Адыгэ Республикэм хэгъэгу кIоцI IофхэмкIэ и Министерствэ иветеранхэм я Совет епхыгъэ организациехэм 2022-рэ илъэсым Iофэу ашIагъэм зэфэхьысыжьхэр фа­шIы­гъэх, ащ фэгъэхьыгъэ зэхэсыгъор Адыгэкъалэ щыкIуагъ. Анахь Iофыбэ зыгъэцэкIагъэу къыхагъэщыгъэр АР-м хэгъэгу кIоцI IофхэмкIэ и Министерствэ хэхьэрэ муниципальнэ отделэу «Адыгейский» зыфиIорэр ары. Щытхъур къэзылэжьыгъэхэр къы­хэгъэщыгъэнхэм фэгъэхьыгъэ мэ­фэкI зэхахьэр отделыр зыдэщыIэ шъолъырым щыкIуагъ. Ащ хэлэжьагъэх отделым ипащэу, полицием иподполковникэу Руслан Мерчановыр, ветеранхэм я Советэу шъо­лъырым щыIэм илIыкIохэр ыкIи подразделением хахьэхэрэр. ЗэIукIэм къыщыгущыIагъэх ­Адыгэ Республикэм и МВД иветеранхэм я Совет итхьаматэу ХъутIыжъ Аз­мэт, организацием хэтхэу Николай Кисилевымрэ Ирина Плетневамрэ. Ветеранхэм яIофшIэн мэхьанэу иIэр, ар министерствэ кIоцIым фэгъэхьыгъэми, общественнэ организациехэм азыфагуми зэрэ­лъэшыр къыхигъэщыгъ къулыкъу­шIэхэм адэлэжьэгъэнымкIэ МВД-м и ГъэIорышIапIэ ипащэу, полицием иполковникэу Лариса Шубинам. ШIуфэс псалъэ къышIызэ ащ къы­Iуагъ непэрэ мафэми ветеранхэм я Совет хэтхэм япшъэрылъ зэрэзэмыхъокIыгъэр, бзэджэшIагъэхэр щыгъэзыегъэнхэм зэрэпылъхэр. Ащ фэшъхьафэу, бзэджэшIагъэ­хэр къэмыхъунхэм фытегъэпсыхьэгъэ Iофтхьабзэу ветеранмэ рагъэ­кIокIыхэрэр, ахэр ныбжьыкIэмэ зэраIукIэхэрэр, ухъумэкIо къулыкъухэм фыщытыкIэ дэгъу къафыряIэным обществэр зэрэфащэрэр щытхъукIэ афэплъэгъунэу зэрэщытыр къыкIигъэтхъыгъ Руслан Мерчановым. ТапэкIэ Iофэу ашIэщтхэми зэ­Iу­кIэм щатегущыIагъэх. ХъутIыжъ Азмэт къызэриIуагъэмкIэ, ветеранхэм яорганизациехэм анаIэ нахь тырагъэтын фае полицием къы­хэхьэгъэ ныбжьыкIэхэр патриотхэу гъэсэгъэнхэм, илъэс пчъагъэрэ сэнэхьатым рылэжьагъэхэм ахэр зыдагъэсэнхэр зэряпшъэрылъым. Къыхэгъэщыгъэн фае IофшIэным фэгъэсэгъэнхэмкIэ, бзэджэшIагъэу зэрахьагъэхэр къыхэгъэщыгъэнымкIэ ыкIи зыныбжь имыкъугъэхэм адэлэжьэгъэнымкIэ, патриотическэ IофшIэнымкIэ ветеран организа­циехэм Iофышхо зэрашIэрэр. Джа лъэныкъохэр ары ветеранхэм я Совет иотделэу «Адыгейский» зыфиIорэр 2022-рэ илъэсымкIэ анахь дэгъоу къызыкIагъэлъэгъуагъэр. Ащ Адыгэ Республикэм и МВД иветеранхэм я Совет зэIэпахырэ кубокэу иIэр къыфагъэ­шъошагъ. АР-м хэгъэгу кIоцI IофхэмкIэ и Министерст­вэ общественнэ зэпхыныгъэ­хэм­кIэ ыкIи къэбархэмкIэ иотдел.