Шыблэм ыукIыгъ
УФ-м и Следственнэ комитет иследственнэ ГъэIорышIапIэу АР-м щыIэм Мыекъопэ районымкIэ иследственнэ отдел къалэу Новороссийскэ зекIоу къикIыгъэ бзылъфыгъэу илъэс 26-рэ зыныбжьым идунай зэрихъожьыгъэм епхыгъэ уплъэкIунхэр зэхищагъэх.
ПэшIорыгъэшъэу зэрагъэунэфыгъэмкIэ, 2023-рэ илъэсым мэкъуогъум и 10-м зекIо купэу нэбгырэ 38-рэ хъурэр зы мафэкIэ къушъхьэхэр зэрагъэлъэгъунхэу Адыгеим къеблэгъагъэх. ЗекIо щыIэхэзэ ом изытет ошIэ-дэмышIэу къызэIыхьагъ, пчыкIэм игъусэу ощх къыригъэжьагъ. Абдзэхэ къушъхьэтхым дэжь зекIо купым хэтыгъэ бзылъфыгъэу илъэс 26-рэ зыныбжьым шыблэр къеуагъ, гукъау нахь мышIэми, а чIыпIэм ащ идунай щихъожьыгъ. Мы мафэхэм бзылъфыгъэр зэрэхэкIодагъэм епхыгъэ уплъэкIунхэр рагъэкIокIых, мы хъугъэ-шIагъэр нэрылъэгъу зыфэхъугъэхэм яупчIых, хьыкум-медицинэ экспертизэ ашIы. Ащ кIэухэу фэхъугъэм елъытыгъэу процессуальнэ унашъо ашIыщт.