Мэкъуогъум и 12-м Адыгеим имуниципальнэ псэупIэхэм мэфэкI концерт ащыкIуагъ, лъэпкъ нэшанэ зиIэ щагухэр, къэгъэлъэгъонхэр къащызэIуахыгъагъэх, шIушIэ марафонхэр, флешмобхэр, Урысыем и Мафэ фэгъэхьыгъэ нэмыкI Iофтхьабзэхэр ащызэхащагъэх. Урысые Iофтхьабзэу «Российский триколор» зыфиIорэм къыдыхэлъытагъэу гуфакIохэм Урысыем ибыракъ ышъо фэдэ зиIэ лентэхэр цIыфхэм афагощыгъэх.

[caption id="attachment_134209" align="aligncenter" width="800"] А.Гусев[/caption] Адыгеим и ЛIышъхьэу КъумпIыл Мурат мэфэкIым хэлэжьагъ. Джащ фэдэу рес­публикэм ихабзэ игъэцэкIэкIо, ихэбзэ- ихъухьэ къулыкъухэм, общественнэ организациехэм ялIыкIохэр, шъолъырым исхэр Iофтхьабзэхэм ахэлэжьагъэх. Iофтхьэбзэ шъхьаIэхэр зыщыкIуагъэхэр Мыекъуап ары. Кушъхьэфэчъэ марафонкIэ ахэр рагъэжьагъэх. Мы мафэм тематическэ концертхэр, викторинэхэр, мастер-классхэр, джэгукIэ, зэнэкъокъу зэфэшъхьафхэр зэхащагъэх. МэфэкIым хэлэжьагъэхэм сурэткъэгъэлъэгъонэу «Великая Россия» зыфиIоу цIыфхэмрэ чIыопсымрэ атырахыгъэ сурэтхэр зыхэтыгъэхэр ашIогъэшIэгъоныгъ. Адыгэ Республикэм илъэпкъ-культурэ общественнэ объединениехэм ящагухэм якъэгъэлъэгъон Лениным ипчэгу къыщызэIуахыгъагъ. Лъэпкъ шъуашэхэр нэбгырабэмэ ащыгъыгъ. Лъэпкъ-культурэ общественнэ объединениехэм ялIыкIохэр Урысыем и МафэкIэ цIыфхэм къафэгушIуагъэх, тихэгъэгу щыпсэурэ лъэпкъ­хэм якультурэ, яшэн-хабзэхэм, яIэшIагъэхэм, ягъэхъагъэхэм нэIуасэ зафа­шIынэу ящагухэм къарагъэблагъэщты­гъэх. НыбжьыкIэ флешмобэу мыщ щыкIуагъэм Урысыем ибыракъ щагъэ­Iагъ. Урысыем и Мафэ республикэм иартистхэмрэ итворческэ коллективхэмрэ мэфэкI концертышхо къатыгъ, шIушIэ марафонэу «Народнэ фронт. ЗэкIэ ТекIоныгъэм пай!» зыфиIорэр зэхащэгъагъ. ЦIыфхэм амал яIагъ фондэу «ЗэкIэ ТекIоныгъэм пай!» зыфиIорэм исчет рагъэхьащт мылъкум яIахь халъхьанэу. А мылъкумкIэ дзэкъулыкъушIэхэм ящыкIэгъэ Iэзэгъу уцхэмрэ нэмыкI пкъыгъохэмрэ къащэфыщтых. Шъугу къэтэгъэкIыжьы мыщ фэдэ апэрэ марафоныр Хэгъэгум иухъумакIо и Мафэ ехъулIэу зэрэзэхащэгъагъэр. Джащыгъум Адыгеим исхэм дзэкъулыкъушIэхэмрэ Донбасс щыпсэу­хэрэмрэ апае сомэ миллиони 7-м ехъу къаугъоигъагъ. АР-м и ЛIышъхьэ хэгъэгумрэ респуб­ликэмрэ ащыпсэурэ лъэпкъхэм языкIыныгъэ игъэпытэн мэхьанэшхо зэриIэр къыхигъэщыгъ. КъумпIыл Мурат сценэм тетэу къэзэрэугъоигъэхэм закъыфи­гъэзагъ, Урысыем и МафэкIэ къафэгу­шIуагъ. «Мэхьанэшхо зиIэ къэралыгъо мэфэкIыр — Урысыем и Мафэ непэ хэтэгъэунэфыкIы. Тикъэралыгъо ишъхьафитыныгъэ, ащ щыпсэурэ лъэпкъхэу Хэгъэ­гур нахь фэшIыгъэ хъуным яшъыпкъэу фэлажьэхэрэм языкIыныгъэ ятамыгъэу щыт мы мафэр, — къыIуагъ КъумпIыл Мурат. — Тэ ткIуачIэ къыхэзыгъахъорэр тизэкъотыныгъ, сыд фэдэрэ къиныгъоу къыкъокIыхэрэми тызэгъусэу тапэшIуе­кIоным, Хэгъэгум ыпашъхьэ ит пшъэрылъхэр зэдызэшIотхынхэм тызэрафэхьазырыр ары. Урысыем инахьыжъхэр, тятэжъхэр, тятэжъ пIашъэхэр джарэущтэу зекIощтыгъэх. Урысыем и Президентэу Владимир Путиным зэрэхигъэунэфыкIыгъэу, ахэр сыдигъуи «ыпэкIэ зэрэлъыкIотэщтхэм, Хэгъэгур къызэраухъумэщтым, ифэшъошэ чIыпIэ ащ дунаим зэрэщиубытыщтым пылъыгъэх». Непэ тэри нахь пытэу тызэкъоуцо, ыпэкIэ тылъэкIуатэ нахь, зыми зыкъедгъэгъащтэрэп». Адыгеим и ЛIышъхьэ республикэмрэ хэгъэгумрэ хьалэлэу афэлэжьэрэ пстэуми зэрафэразэр къыIуагъ. Урысыем ифедэхэр лIыхъужъэу къэзыгъэгъунэрэ дзэкIолIхэм, хэгъэгум ишъолъырыкIэхэм арысхэр къэзыухъумэхэрэм шъхьафэу «тхьашъуегъэпсэу» ариIуагъ. АР-м и Къэралыгъо Совет — Хасэм и Тхьаматэу Владимир Нарожнэр, Адыгеим, КъЩР-м, КъБР-м янароднэ тхакIоу, IофшIэным и ЛIыхъужъэу, УФ-м и Общественнэ палатэ хэтэу МэщбэшIэ Исхьакъ, АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард республикэм исхэм къафэгушIуагъэх.