Ушэтыныр балли 100-кIэ
Гурыт еджапIэр къэзыухырэ ныбжьыкIэхэм атырэ зыкI къэралыгъо ушэтынхэм яапэрэ зэфэхьысыжьхэр къэнэфагъэх. Географиер, литературэр ыкIи химиер нэбгыри 6-мэ дэгъу дэдэу атыгъ. ХимиемкIэ нэбгыритIумэ, литературэмкIэ нэбгыриплIымэ балли 100 къахьыгъ.
[caption id="attachment_134311" align="aligncenter" width="581"] Мэрэтыкъо Данэ ихъарзынэщ.[/caption]
Адыгэ республикэ гимназиер къэзыухырэ Мэрэтыкъо Данэрэ Мыекъопэ гимназиеу N 5-м щеджэгъэ Алина Дрожжинамрэ химиемкIэ шIэныгъэ куухэр къагъэлъэгъуагъэх, балли 100 къахьыгъ. Мыекъопэ районым игъэсэныгъэ гупчэу N 4-р къэзыухырэ Людмила Грибенниковам, Мыекъопэ гурыт еджапIэу N 15-м щеджэгъэ Мэри Парсеговам, Тэхъутэмыкъое районым ит къуаджэу АдыгеякIэм дэт гурыт еджапIэу N 27-р къэзыухырэ Эда Акташ ыкIи Мыекъопэ лицееу N 34-м щеджэгъэ Тыгъужъ Аделинэ литературэмкIэ балли 100 къырахыгъ.
— ШIэныгъэм ылъэныкъокIэ гъэхъагъэу яIэхэр зыкI къэралыгъо ушэтыным изэфэхьысыжьхэм къагъэлъагъо. Сыгу къыздеIэу балли 100 къизыхыгъэхэм сафэгушIо, ыпэкIэ гъэхъэгъэшIухэр ашIыхэзэ ящыIэныгъэ гъогу рыкIонхэу сафэлъаIо. Бэ темышIэу нэмыкI предметхэми язэфэхьысыжьхэр къэнэфэщтых. Джыри шIэныгъэ куухэр тиныбжьыкIэхэм къызэрагъэлъэгъощтым тицыхьэ телъ, — къыIуагъ АР-м и ЛIышъхьэу КъумпIыл Мурат.
Мэри Парсеговам гущыIэгъу тыфэхъугъ, гъэхъагъэ зышIыгъэ пшъашъэм ыгу ихъыкIырэмкIэ къыддэгощагъ.
— Ушэтынхэм сишъыпкъэу зафэзгъэхьазырыгъ, ау балли 100 къэсхьыным сыщыгугъыгъэп, урысыбзэмкIэ балл 93-рэ изгъэкъугъ. Лъэшэу сэгушIо. СицIыкIугъом къыщегъэжьагъэу еджэныр сикIас, тхылъыр синыбджэгъу. Сшынахьыжъхэм афэдэу еджапIэм сызычIэхьагъэм къыщегъэжьагъэу тфы закIэкIэ сыщеджагъ, — еIо Мэри.
[caption id="attachment_134312" align="aligncenter" width="458"]
Мэрэтыкъо Данэ ихъарзынэщ.[/caption]
Пшъэшъэжъыер ишIэныгъэхэмкIэ сыдигъокIи къахэщыщтыгъ. Телевизионнэ къэтынэу «Умницы и умники» зыфиIорэм ар хэлэжьагъ, зэрифэшъуашэу зыкъыщигъэлъэгъуагъ. Москва экономикэмкIэ иапшъэрэ еджапIэ чIахьэ шIоигъу, дизайнер сэнэхьат зэригъэгъотынэу фай.
Джащ фэдэу Мыекъопэ республикэ гимназиер къэзыухырэ Мэрэтыкъо Данэ химиемкIэ балли 100, урысыбзэмкIэ балл 87-рэ къыхьыгъ. Биологиер мы мафэхэм дэгъоу ытыгъ, зэфэхьысыжьхэм яжэ.
Данэ гурыт еджапIэм зычIэхьагъэм къыщегъэжьагъэу анахь дэгъухэм ясатыр хэтэу еджагъ. Пшъэшъэжъыем предметхэр зэкIэ ыгу рихьэу, шъогъэшIэгъонхэу щыт. Гъэхъагъэу иIэхэмкIэ гимназием ипащэ, икIэлэегъаджэхэм, икласснэ пащэ зэрафэразэр къытиIуагъ. Еджэным имызакъоу еджапIэм щызэхащэрэ Iофтхьабзэхэм ахэлэжьэныр икIэсагъ. Пшъэшъэжъые чанэу, Iэдэб зыхэлъэу щыт. Данэ ищыIэныгъэ гъогу медицинэм рипхынэу рихъухьагъ, имурад къыдэхъунэу фэтэIо.