2023-рэ илъэсым зэфэхьысыжьэу ашIыгъэхэм къызэрагъэлъэгъуагъэмкIэ, университетхэм ялъэпкъ рейтинг (НРУ) Адыгэ къэралыгъо университетым я 109-рэ чIыпIэр щиубытыгъ ыкIи университет анахь дэгъуишъэмэ «гъэсэныгъ» зыфиIорэ лъэныкъомкIэ ахэфагъ, я 68-рэ чIыпIэм иуцуагъ. «Ушэтынхэр» зыфиIорэ лъэныкъомкIи университетым хэхъоныгъэхэр ышIыгъэх, я 179-рэ чIыпIэу гъэ­рекIо зыдэщыIагъэм къикIи я 111-рэ чIыпIэм нэсыгъ. Купэу «Интерфакс» зыфиIорэм Урысыем ит уни­верситет 368-рэ мыщ фэдэ лъэныкъохэмкIэ ыуплъэкIу­гъэх: гъэсэныгъэр, ушэтынхэр, социальнэ лъэныкъор, зэдэлэжьэныгъэр, инновациехэр ыкIи предпринимательствэр, тамыгъэр. 2023-рэ илъэсым АКъУ-м балл пчъагъэу ригъэкъугъэр Московскэ къэралыгъо университетэу О. Е. Кутафиным ыцIэ зыхьырэм иIэм фэдиз, а чIыпIэр къадагощы Санкт­-Петербург къэралыгъо технологическэ университетымрэ Къыблэ-КъохьэпIэ къэралыгъо университетымрэ, рейтингымкIэ я 109 — 112-рэ чIыпIэхэм ахэр зэкIэ щыIэх. ЗэкIэмэ анахь гъэхъэгъэшхохэр тиапшъэрэ еджапIэ зыщишIыгъэхэр «гъэсэны­гъэр» зыфиIорэ лъэныкъор ары. Гъэсэныгъэ программэу агъэцакIэхэрэр, ахэм ядэгъу­гъэ, абитуриентмэ зэрадэлажьэхэрэр, шIэныгъэ-методическэ IофшIэнэу кIэлэ­егъаджэмэ ашIэрэр, гъэсэныгъэ фэIо-фашIэхэр, практикэр зэрэзэхэщагъэр, еджапIэмэ ыкIи кIэлэеджакIомэ зэрапылъхэр — джахэр ары рейтингым игъэнэфэнкIэ шап­хъэу аштагъэхэр. Университетмэ ялъэпкъ рейтинг фэгъэхьыгъэ Iофтхьабзэр купэу «Интерфаксым» зигъэцакIэрэр 2010-рэ илъэсым щегъэжьагъ. Хэгъэгум ит университетхэр зэкI пIоми хъунэу рейтингым къыха­гъэлажьэх: лъэпкъ ушэтэкIо университет 28-рэ, феде­ральнэу 10, «Приоритет 2030» зыфиIорэ программэм хэ­хьэрэ университет 98-рэ. Мыкъэралыгъо университети 7-мэ джащ фэдэу язытети ауплъэкIу. Илъэс къэс Адыгэ къэралыгъо университетым ирейтинг хегъахъо. Аужырэ илъэ­ситфыр пштэмэ, я 165-рэ чIыпIэм ар къикIыжьи я 109-рэ чIыпIэм къынэсыгъ. Лъэпкъ рейтингым уасэу университетхэм афишIыгъэр сайтэу academia.interfax.ru. ижъугъотэн шъулъэкIыщт. Адыгэ къэралыгъо университетым ипресс-къулыкъу