Адыгеим икъэзэкъ ныбжьыкIэхэм я Союз хэтхэм еджэпIэ лагерэу Мыекъопэ гурыт еджапIэу N 17-м щыIэр бэмышIэу зэрагъэлъэгъугъ. ХьакIэхэм а 1 — 4-рэ классхэм ащеджэрэ кIэлэеджэкIо нэбгыришъэм ехъу къапэгъокIыгъ.

Къэзэкъ цIыкIухэу Валерия Гущинам, Илья Баклаговым ыкIи Роман Моисеенкэм къэзэкъ джэгукIэхэр кIэлэеджакIохэм арагъэлъэгъугъэх, адэджэгугъэх ыкIи къэзэкъ шъуашэм нэIуасэ фашIыгъэх.

Къэзэкъ ныбжьыкIэу Александр Роговым кIэлэцIыкIумэ къафиIотагъ хэушъхьафыкIыгъэ дзэ операцием ежьхэм яшIоигъоныгъэкIэ къэзэкъхэр зэрэхэлажьэхэрэр, Iашэм узэрэпы­лъын ыкIи зэрэбгъэфедэнэу щытыр. Роман хэушъхьафыкIыгъэ дзэ операцием ежь ышъхьэкIэ хэлэжьагъ, Мыекъопэ къэзэкъ отделым иатаман игуадзэу мэлажьэ.

Адыгеим икъэзэкъ ныбжьыкIэхэм я Союз итхьаматэу Екатерина Загорулько игукъэкIыкIэ кIэлэеджакIомэ плакат агъэ­хьазырыгъ, ащ дзэкIолIмэ шIуфэс зэрарахырэ гущыIэхэр тыратхагъэх. Мыекъопэ къэзэкъ отделым гуманитар IэпыIэгъоу хэушъхьафыкIыгъэ дзэ операциер зыщыкIорэ чIыпIэм мэкъуогъум и 15-м ащагъэм а плакатри датIупщыгъ.

ЗыкIыныгъэ ахэлъэу, команднэ кIуачIэр къагъэлъагъозэ кIэлэцIыкIумэ кIапсэр зэпакъудыигъ, зэнэкъокъугъэх. ТекIоныгъэм фэбанэгъэх, шъхьэкIафэ зэрэзэфашIырэм къыхэкIэу, зэкъошныгъэр текIуагъ.

Адыгеим икъэзэкъ ныбжьыкIэмэ я Союз къыгъэхьазырыгъэ шIухьафтынхэр кIэлэеджакIохэм аратыгъэх, фэбагъэ зыхэлъы­гъэ зэIукIэм ар кIэух фэхъугъ.

Екатерина Загорулько.