ЗэхэщакIохэм афэрэзагъэх
ШашкэхэмкIэ ыкIи шахматхэмкIэ зэнэкъокъухэу сэкъатныгъэ зиIэхэр зыхэлэжьагъэхэр Мыекъуапэ щыкIуагъэх.
[caption id="attachment_134705" align="aligncenter" width="800"] Хьафизэхэм я Урысые обществэ ичIыпIэ организаций.[/caption]
Хьафизэхэм я Урысые обществэ и Адыгэ республикэ организацие хэхьэрэ чIыпIэ къутэми 5 ащ хэлэжьагъэх. Мыекъуапэ ыкIи Адыгэкъалэ, Мыекъопэ, Тэхъутэмыкъое ыкIи Кощхьэблэ районхэм ялIыкIохэм заушэтыгъ.
Шашкэхэм ыкIи шахматхэм апыщагъэхэм республикэм щахэхъоным, сэкъатныгъэ зиIэхэр физическэ культурэм ыкIи спортым апыщагъэ хъунхэр, ахэм ясоциальнэ гумэкIыгъохэм чIыпIэ зыгъэIорышIэжьын къулыкъухэм, спорт организациехэм ыкIи обществэм анаIэ атырадзэныр, урысые зэнэкъокъухэм ахэлэжьэнхэм фэшI спортсмен анахь лъэшхэр къыхэгъэщыгъэнхэр ыкIи ахэр зыхэхьэрэ республикэ командэ гъэпсыгъэныр, нэмыкI лъэныкъохэри Iофтхьабзэм ипшъэрылъ шъхьэIагъэх.
Ахэм язэхэщакIор АР-м адаптивнэ спортымкIэ иеджапI ары. ШIуфэс гущыIэхэмкIэ къэзэрэугъоигъэхэм закъыфагъэзагъ сэкъатныгъэ зиIэхэр щыIэныгъэм хэгъэгъозэгъэнхэмкIэ Адыгэ республикэ физкультурэ-спорт гупчэм ипащэу Наталья Векличрэ хьафизэхэм я Урысые обществэ ичIыпIэ организациеу Мыекъуапэ щыIэм итхьаматэ ипшъэрылъхэр зыгъэцэкIэрэ Людмила Жадановамрэ.
Спортсменхэр агу етыгъэу зэнэкъокъугъэх, текIоныгъэр къыдихыным фэшI шъхьадж ежь шIыкIэ гъэнэфагъэ къызфигъэфедагъ, ау ащ дакIоу зэкIэхэри зэгъусагъэх, зэфэгумэкIыжьыгъэх.
Зэфэхьысыжьхэм къызэрагъэлъэгъуагъэмкIэ, шашкэхэмкIэ хъулъфыгъэхэм язэнэкъокъу текIоныгъэр къыщыдихыгъ Мыекъуапэ щыщ Георгий Карамышевым, ятIонэрэ хъугъэ Кощхьэблэ районым къикIыгъэ Енэмыкъо Салбый, ящэнэрэ чIыпIэр фагъэшъошагъ республикэм икъэлэ шъхьаIэ къэзыгъэлъэгъогъэ Андрей Балабановым. БзылъфыгъэхэмкIэ хагъэунэфыкIырэ чIыпIэхэр къыдахыгъэх Гюльчихра Юлдашевам (Мыекъопэ район), Татьяна Хурс (Мыекъуапэ), МэщлIэкъо Вибрэт (Адыгэкъал). ШахмэтхэмкIэ апэрэ чIыпIищыр къыдахыгъ Шорэ Бислъан (Мыекъуапэ), Владислав Колесникым (Мыекъуапэ) ыкIи Василий Кузьменкэм (Тэхъутэмыкъое район). Бзылъфыгъэхэм язэнэкъокъу ащытекIуагъ Мыекъопэ районым щыщ Валентина Шаповаловар, ятIонэрэ чIыпIэр къыдихыгъ Адыгэкъалэ илIыкIоу Хъунэго Саниет.
Мыекъуапэ икомандэу зэнэкъокъум апэрэ чIыпIэр къыщыдэзыхыгъэм ар къэзыушыхьатырэ дипломыр ыкIи кубокыр мэфэкI шIыкIэм тетэу ратыжьыгъэх. ХагъэунэфыкIырэ чIыпIэхэр зыфагъэшъошагъэхэм зэкIэми дипломхэр, медальхэр ыкIи шIухьафтынхэр къалэжьыгъэх.
Яуахътэ шIуагъэ къытэу зэрагъэкIуагъэм ыкIи ясэнаущыгъэ къагъэлъэгъон зэралъэкIыгъэм афэшI спортсменхэр зэхэщакIохэм афэрэзагъэх.
Хьафизэхэм я Урысые обществэ ичIыпIэ организациеу Мыекъуапэ щыIэм итхьаматэ ипшъэрылъхэр зыгъэцэкIэрэ
Людмила Жадановар.