ДзэкIолIэу ущытыным фэшI лIыхъужъныгъэ ыкIи лIыблэнагъэ пхэлъын фае. Ахэр инэшанэх непэ нэIуасэ шъузыфэсшIыщт кIалэм. Ар зихэгъэгу фэшъыпкъэу, къыткIэхъухьэрэ ныбжьыкIэхэмкIэ щысэтехыпIэу щыт Тыу Замир Мухьарбый ыкъор. [caption id="attachment_134394" align="aligncenter" width="800"] З. Тыум ихъарзынэщ[/caption] Замир зэри­лъытэрэмкIэ, дзэкъулыкъу­шIэхэм пшъэрылъ шъхьаIэу яIэр я Хэгъэгу къаухъу­мэныр, зыщыщ­хэм, зыфэдэ цIыф лъэпкъхэм ямы­лъытыгъэу мамыр цIыфхэр къагъэ­гъунэнхэр ары. Замир ицIыкIугъом къыщыублагъэу дзэм фэгъэхьыгъэ фильмхэм яплъыныр, тхылъхэм яджэныр икIасэу къэтэджыгъ ыкIи гурыт еджапIэм чIэсызэ ышIэщтыгъ ищыIэныгъэ дзэм зэрэрипхыщтыр. ЕджапIэр къы­зеухым ыгу джэнджэш къимыхьэу Ставрополь апшъэрэ дзэ авиационнэ инженернэ училищэу маршалэу В. А. Судец ыцIэ зыхьырэм (дзэ институтым) чIэхьагъ. 2008-рэ илъэсым ар къызеухым КъокIыпIэ Чыжьэм, Амурскэ хэкум ит поселкэу Се­рышевым къулыкъур щи­хьы­нэу агъэкIуагъ, ТУ-95 МС-м исэу шъолъырыр къыбыбы­хьагъ. 2015-рэ илъэсым Краснодар краим ит къалэу Кореновскэ къащэжьыгъ, я 55-рэ хэушъхьафыкIыгъэ вертолетнэ полкым къулыкъур щихьыгъ. Замир Шам (Сирием) щыкIогъэ зэпэуцужьым хэлэжьагъ. ПшъэдэкIыжьышхо зыпылъ Iофым лIыблэнагъэ зэрэщызэрихьагъэм фэшI зыухъумэжьынымкIэ Министерствэм медалэу «Шам(Сирием) щыкIогъэ зэпэуцужьым хэлэжьагъ» зыфиIорэр къыфигъэшъошагъ. Джащ фэдэу медалэу «За боевое отличие» ыкIи медалэу «За воинскую доблесть» зыфиIорэм я 2-рэ шъуашэ къыратыгъэх. ХэушъхьафыкIыгъэ дзэ операциер зыщыкIорэ апэрэ мафэм къыщыублагъэу Замир щытхъу хэ­лъэу къулыкъур ехьы, непэ къызнэсыгъэм дзэ пшъэ­рылъэу къыфагъэнэфагъэхэр дэх имыIэу егъэ­цакIэх. Замир къызэрэ­тиIуагъэм­кIэ, ащ ипшъэрылъхэм ахэхьэ авиационнэ техникэм игъэцэ­кIэжьын. Верто­летхэм ятехническэ зытет лъэп­лъэ, щы­кIагъэ зиIэхэр егъэцэкIэ­жьых. Апэрэ кIогъум илъэсныкъорэ къэтыгъ, нэужым къагъэкIожьи мэзитIурэ зигъэпсэфыгъ. Джыри бэшIагъэп къызыкIожьыгъэр, зызэблахъузэ ашIы, къеджэхэмэ ыгъэзэжьынэу хьазыр. Замир къызэриIуагъэмкIэ, дзэкъулыкъушIэхэм пшъэрылъ шъхьаIэу яIэр я Хэгъэгу къаухъумэныр, зыщыщхэм, зыфэдэ цIыф лъэпкъхэм ямылъытыгъэу мамыр цIыфхэр къагъэгъунэнхэр ары. — Пшъэрылъэу къагъэуцу­гъэм изэшIохын ренэу уфэхьазырын фае, — еIо Замир. Iоф мыпсынкIэр ыгъэцакIэзэ, и Хэгъэгу ыкIи мамыр цIыфхэр къэзыухъумэхэрэ Замир къыгурэIо иунагъо, янэ-ятэхэр ыкIи исабыйхэр ренэу къызэрэпаплъэхэрэр, къызэрежэхэрэр. Замирэрэ ишъхьэгъусэу Заре­мэрэ сабыищ зэдапIу, тхьама­фэкIэ узэкIэIэбэжьмэ ящэнэрэ шъэожъыер къафэхъугъ. На­хьыжъитIур кIэлэцIыкIу IыгъыпIэм макIох. ИкIалэхэр ятэ рэгушхох ыкIи ащ фэдэу гушхо­ныгъэ ахэлъэу, лIыбланэ хъунхэу фаех. Замир ятэрэ янэрэ якIалэ лъагъоу къыхихыгъэм дыра­гъаштэ, лIыблэнагъэу хэлъым рэгушхох ыкIи хэткIи ар щысэтехыпIэ хъунэу мэгугъэх. КIАРЭ Фатим