Мыекъуапэ къыщызэIуахыгъэ лагерьхэм япащэхэм рагъэблэгъагъэхэу Адыгеим икъэ­зэкъ ныбжьыкIэхэм я Союз хэтхэм зыгъэпсэфыпIэхэр къакIухьэх. 

БлэкIыгъэ тхьамафэм, мэ­къуогъум и 9-м, поселкэу Подгорнэм дэт еджапIэу N 14-м щыIагъэх. КIэлэеджакIоу ащ илагерь зыщызгъэпсэфыхэрэм къэзэкъхэр хэушъхьафыкIыгъэ дзэ операцием зэрэхэлажьэ­хэрэр къафаIотагъ, джэгукIэ зэ­фэшъхьафхэр арагъэлъэгъугъэх.

Апэрэ медицинэ IэпыIэгъур зэряптыщтым лъэшэу кIэлэцIыкIухэр ашIогъэшIэгъонэу къедэ­Iугъэх, бронежилетыр, каскэр зы­щалъэхэзэ сурэтхэр зытыра­хыгъэх, уIагъэ зытелъыр зэуапIэм къырахыжьыгъэх, — къы­Iуагъ хэушъхьафыкIыгъэ дзэ операцием хэлажьэу, къэзэкъхэм яобществэ и Мыекъопэ отдел иатаманэу Александр Роговым.

Джащ фэдэу Урысыем и Мафэ ипэгъокIэу, гурыт еджапIэу N 13-м щыIагъэх. МэфэкIым фэгъэхьыгъэу викторинэ гъэшIэгъон кIэлэцIыкIухэм афызэхищэгъагъ Адыгеим икъэзэкъ ныбжьыкIэхэм я Союз итхьаматэу Екатерина Загорулько.

Мыщ зыщызгъэпсэфырэ кIэлэеджакIохэми апэрэ медицинэ IэпыIэгъур зэряптыщтыр, къау­Iагъэр зэуапIэм къызэрипхы­жьыщтыр къафаIотагъ, джэгу­кIэхэр арагъэлъэгъугъэх. Iоф­тхьабзэм икIэухым Союзым ита­мыгъэ зытешIыхьэгъэ шIу­хьафтын цIыкIухэр аратыгъэх.

Мыщ фэдэ зэIукIэгъухэм язэ­хэщэн чанэу хэлажьэх къэзэкъ ныбжьыкIэхэм я Союз хэтхэу Валерий Гущиныр, Роман Мои­сеенкэр, Афина Ткачевар ыкIи Екатерина Загорулькэр.