Партиеу «Единэ Россием» и Адыгэ шъолъыр къутамэрэ НыбжьыкIэ гвардиемрэ ялIыкIохэм къаугъоигъэ тхылъхэр Геническэ арагъэщагъ.

Адыгеим щыпсэухэрэр гуманитар IэпыIэгъум иугъоин сыдигъуи чанэу къыхэлажьэх. «Единэ Россием» ишъолъыр къутамэрэ НыбжьыкIэ гвардиемрэ зэгъусэхэу пчъагъэрэ тхылъхэр Геническэ районым ыкIи Мариуполь арагъэщагъэх. Iофтхьабзэу «Тхылъхэр – Донбасс пай» зыфиIорэм къыдыхэлъытагъэу Геническэ ит гъэсэныгъэм иучреждениехэм мы гуманитар IэпыIэгъур аIукIэщт.

— Мыекъуапэ щыпсэухэрэм яшIуагъэкIэ мэзэ имыкъум къыкIоцI тхылъ 1000 фэдиз къэтыугъоигъ. КраеведениемкIэ, тарихъымкIэ тхылъхэр, художественнэ ыкIи кIэлэцIыкIу литературэр Геническэ дэт гъэсэныгъэм иучреждениехэм къа­шъхьэпэщтых. Донбасс ыкIи шъхьафит ашIыжьыгъэ чIыпIэхэм ащыпсэухэрэм IэпыIэгъу афэхъугъэныр партиеу «Единэ Россием» илъэпкъ программэ ихэушъхьа­фыкIыгъэ едзыгъоу щыт. Мы Iофтхьабзэм къыхэлэжьагъэхэм зэкIэми тызэрафэразэр ясIомэ сшIоигъу, — къыIуагъ партиеу «Единэ Россием» и Генеральнэ совет хэтэу, Адыгеим и НыбжьыкIэ гвардие ипащэу Бэрзэдж Асиет.