Сэкъатныгъэ зиIэхэм ыкIи ветеранхэм яIофыгъохэмкIэ Советэу АР-м и ЛIышъхьэ дэжь щызэхащагъэм изэхэсыгъо джырэблагъэ щы­Iагъ. Iофтхьабзэр зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

Сэкъатныгъэ зиIэхэр щыIэныгъэм хэгъэгъозэжьыгъэнхэм, санаториехэм къащяIэзэнхэм ыкIи защагъэпсэфынхэм яIофыгъохэм зэхэсыгъом щытегущыIагъэх. УФ-м и Социальнэ фонд и Къутамэ иподразделениеу АР-м щыIэм ипащэу Мамрыкъо Людмилэ къызэриIуагъэмкIэ, сэкъатныгъэ зиIэхэм ящыкIэ­гъэщт техническэ пкъыгъохэр къыращэфынхэу мы илъэсым миллиони 172-м ехъу агъэнэфагъ. УФ-м и Социальнэ фонд сомэ миллиони 114-рэ къафитIупщыгъ, ащ щыщэу сомэ миллиони 112-р агъэфедагъ.

ЗэкIэмкIи Адыгеим щыпсэурэ нэбгырэ мини 4 фэдизмэ техническэ пкъыгъо мини 5-м ехъу къафащэфынэу лъэIу тхылъ­хэр къатыгъэх. Ащ щыщэу лъэIу мини 4,6-р гъэцэкIагъэ хъугъэ, ежь-ежьырэу техническэ пкъыгъохэр къэзыщэфы­гъэхэ нэбгырэ 224-м ахэм атефэгъэ ахъщэр аратыжьыгъ.

Техническэ пкъыгъохэм ахэ­хьэх бэщхэр, лъэщэ бэщхэр (костыльхэр), сэкъатхэр зэ­рысырэ курэжъыер, протезхэр, ортопедическэ цуакъэхэр, хэу­шъхьафыкIыгъэ щы­гъынхэр ыкIи хэушъхьафыкIыгъэ зэреджэщтхэ пкъыгъор, тэрэзэу зэхэзымы­хыхэрэм апае аппаратыр, нэмыкIхэри. Мыхэр къазэрафа­щэфыхэрэм нэмыкIэу афагъэцэкIэжьых, хьа­физэхэр къезыщэкIыхэрэ хьэ- хэм яфэIо-фашIэхэм атефэрэ ахъщэр араты.

ЯIофшIэн кIэу къыхэхьагъэ­хэм ащыщ сэкъатныгъэ зиIэхэр щыIэныгъэм хэгъэгъозэжьыгъэнхэмкIэ ящыкIэгъэщт техническэ пкъыгъохэр джы электроннэ сертификатыр къыз­фагъэфедэзэ къызIэкIагъэхьан зэралъэкIыщтыр. Мы шIыкIэм ишIуагъэкIэ охътэ кIэкIым къыкIоцI зэнэкъокъу хэмытэу ахэр къызIэкIагъэхьанхэ алъэ­кIыщт. Программэм хэлажьэ зышIоигъохэм УФ-м и Социальнэ фонд исайт инэкIубгъоу «Каталог технических средств реабилитации» зыфиIорэм ихьанхэшъ, ежь-ежьырэу зыфэе пкъыгъохэр къыхахынхэ амал яIэщт.

Мы мафэм ехъулIэу элект­роннэ сертификат 502-рэ гъэ­IорышIапIэм къыIэкIэхьагъ, ащ щыщэу 366-мэ ахэплъагъэх, 178-р агъэцэкIагъ. Ащ къыхэкIэу бэщхэр, лъэщэ бэщхэр, ортопедическэ цуакъэхэр, курэ­жъыехэр, нэмыкIхэр аIэкIагъэ­хьагъэх.

Iофыгъо шъхьаIэу зытегущы­Iагъэхэм ащыщ сэкъатныгъэ зиIэхэм санаториехэм къазэ­рэщяIазэхэрэм иIофыгъохэр. Путевкэхэм якъэщэфын пае сомэ миллион 13 фэдиз къафатIупщыгъ, путевкэ 211-рэ аратыгъ. Арэу щытми, непэ нэбгырэ мин 1,2-рэ чэзыум хэт, гъэрекIо путевкэ къызэраты­гъэхэр зэрахэтэу. ЩыIэныгъэм къызэригъэлъагъорэмкIэ, фэ­гъэкIотэныгъэ зиIэхэр илъэситIум зэ санаторием кIонхэ алъэкIы.

Хэбзэ къулыкъум илIыкIохэр ыкIи зипсауныгъэкIэ фы­къуагъэ зиIэ цIыфхэм Iоф адэзышIэрэ организациехэм яIофышIэхэр сэкъатныгъэ зи­Iэхэр щыIэныгъэм хэгъэгъо­зэжьыгъэнхэм ыкIи санато­риехэм къазэрэщяIазэхэрэм, фэгъэкIотэныгъэ зиIэ цIыфхэм Iэзэгъу уцхэр аIэкIэгъэ­хьэгъэным ыкIи транспортымкIэ Iэрыфэгъоу къекIокIынхэм яIофыгъохэми зэхэсыгъом щытегущыIагъэх. Джащ фэдэу зипсауныгъэ пыч фэхъугъэхэр культурнэ Iофтхьабзэхэм ахэлэжьэнхэмкIэ ыкIи обществэм ахэр хэгъэгъозэжьыгъэнхэмкIэ анахьышIоу зиIофшIэн зэхэзыщэхэрэм къатегущыIа­гъэх.