ЧIыфэхэм къахэкIэу псэупIэхэм элек­три­чествэу якIуалIэрэр нахь макIэ ашIынэу е зэпагъэунэу цIыфхэм макъэ къара­гъэ­Iугъэмэ, ахэм ашIэн фаер электро­энергиер къэзытIупщырэ компанием къеIуатэ.

Хабзэу щыIэмкIэ, ащ фэдэ макъэ къызэрагъэIущтымкIэ шIы­кIэ зэфэшъхьафыбэ щыI: письмэкIэ, телефонымкIэ, электроннэ почтэмкIэ е «ТНС энерго» зыфиIорэм иунэе кабинет къырагъэхьащт. Ащ фэшъхьафэу, чIыфэр зыфэдизыр квитанцием иаужырэ сатырэ компанием къыщыхеуты. Джащ пае «ТНС энерго Кубань» зыфи­Iорэм къеIопщы къэбарым нахь тэрэзэу цIыфхэм анаIэ тырадзэн зэрэфаер.

2023-рэ илъэсым ижъоны­гъокIэ мэзэ закъо компанием шIыкIэ зэфэшъхьафхэмкIэ нэбгырэ мин 85-мэ макъэ ар­и­гъэIугъ, зэхэубытагъэу ахэм чIыфэу сомэ миллион 309-рэ ателъ. Электроэнергие зыфыпаупкIыхэрэр пIэлъэ гъэнэфагъэм къафалъытэрэм фэдитIукIэ шъхьадэкIыгъэхэ зыхъукIэ ары.

Макъэ зэрагъэIугъэ цIыфым мэфэ 30 фэдиз иI чIыфэр ыпщыныжьынымкIэ, ар зимыгъэцакIэкIэ электричествэу ратырэр зэпагъэущт. Ащ Iофыр ухы­гъэ щыхъурэп, токыр зэрэпаупкIырэм ыкIи къызэрэпагъэ­нэжьырэм апае сомэ мини 3 джыри цIыфым ытын фаеу мэхъу. Ащ фэшъхьафэу тазыр­хэр, процентхэр ахъщэ чIыфэм техъощтых.

«ТНС энерго Кубань» зыфиIорэм исайт чIыфэ птелъмэ щызэбгъэшIэн плъэкIыщт, ащ хэушъхьафыкIыгъэ сервисэу «Узнать есть ли задолженность» зыфиIорэм иамалхэр къызфэбгъэфедэн амал щыI. Ежь сайтым иреестрэ чIыфэ зытелъэу макъэ зэрагъэIугъэхэм ясчетхэр къыщыхаутых.

ПАО «ТНС энерго Кубань» зыфиIорэм ипресс-къулыкъу