БлэкIыгъэ зыгъэпсэ­фыгъо мафэхэм ощхышхо къызэрещхыгъэм къыхэкIэу джыри Мыекъопэ районым ит псэупIэу Каменномостскэм ыкIи Кощхьэблэ рай­онымкIэ Вольнэм ащыпсэу­хэрэм ящагухэм, чIыгу Iахьхэм ощхыпсыр акIэ­хьагъ.

[caption id="attachment_134550" align="aligncenter" width="516"] УФ-м ошIэ-­дэмышIэ IофхэмкIэ и Ми­нистерствэ АР-мкIэ и ГъэI­орышIапI.[/caption]

Мыекъопэ район администрацием ипащэу Михаил Марьиным къызэриIуагъэмкIэ, мэкъуогъум и 16-м жьыбгъэр кIэтэу сыхьатищым ехъурэ зэпимыгъэоу ощх къафещхыгъ. Ащ къыхэкIэу Каменномост­скэм щыIэ къуладжэхэм афэмыукIочIэу псыр къа­дэкIыгъ ыкIи псэупIэ 50 фэдизмэ ар акIэлъэдагъ. Унэхэм псыр арыхьагъэп. Псыкъиуным игумэкIыгъо­хэм ядэгъэзыжьын хэу­шъхьафыкIыгъэ техникэу 11 ыкIи нэбгырэ 50 фэдиз хагъэлэжьагъ. АР-м ошIэ­дэмышIэ IофхэмкIэ и Ми­нистерствэ икъулыкъушIэ­хэр IэпыIэгъу къафэхъу­гъэх. Псыр щагухэм адащыгъ ыкIи чIыунэхэм ара­щыгъ. Километри 5-м къы­риубытэу псырыкIопIэ къуладжэхэр агъэкъэбзагъэх.

— АР-м и ЛIышъхьэу КъумпIыл Мурат, джащ фэдэу Каменномостскэ къоджэ псэупIэм ибизнесменхэу, мы районым щы­псэухэу зишIогъэшхо къы­тэзыгъэкIыгъэхэм сирэзэныгъэ гущыIэхэр апэзгъохы сшIоигъу, — къыIуагъ Мыекъопэ къэлэ адми­нистрацием ипащэ.

Каменномостскэ къоджэ псэупIэм къызэрэщаIуа­гъэм­кIэ, мы мафэм ехъу­лIэу псыр зэкIэкIожьыгъ, ащкIэ гумэкIыгъо щыIэжьэп. Комиссием хэтхэр псыр зищагу дэхьэгъэ унэгъо 11-мэ ащыIагъ, ахэм ащыщэу унэгъуи 5-мэ ячIыгу Iахьхэм псыр адащыгъ, чIыуни 4-мэ ачIащыгъ.

[caption id="attachment_134551" align="aligncenter" width="607"] УФ-м ошIэ-­дэмышIэ IофхэмкIэ и Ми­нистерствэ АР-мкIэ и ГъэI­орышIапI.[/caption]

Мы мафэхэм къоджэ псэупIэм ипащэ коммунальнэ къулыкъум иIофы­шIэхэр игъусэхэу зищагу псыр дэхьэгъэ унагъохэр къакIухьэх, IофшIэнэу джыри зэшIуахын фаер зэрагъашIэ. ЗэкIэмкIи щагу 13 ауплъэкIугъ. ЧIыунэхэм ащыщхэм джыри псыр ачIэт, ахэм ар къачIэщыгъэным фытегъэпсыхьэгъэ техникэм Iоф ешIэ. Ащ нэмыкIэу урамхэм шIоеу ащызэтырихьагъэр ыкIи псырыкIопIэ къуладжэхэр аукъэбзых.

Вольнэ къоджэ псэупIэм хэхьэрэ къутырэу Кар­молино-Гидроицкэм щы­псэу­хэрэм ятIонэрэу псыр къакIэуагъ. УФ-м граждан зыкъэухъумэжьынымкIэ ыкIи ошIэ-дэмышIэ IофхэмкIэ и Комитет иотделэу Кощхьэблэ районым щыIэм ипэщэ IэнатIэ зыгъэцэкIэрэ Тхьагъу Руслъан къызэ­рэтиIуагъэмкIэ, зэкIэмкIи щагу 18-мэ псыр адэхьагъ, унэхэм арыхьагъэп, хатэм лэжьыгъэу дэлъыгъэр ыгъэ­кIодыгъ. Мы мафэм ехъу­лIэу псыр зэкIэкIожьыгъ. Къоджэ псэупIэм иIофы­шIэхэм къэгъэнэжьакIохэр ягъусэу гумэкIыгъом идэгъэзыжьынкIэ Iофышхо ашIэ. ЯщыкIэгъэ техникэр яI, ащкIэ чIыунэхэм псыр ачIащы, щагухэр, урамхэр аукъэбзых, ахэм ятIэу, мы­жъоу, хэкIэу ащызэтырихьагъэр атырахыжьы. Джащ фэдэу псыр зэрыкIощт къуладжэр атIы.

— ЧIыпIэ къин ифагъэ­хэм ящыкIэгъэ IэпыIэгъур ятэгъэгъоты. Псыр зэкIэ­кIожьыгъ нахь мышIэми, ащ гумэкIыгъохэр къыздихьыгъэх. УплъэкIунхэр зэхэзыщэрэ купхэм ахэтхэм псыр зыкIэогъэ унагъохэр къакIухьэх, Iэпы­Iэгъоу ящыкIагъэр зэра­гъашIэ. IофшIэнхэр джыри лъэкIуатэх, — къыIуагъ Тхьагъу Руслъан.

Гупчэм къикIырэ за­шъо­хэрэ псым изытет зэ­рэ­дэим къыхэкIэу, ар зэфа­шIыгъэу псы къабзэр къо­джэ псэупIэхэм ащыпсэу­хэрэм афащэ. Мэ Iаер гъэкIодыгъэным ыкIи узхэр къемыжьэнхэм апае дезинфекцие псэу­пIэхэр ашIых. Комиссие зэхащагъэу унагъохэр къа­кIухьэхэзэ, япсэупIэхэм фыкъуагъэу афэхъугъэхэр атхых, ахэм ягъэцэкIэжьын пэIухьащт мылъкур къа­лъы­тэщт, нэужым ахэр рес­публикэ комиссием агъэхьыщтых.

УФ-м ошIэ-дэмышIэ Iоф­хэмкIэ и Министерствэ и ГъэIорышIапIэу АР-м щы­Iэм цIыфхэм макъэ аре­гъэIу, ощхым ыпкъ къикIэу псыхъохэм адэт псыр шап­хъэхэм ашIокIын зэрилъэкIыщтымкIэ.

Анахьэу псыхъохэу Пшызэ, Лабэ, Чамлык ыкIи Красногвардейскэ, Кощхьэблэ, Шэу­джэн, Тэхъутэмыкъое районхэм япсыхъо цIыкIухэр къыдэкIынхэм ищынагъо щыI. Ащ къыхэкIэу сакъыныгъэ къызхагъэфэнэу зэ­кIэми къяджэ.

КIАРЭ Фатим.