Монополием пэшIуекIогъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ хъулъфыгъэ горэм тхьаусыхэ тхылъ къыIэкIигъэхьэгъагъ. Iахьзэ­хэлъ обществэу «Банк Уралсиб» счет къыщызэIуихынэу игъо къызэрэфалъэгъугъэр ащ шIотэрэзыгъэп.

Урысые хэбзэгъэуцугъэм диштэу арэущтэу зекIонхэ залъэкIыщтыр ащкIэ цIыфым ыпэкIэ езэгъыгъагъэхэу щытыгъэмэ ары. Ау административнэ Iофым хаплъэхэ зэхъум, рекламэ нэшанэ зиIэ къэбархэр къыIэкIагъэхьанхэм абонентыр къызэрезэгъыгъэр обществэм къыушыхьатыжьын ылъэкIыгъэп.

«Джащ къыхэкIэу Iахьзэхэлъ обществэу «Банк Уралсиб» Федеральнэ законэу «Рекламэм ехьы­лIагъ» зыфиIорэм ия 18-рэ статья иа 1-рэ Iахь къыщыдэлъытэгъэ шапхъэхэр ыукъуагъэкIэ алъытагъ, сомэ мини 100 тазырэу тыралъхьагъ. Банкым тазырыр къыпщыныжьыгъ, рекламэм ехьылIэгъэ хэбзэгъэуцугъэр нахьыбэрэ ымыукъоным фэгъэхьыгъэ унашъоу монополием пэшIуекIогъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ышIыгъэр ыгъэцэкIагъ», — къытыгъ монополием пэшIуекIогъэнымкIэ Адыгем икъулыкъу.

Адыгем имызакъоу, хэгъэгум инэмыкI шъолъыр­хэми абонентхэм яшIэ хэмылъэу рекламэ нэшанэ зиIэ къэбархэр телефонкIэ зэращаIэкIагъахьэрэмкIэ рекламэм ехьылIэгъэ хэбзэгъэуцугъэр зэраукъорэр къулыкъум агу къыгъэкIыжьыгъ.