Къэралыгъо фондэу «Хэ­гъэгум иухъумакIохэр» зыфиIорэм ишъолъыр къутамэ Адыгеим къызыщызэIуахыгъэр бэшIагъэп. Урысые Федерацием и Президентэу Владимир ­Путиным къыгъэуцугъэ пшъэрылъхэу хэушъхьафыкIыгъэ дзэ операцием хэлажьэхэрэм ыкIи ахэм ­яунагъохэм IэпыIэгъу афэ­хъугъэным ар тегъэпсы­хьагъ. Мыщ фэдэ фондхэм яIофшIэн зэрэхэгъэгоу щаублагъ. «Хэгъэгум иухъумакIохэр» зыфиIорэ фондым ишъолъыр къутамэ ипащэу ПIатIэкъо Аслъан ащ фэгъэхьыгъэу гущыIэгъу тыфэхъугъ.

[caption id="attachment_134553" align="aligncenter" width="451"] М. Гордышов.[/caption]

— Аслъан, къэралыгъо фондыр къызызэIуахыгъэр мазэ хъущт. ЛъэныкъуакIэу къежьагъэ­хэм мыр ащыщ, сыдэущтэу шъуиIофшIэн ­жъугъэпсыра?

— ХэушъхьафыкIыгъэ дзэ операцием хэлажьэхэрэм ыкIи ащ хэкIодэгъэ дзэкIолIхэм яуна­гъохэм ящыкIэгъэ IэпыIэгъур «зы шъхьангъупчъэ» шIыкIэм тетэу ядгъэгъотыныр типшъэ­рылъ шъхьаIэхэм ащыщ. Нахь кIэкIэу къэпIон зыхъукIэ, зигугъу къэтшIырэ купым хахьэхэрэм ящыкIэгъэ фэIо-фашIэхэмкIэ къулыкъу ыкIи учреждение зэфэшъхьафхэр къамыкIухьэу зы чIыпIэм щагъэцэкIэнхэр ары. Анахь пшъэрылъ шъхьаIэхэм ащыщэу къэнэжьы мы къыкIэлъыкIорэ Iофтхьабзэхэр зетхьанхэр: медикэ, социальнэ-психологическэ IэпыIэгъу ятыгъэныр, Iэзэгъу уцхэр ягъэгъотыгъэнхэр, техническэ амалхэр аIэкIэгъэ­хьэгъэнхэр, къяIэзэнхэм пае зыгъэпсэфыпIэхэм чIыпIэ къафыхэгъэкIыгъэныр. Ащ дакIоу ынаIэ атыригъэтыщт ветеранхэм IофшIэн яIэным, ящыIэкIэ-псэу­кIэ епхыгъэ Iофыгъо зэфэшъхьафхэм.

ЛъэIу тхылъэу къытIукIэрэм елъытыгъэу тиIофшIэн тэгъэпсы. IэпыIэгъу зищыкIагъэр ежь ышъхьэкIэ фондым зыкъыфи­гъэзэнэу щыт, ащ социальнэ координаторхэр пэгъокIыщтых. Мы уахътэм шъолъыр фондыр зыдэщыIэр къалэу Мыекъуапэ, Лениным ыцIэ зыхьырэ урамыр, 54-рэ, пчэдыжьым сыхьатыр 9-м къыщегъэжьагъэу пчыхьэм 6-м нэс блыпэ — бэрэскэшхо мафэхэм къытэолIэнхэ алъэ­кIыщт. ЗыдаIыгъын фэе документхэр — паспортыр, СНИЛС-р, хэушъхьафыкIыгъэ дзэ операцием зэрэхэлажьэрэр къэзыушыхьатырэ тхылъыр ыкIи ищыкIагъэу щытмэ, медицинэ тхьапэхэр.

Джащ фэдэу телефонкIэ зыкъытфагъэзэн амал щыI: 8 (8772) 52-68-96-рэ, 8 (988) 475-31-69-рэ, 8(988) 475-34-25-рэ. Е социальнэ хъытыухэмкIэ ялъэIу зыфэгъэхьыгъэр кIэкIэу къытфатхын алъэкIыщт, ащ ацIэ, ятелефон номер къыратхэнхэ фае.

— IофшIэныр зежъугъэжьа­гъэм къыщегъэжьагъэу лъэIу тхылъ тхьапша къышъуIукIагъэр? Ахэр анахьэу сыда зыфэгъэхьыгъэхэр?

— Мэкъуогъум и 19-м ехъулIэу гъогогъу 80-м ехъурэ фондым зыкъыфа­гъэзагъ. Ахэр зыгъэгумэкIыщтыгъэхэр къяIэзэнхэм пае зыгъэпсэфыпIэхэм гъэ­кIогъэнхэр, «Зэо зэфэшъхьафхэм яветеран» цIэр къэушыхьатыжьыгъэныр, фэгъэкIотэнхэр ыкIи ахъщэ тынхэр къа­ратынхэмкIэ IэпыIэгъу афэхъугъэныр, кIэлэцIыкIухэм лагерьхэм защягъэгъэ­псэ­фыгъэныр.

— Къэралыгъо хабзэм икъулыкъухэмрэ шъолъыр фондымрэ язэдэлэжьэныгъэ зэрэжъугъэ­псырэм укъытфытегущыIа­гъэмэ дэгъугъэ.

— Къэралыгъо фондым икъутамэ иIофшIэнкIэ ищыкIэгъэ амалхэр тиIэнхэм фэшI Адыгеим и ЛIышъхьэ ынаIэ къыттет. ХэушъхьафыкIыгъэ дзэ операцием хэлажьэхэрэм ыкIи ащ хэкIодагъэхэм яунагъохэм япхыгъэ Iофыгъохэр зэшIо­хыгъэ зэрэхъущтхэм икъоу тыдэлэжьэнэу ЛIышъхьэм къытфигъэпытагъ.

Мы уахътэм цIыфхэм яфэIо-фашIэхэр зыщагъэцэкIэрэ зэхэт гупчэу къалэу Мыекъуапэ дэтым пIэлъэ гъэнэфагъэкIэ Iоф щытэшIэ. КIэлэцIыкIу поликлиникэу N 1-р зычIэтыгъэ унэр къытатыгъ, ащ игъэкIотыгъэ гъэцэкIэжьынэу щыкIорэр заухыкIэ тыкощыжьыщт.

ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм медицинэ IэпыIэгъу ятыгъэныр организацие шъхьаIэу зыпшъэ ралъхьащтымкIэ АР-м псауныгъэр къэухъумэгъэнымкIэ и Министерствэ зэзэгъыныгъэ дэтшIыгъ. Джащ фэдэу ыпкIэ зыхэмылъ юридическэ IэпыIэгъу, зэхэщэн Iофыгъо зэфэшъхьафхэм язэшIохынкIэ зэзэгъыны­гъэ­хэм якIэтхэн джыдэдэм ауж тит.

— Аслъан, Iофтхьабзэхэр зэрэзэхашъущэхэрэм тыщыгъуаз. Сыд фэда ахэр?

— Фондым испециалистхэм хэушъхьа­фыкIыгъэ дзэ операцием иветеранхэр общественнэ Iофтхьабзэхэм чанэу къа­хагъэлажьэх. Ахэр анахьэу зыфэгъэхьыгъэхэр цIыфхэр яхэгъэгу шIу алъэгъоу, ащ фэшъыпкъэхэу пIугъэнхэр, тарихъ шIэжьыр ыкIи цIыфыгъэ шэпхъэ дахэхэр гъэпытэгъэнхэр ары. НыбжьыкIэхэм япатриотическэ пIуныгъэ фэIорышIэщт Iофтхьабзэхэр нахьыбэу зэхэтщэщтых.

ГущыIэм пае, Мыекъуапэ икъэлэ парк Iофтхьабзэу «ТекIоныгъэм ихъытыу» зыфиIорэр мэкъуогъум и 12-м щыкIуагъ. Ар шъолъыр фондэу «Хэгъэгум иухъумакIохэр» зыфиIорэм зэхищэнымкIэ общественнэ ыкIи гуфэкIо организацие­хэр, ныбжьыкIэ объединениехэр Iэпы­Iэгъу къыфэхъугъэх. ЦIыф лъэпкъ зэфэшъхьафэу къыхэлэжьагъэхэм ягуетыныгъэ ишIуагъэкIэ тидзэкIолIхэм агъэфе­дэрэ маскировочнэ хъытыу квадратнэ метрэ 80 фэдиз аблэн алъэкIыгъ. НэмыкI шIушIэ IэпыIэгъум игъусэу хэу­шъхьафыкIыгъэ дзэ операцием ар ара­гъэщэщт.

Медицинэм иIофышIэхэу дзэкIолI госпитальхэм, сымэджэщхэм ыкIи нэмыкI IэзапIэхэм ащыIэхэу тидзэкIолIхэм IэпыIэгъу языгъэгъотыгъэхэм хэушъхьафыкIыгъэ дзэ операцием хэлажьэхэрэр зыщафэгушIохэрэ Iофтхьабзэ мы ма­фэхэм ттIупщыгъэ.

Джыри шIэхэу шIэжь ыкIи шъыгъо мафэм — мэкъуогъум и 22-м фэгъэхьыгъэ Iофтхьабзэ Адыгэ республикэ ныбжьыкIэ тхылъеджапIэм щызэхэтщэн гухэлъ тиI. Ащ къедгъэблэгъэщтых ветеранхэр, хэушъхьафыкIыгъэ дзэ операцием хэлажьэхэрэр ыкIи ныбжьыкIэ общественнэ движениехэм ялIыкIохэр.

— НыбжьыкIэхэм ягугъу къызэрэтшIыгъэзэ, ахэр шъуиIоф­шIэн къызэрэхэжъугъэлажьэхэ­рэм нахь игъэкIотыгъэу игугъу къэпшIыгъэмэ дэгъугъэ.

— ЫпшъэкIи къэсIуагъ тифонд рес­публикэм иныбжьыкIэхэм зэпхыныгъэ зэрадыриIэр. Анахьэу тыздэлажьэхэрэр Мыекъопэ къэралыгъо технологическэ университетым истудент-гуфакIохэр, дзэ-патриотическэ объединениеу «ЗыкIыныгъэм» ыкIи патриотическэ клубэу «Вертикаль» зыфиIорэм ялIыкIохэр, Юнармием хэтхэр.

Iэшъынэ Сусан.