Хьыкум приставхэм я Мыекъопэ къэлэ отдел иIофышIэ унашъоу ышIыгъэм ишIуагъэкIэ тазыр пчъагъэ зытелъыгъэ хъулъфыгъэм зэIуигъэкIэгъэ чIыфэр къырагъэпщыныжьыгъ. Мыекъуапэ щыпсэурэ хъулъфыгъэм административнэ хэбзэукъоныгъэу зэрихьагъэхэм къакIэлъыкIоу сомэ мини 160-м ехъу зытефэрэ Iофи 184-рэ къы­фызэIуахыгъ. Ащ изэхэфын къыдыхэлъытагъэу хьыкум приставхэм чIыфэ зытелъым мылъкоу иIэр зэрагъэшIагъ. Нэужым ащ автотранспорт тетхагъэу агъэу­нэфыгъ. Хъулъфыгъэм ар ыгъэфедэн фимытынэу ыкIи исчет арест тыралъхьанэу хэбзэухъумакIохэм унашъо ашIыгъ. Пшъэрылъыр зимыгъэцакIэкIэ кIэух дэй фэхъун зэрилъэкIыщтыр ащ къыгурыIуагъ ыкIи чIыфэу телъыгъэр зэкIэ къыпщыныжьыгъ, ащкIэ Iофыр зэфашIыжьыгъ. Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.