Федеральнэ проектэу «Профессионалитет» зыфиIорэм къыдыхэлъытагъэу АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцэкIэрэ Евгений Лебедевыр, Адыгэ къэралыгъо университетым иректорэу Мамый Даутэ, гурыт сэнэхьат зыщарагъэгъотырэ еджапIэхэм, лъэныкъо зэфэшъхьафхэмкIэ IофшIэпIэ чIыпIэхэр къязытырэ организациехэм япащэхэр зэзэгъыныгъэ тхылъым кIэтхагъэх. Ащ ишIуагъэкIэ шъолъырым нахь ищыкIэгъэ специалист ныбжьыкIэхэр рагъэджэнхэ амал щыIэ мэхъу. [caption id="attachment_134534" align="aligncenter" width="800"] А. Iэшъын.[/caption] 2030-рэ илъэсым нэс хэгъэгум социальнэ-экономикэ хэхъо­ныгъэ ышIыным фэIорышIэрэ гухэлъ 42-мэ «Профессионалитет» зыфиIорэр ащыщ. Уры­сыем и Президентэу Владимир Путиным ар игукъэкIыхэм ащыщ. Пшъэрылъ шъхьаIэу проектым иIэр бизнесым илIыкIохэр гъэсэныгъэм исистемэ хэхъоныгъэ ышIыным къыхэлэжьэнхэр ары. «Профессионалитетым» истудентхэр охътэ кIэкIым джырэкIэ нахь ящыкIэгъэ сэнэхьатхэм афагъэсэщтых, специалист дэгъу хъунхэм дэлэжьэщтых. Хэгъэгум ишъолъыр 55-мэ ягъэсэныгъэ организацие 619-рэ ыкIи лъэныкъо зэфэшъхьафхэмкIэ предприятие 55-рэ мы проектым хэлажьэ. МашинэшIынымкIэ, мэкъу-мэщымкIэ, металлургиемкIэ, мэшIокугъогу транспортымкIэ ыкIи нэмыкIхэмкIэ кластерхэр зэхащагъэх. «Профессионалитет» зыфи­Iорэ проектым къыдыхэлъытагъэу Адыгэ къэралыгъо университетым и Мыекъопэ къэралыгъо гуманитар-техническэ колледж гъэсэныгъэ кластерэу «Адыгэ Республикэм зекIонымкIэ ыкIи фэIо-фашIэхэмкIэ ягъэ­сэныгъэ гупч» зыфиIорэр къыщызэIуа­хыгъ. Кластерым хэла­жьэхэрэм ыкIи шъолъырым иэкономикэ хэхъоныгъэхэр ашIынхэмкIэ ищыкIэгъэ специалистхэм ягъэ­хьазырын фэIорышIэу федеральнэ проектым ипрограммэ гъэп­сыгъэ хъущт. Колледжым къы­хьы­гъэ грантым ишIуагъэкIэ гъэсэныгъэ площадкэхэр агъэ­псыщтых, студентхэр ащ щеджэщтых. [caption id="attachment_134535" align="aligncenter" width="800"] А. Iэшъын.[/caption] Федеральнэ проектым къыдыхэлъытагъэу лъэныкъуитфыкIэ ныбжьыкIэхэр агъэхьазырыщтых: «Туризм и гостеприимство», «Поварское и кондитерское дело», «Повар, кондитер», «Конструирование, моделирование и технология изготовления изделий легкой промышленности» ыкIи «Физическая культура». Кластерым хэхьагъэх Адыгэ къэралыгъо университетыр, Дондуковскэ мэкъумэщ технику­мыр, Красногвардейскэ аграрнэ-промышленнэ техникумыр, Мыекъопэ политехническэ кол­­леджыр ыкIи пшъэдэкIыжьэу ахьырэмкIэ гъунэпкъэ гъэнэфагъэ зиIэ обществэхэу «Минотавр, «Кофе Фреш», «Оштен Тур», «Интурист Адыгея», «Хати Групп», «Лоо», «Лагона­ки», «Оргтехсервис» ыкIи унэе предприятие зэфэшъхьафхэр. — Непэрэ Iофтхьабзэм мэхьанэшхо иI, зэзэгъыныгъэм ишIуагъэкIэ тиреспубликэ нахь ищыкIэгъэ специалистхэр дгъэ­хьазырыщтых. ЗекIоным зегъэ­ушъомбгъугъэнымкIэ, хьакIэхэм тишъолъыр нахь ашIогъэшIэгъо­нынымкIэ ащ ишIуагъэ къэкIощт. Джащ фэдэу специалист хьазыр­хэм IофшIэпIэ чIыпIэхэр агъо­тынхэр нахь IэшIэх къафэхъущт, — къыIуагъ Евгений Лебедевым. Мыекъопэ гуманитар-техническэ колледжым ипащэу Бгъо­шэ Айдамэр къызэрэтиIуагъэмкIэ, федеральнэ проектым игрант къызэрахьыгъэм ишIуагъэкIэ мы лъэныкъом зырагъэ­ушъомбгъущт. Сомэ миллион 70-у къаратыгъэм ишIуагъэкIэ ящыкIэгъэщт Iэмэ-псымэхэр зэрагъэгъотыщтых. ЗекIоным ыкIи ащ епхыгъэ фэIо-фэшIэ зэфэшъхьафхэм ягъэцэкIэн еп­хыгъэу студентхэр рагъэджэщтых. Кластерым хэхьагъэхэм гъэсэныгъэ программэхэр зэхагъэуцощтых. Республикэм нахь ищыкIэгъэ специалистхэр агъэхьазырынхэ амал щыIэ зэрэхъугъэм мэхьэнэ ин зэриIэр пащэм къыхигъэщыгъ. ДЕЛЭКЪО Анет.