Адыгеим икъыдэгъэкIэкIо хъызмэтшIапIэхэм ялIыкIохэр джырэблагъэ Абхъаз Республикэм щыIагъэх.  Экспортым IэпыIэгъу етыгъэнымкIэ Гупчэм ипащэу Дидыхъу Алый къызэриIуагъэмкIэ, лIыкIо купым хэтыгъэх санэ ыкIи коньяк зэрагъэхъорэ пхъэчайхэр къэзышIырэ хъызмэт­шIапIэу «Доля Ангела» зыфиIорэм, пынджыр, крупэхэр, шъоущыгъу ыкIи къэкIыхэрэм ахэшIыкIыгъэ дагъэр къы­дэзыгъэкIырэ «Прикубанскэ лотосым», электричествэкIэ унэхэр къэзыгъэфэбэрэ псэуалъэхэр къэзышIырэ хъызмэтшIапIэу «Никапанелс», пхъэм хэшIыкIыгъэу псэолъэшIыным щагъэфедэхэрэм яшIын пылъэу «Мастер-класс» зыфиIохэрэм яIофышIэхэр. МэфиплIым къыкIоцI Абхъаз Республикэм ипсэолъэшI ыкIи сэнэшI хъызмэтшIэпIэ 20-м е­хъумэ ялIыкIохэм аIукIагъэх. Ахэм ахэлэжьагъэхэм къызэраIуагъэмкIэ, зэдэгущыIэгъухэр зэрифэшъуашэм тетэу кIуагъэх, Адыгеим икIыгъэхэм япродукциеу нэIуасэ зыфашIыгъэхэр бысымхэм лъэшэу агу рихьыгъ, ашIогъэшIэгъо­ныгъ. Арышъ, экспортым IэпыIэгъу етыгъэнымкIэ Гупчэм иIофышIэхэм зэзэгъыныгъэхэм апае тхылъыбэ агъэхьазырынэу апэ зэрилъыр нафэ. Шъугу къэдгъэкIыжьын, экспортым IэпыIэгъу етыгъэнымкIэ Гупчэм ащ фэдэ Iофтхьабзэхэр бэрэ зэхещэх. Мары охътэ благъэм Адыгеимрэ Азербайджанрэ яхъызмэтшIапIэхэм ялIыкIохэр зэIуагъэкIэнхэм ащ ипащэхэр ыуж итых.