Дунэе экономическэ форумэу Петербург щыкIорэм Адыгэ Республикэмрэ фирмэу «1С» зыфиIорэмрэ къэбарлъыгъэIэс тех­ноло­гиехэм алъэныкъокIэ зэдэ­лэжьэныгъэм фэгъэхьыгъэ зэзэгъыныгъэ щызэдашIыгъ. Тхылъым аIапэ кIадзэжьыгъ АР-м экономикэ хэхъоны­гъэмкIэ ыкIи сатыумкIэ иминистрэу Шэуджэн За-уррэ мы фирмэм ипащэу Борис Нуралиевымрэ.

Зэзэгъыныгъэм къыделъытэ къэбарлъыгъэIэс технологиехэмкIэ, къэралыгъо гъэIорышIэным исистемэ нахь шIогъэ ин къегъэтыгъэнымкIэ программэ платформэу «1С: Предприятие» зыфиIорэр агъэфедэзэ шIэныгъэхэмкIэ ыкIи опытэу аIэкIэлъ хъугъэмкIэ зэ­хъожьынхэр.

Зэдэлэжьэныгъэм илъэныкъо шъхьа­Iэу хъущт шъолъыр проектэу «Цифрэ экономикэм пае кадрэхэр» зыфиIорэр пхырыщыгъэныр. Республикэм иеджапIэхэм атегъэпсыхьагъэу гъэсэныгъэм ылъэныкъокIэ къэбарлъыгъэIэс тех­нологиехэм япхыгъэу Iоф зышIэщт кадрэхэр уахътэм диштэу гъэхьазырыгъэн­хэм а зэзэгъыныгъэр тегъэпсы­хьагъ.

Зэдэлэжьэныгъэм фэгъэхьыгъэ зэзэгъыныгъэм кIэтхэнхэм ыпэкIэ Адыгеим и ЛIышъхьэ къыхигъэщыгъ цифрэ технологиехэм атетэу Iоф зэдашIэ зыхъукIэ лъэныкъуабэхэр псынкIэу зэшIохыгъэ хъунхэм иамал щыIэ зэрэ­хъущтыр.

«Цифровизацием зеушъомбгъу ыкIи шъолъырым нахь шIогъэ ин хэлъэу пэщэныгъэ дызехьэгъэнымкIэ уахътэм диштэрэ амалхэр гъэфедэгъэнхэу пшъэрылъ къегъэуцу. Тэ зэрэтлъытэрэмкIэ, «1С-м» зэдэлэжьэныгъэу дытиIэщтым ишIуагъэ къэкIощт республикэм цифрэ технологиехэмкIэ Iофыгъоу къитаджэхэрэр зэшIохыгъэнхэмкIэ, республикэм пэщэныгъэ дызехьэгъэнымкIэ ыкIи опытышIоу щыIэ хъугъэр гъэфедэгъэнымкIэ», — къыIуагъ КъумпIыл Мурат зэзэгъыныгъэм къытегущыIэзэ.

«ЗэрэтлъытэрэмкIэ, тизэдэлэжьэныгъэ ишIуагъэ къэкIощт шъолъырым цифрэ технологиехэмкIэ амалэу иIэхэм джыри нахь заушъомбгъунымкIэ. Финанс-хъызмэт IофшIэным фэгъэхьыгъэ къэбарыр зы чIыпIэм щызэIугъэкIэгъэным амал къы­тыщт Адыгеим и Правительствэ унашъохэр штэгъэнхэмкIэ къэбарыр игъом IэкIэхьанэу. А пстэуми япхыгъэу бюджет ахъщэри хэпшIыкIэу нахь кIэугъоягъэ хъущт», — къыхигъэщыгъ Борис Нуралиевым.