ЗекIо уахътэу къэблэгъагъэм ехъулIэу Iофтхьабзэу «ЭкоХод 01» зыфиIорэм хэлажьэрэмэ гъэхъунэу «ТайванькIэ» заджэхэрэм дэжь хэкIыр къыщаугъоигъ, а чIыпIэр ары зэлъашIэрэ лъэсрыкIо гъогуи­щыр къызщежьэхэрэр.

Адыгэ къэралыгъо университетым ипроектэу «Адыгеир — псауныгъэм ишъолъыр» зыфи­Iорэм къыдыхэлъытагъэу Iоф­тхьабзэу «ЭкоХод 01» зыцIэр зэхащагъ, ащ IэпыIэгъу къы­фэхъугъ чIыопс паркэу «Тхьа­кIышхур». Iофтхьабзэм хэлэ­жьагъэх АКъУ-м естествознаниемкIэ ыкIи социальнэ тех­нологиехэмрэ зекIонымрэкIэ яфакультетхэм ястудентхэр. Ахэм пыдзэфэ дзыуищ фэдиз къаугъоигъ, нахьыбэмкIэ ахэр пластикым хэшIыкIыгъэ бэшэ­рэбхэмрэ цэф пкъыгъохэмрэ, ахэр джыри илъэс 200-рэ зэхэмызхэу чIыопсым хэлъыщты­гъэх. ЛъэсрыкIо гъогумэ язы­рэр къызщежьэрэм нэс хэкIыр аугъоизэ студентхэр километри 8-у лъыкIотагъэх. ЛъэсрыкIо гъогур агъэхьазырыгъэ къодыеп, ежьхэми аIэпкъ-лъэпкъхэр апсы­хьагъэх, купым хэтхэу узэрэзекIон фэе шапхъэри зэрагъэшIагъ. КъызэрэнэфагъэмкIэ, гъогум тетыхэфэ зекIохэм нахь пшъэдэкIыжь къызхагъафэ. — Гъогум хэкIэу телъыр нахь макIэ хъугъэ, сыда пIомэ зе­кIомэ ащ къытыранэрэр нахь макIэ ашIыгъ, зыдыIуахыжьыгъ. Пыдзафэхэр пакетмэ аралъ­хьэшъ, дгъэнэфэгъэ чIыпIэу псэупIэу Новопрохладнэм дэтым къырахьылIэжьых. Экологием икультурэ зекIохэр фэзыпIухэ­рэр Iофтхьабзэу Адыгеим иапшъэрэ еджапIэхэм зэхащэ­хэрэр ары. Джащ пае мыщ фэдэ акциехэм адетэгъаштэ ыкIи ахэр рагъэкIокIынымкIэ IэпыIэгъу тафэхъу, — къыIотагъ чIыопс паркэу «ТхьакIышху» зыфиIорэм ипащэу Шэуджэн Инвер. Iофтхьабзэр окIофэ университетым икIэлэегъаджэмэ паркым къыщыкIырэ лъэпкъ зэфэшъхьафхэу макIэ хъугъэхэр къыхагъэщыгъэх, ахэр апшъэрэ еджапIэм ибиоресурснэ хъарзынэщ зэрэхагъэхьащт шIыкIэр къагъэлъэгъуагъ. — ЧIыопсым студентхэр нэ­Iуасэ фэшIыгъэнхэр акцием къыдыхэтлъытагъ. ЧIыопс паркым нэIуасэ зыфэтшIыгъэ ­къо­дыеп, ащ къыщыкIырэ уц лъэпкъ­хэр, къыщекIокIырэ псэу­шъхьэхэр зыфэдэхэр зэдгъэшIагъэх, техническэ Iэмэ-псымэхэр къызфэдгъэфедэхэзэ уплъэкIунхэр тшIыгъэх. КъэпIон хъумэ, лъэныкъуабэ къызэлъызыубытырэ IофшIэн редгъэкIокIыгъ, — къыIотагъ АКъУ-м физиологиемкIэ икафедрэ ипро­фессорэу Максим Шапова­ловым. Шъугу къэдгъэкIыжьын, Iоф­тхьабзэу «ЭкоХод 01» зыфи­Iорэм иапэрэ дэкIыгъо мэ­лылъфэгъу мазэм тефэгъагъ. А уахътэм студентмэ зыгъэпсэфыпIэ чIыпIэу «ПытапIэ» зыфи­Iорэр аукъэбзыгъагъ, ар Мэз­дахэ дэжь зыдэщыIэр. «Адыгеир — псауныгъэм ишъолъыр» зыфиIорэ проектыр Адыгэ къэралыгъо универси­тетым егъэцакIэ, ар программэу «Приоритет 2030-м» къыдыхэлъытагъ. Проектыр зыфэгъэ­загъэр шъолъырым щыпсэурэ цIыфхэм ящыIэкIэ-псэукIэ на­хьышIу шIыгъэныр ыкIи къа­гъашIэрэм зэрэхагъэхъощтым пылъынхэр ары. ЦIыфхэм япсау­ныгъэ къаухъумэным фэшI ахэр физическэ культурэм, спортым пыщэгъэнхэм, мыхьамел къа­бзэхэр агъэфедэнхэм мэхьа­нэшхо яI. ЗекIоным, экологием язытет ягъэшIэгъэныр, япсауныгъэ фэсакъынхэр, нэмыкI­- хэри проектым къыдыхэлъы­тагъэх.

Адыгэ къэралыгъо университетым ипресс-къулыкъу