащэкIэ, аужырэ илъэсищым а IэнатIэм IуагъэкIыгъэр 661-рэ.

Социальнэ политикэмкIэ, унэгъо IофхэмкIэ, псауныгъэм икъэухъумэнкIэ ыкIи культурэмкIэ парламент комитетым зэхэ­сыгъоу зэхищагъэм а пчъагъэ­хэр къыIуагъ псауныгъэр къэу­хъумэгъэнымкIэ АР-м иминистрэ игуадзэу Хьагъэудж Мариет. Зэхэсыгъор зэрищагъ Наталья Широковам.

Врачхэр анахь зыщымакIэу къыхагъэщыгъэр Шэуджэн районыр ары — нэбгырэ мини 10-м телъытагъэу врачэу яIэр 11,1-рэ, Кощхьэблэ районым джащ фэдэу мини 10-м телъытагъэу врачхэр зэрэхъурэр 11,4-рэ, Джэджэ районым — 11,8-рэ.

Анахь зыщыкIэхэрэ врач сэнэхьатхэр: педиатриер (14); психиатриер (17); психотерапиер (18), функциональнэ диагностикэр (16); терапиер (29-рэ); анестезиолог-реаниматолог (12) ыкIи нэмыкIхэр.

Хьагъэудж Мариет джащ фэдэу къыIотагъ медицинэ кадрэхэр республикэм къещэлIэгъэнхэм пае программэхэу «Земский доктор» ыкIи «Земский фельдшер» зыфиIохэрэр зэрагъэфедэхэрэр, целевой егъэджэнхэм зэрапылъхэр, къуа­джэхэм ащылажьэхэрэм коммунальнэ фэIо-фашIэхэм ауасэу атырэм зэрафырагъэгъэзэжьырэр, ипотекэ зышIыгъэмэ ахъщэм ипроцент 15 зэрафатыжьырэр, ау ар сомэ мин 250-м зэрэшъхьадэмыкIырэр, нэмыкI фэгъэкIотэныгъэу агъэфедэ­хэрэр.